ବଲାଙ୍ଗୀର,୧୫ା୧୧(ବୀରେନ୍ଦ୍ର କୁମାର ଝାଙ୍କର):୨୦୨୪ ନିର୍ବାଚନ ପରେ ବଲାଙ୍ଗୀରରେ ନୂଆ ରାଜନୈତିକ ସମୀକରଣ ସୃଷ୍ଟି ହୋଇଛି। ୨୪ ବର୍ଷର ନବୀନ ସରକାରର ପତନ ପରେ ବିଜେଡି ନେତାଙ୍କ ପ୍ରଭାବ କମିଥିବା ବେଳେ ଭାଜପା ନେତାଙ୍କ ପତିଆରା ବହୁ ଗୁଣରେ ବୃଦ୍ଧି ପାଇଛି। ଏହି ପରିବର୍ତ୍ତନ ବଲାଙ୍ଗୀର ରାଜ ପରିବାରରେ ରାଜନୈତିକ ଶୀତଳ ଯୁଦ୍ଧର ସ୍ଥିତି ସୃଷ୍ଟି କରିଛି।
ଉପମୁଖ୍ୟମନ୍ତ୍ରୀ ତଥା ବରିଷ୍ଠ ଭାଜପା ନେତା କନକ ବର୍ଦ୍ଧନ ସିଂଦେଓ ଏବଂ ତାଙ୍କ କାକା ପୁଅ ଭାଇ ବିଜେଡି ନେତା ତଥା ବଲାଙ୍ଗୀର ବିଧାୟକ କଲିକେଶ ନାରାୟଣ ସିଂଦେଓଙ୍କ ଭିତରେ ମୁହଁାମୁହିଁ ପରିସ୍ଥିତି ପ୍ରମୁଖ ଚର୍ଚ୍ଚାର ବିଷୟ ହୋଇଛି। ଉଭୟେ ଉଭୟଙ୍କୁ ସଭାସମିତିରେ ଭାଇ ସମ୍ବୋଧନ କରି ସମ୍ମାନ ଦେଲା ଭଳି ଦେଖାଯାଉଥିଲେ ମଧ୍ୟ ଭାଷଣବାଜିରୁ ଭାଜପା-ବିଜେଡିର ପ୍ରତିନ୍ଦ୍ୱନ୍ଦ୍ୱୀ ମନୋଭାବ ଉକୁଟିି ଉଠୁଛି। କିଛି ଦିନ ତଳେ ବଲାଙ୍ଗୀର କୋଶଳ କଳାମଣ୍ଡଳ ପଡ଼ିଆରେ ଆୟୋଜିତ ‘ବଲାଙ୍ଗୀର ଦିନ୍’ ଉତ୍ସବରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ଉପସ୍ଥିତିରେ ଉପମୁଖ୍ୟମନ୍ତ୍ରୀ କନକ ବର୍ଦ୍ଧନ ଏବଂ ବିଧାୟକ କଲିକେଶ ନାରାୟଣ ଭାଷଣବାଜିରେ ମୁହଁାମୁହିଁ ହୋଇଥିଲେ। ମୁଖ୍ୟମନ୍ତ୍ରୀଙ୍କ ସମ୍ମୁଖରେ କଲିକେଶ କୃଷି ବିଶ୍ୱବିଦ୍ୟାଳୟ ପ୍ରତିଷ୍ଠା, ଦେଓଗଁା ଚିନି କଳ ପୁନଃ କାର୍ଯ୍ୟକ୍ଷମ, ଜଳାଶୟ ପୁନରୁଦ୍ଧାର, କୋଶଳ କଳାମଣ୍ଡଳରେ ବଡ଼ ଅଡିଟୋରିୟମ୍ ନିର୍ମାଣ ସହ ଲମ୍ବା ଦାବି ଉପସ୍ଥାପନ କରିଥିଲେ। ବିଜେଡି ନେତା ତଥା ରାଜ୍ୟ ସଭା ସଦସ୍ୟ ନିରଞ୍ଜନ ବିଶି, ଜିଲା ପରିଷଦ ସଭାପତି ଦେବକୀ ସାହୁ, ପୌରାଧ୍ୟକ୍ଷା ଲିକା ସାହୁ ମଧ୍ୟ ବିଭିନ୍ନ ଦାବି ଉଠାଇଥିଲେ।
ସମ୍ମୁଖରେ ବିଧାୟକ କଲିକେଶ ଓ ବିଜେଡି ନେତାଙ୍କ ଏହି ଦାବି ଉପସ୍ଥାପନ ଫର୍ମୁଲା ବୁଝିବାକୁ ଅଭିଜ୍ଞ କନକ ବର୍ଦ୍ଧନଙ୍କୁ ବେଶି ସମୟ ଲାଗି ନ ଥିଲା। ପରେ ଭାଷଣ ଦେବାକୁ ଆସି କନକ ବର୍ଦ୍ଧନ ୨୪ ବର୍ଷ କେଉଁଠି ଥିଲ ବୋଲି ପ୍ରଶ୍ନ କରିଥିଲେ। ବିଜେଡି ସରକାରରେ ଥିଲା ବେଳେ ଜିଲାର ଏହିସବୁ ଗୁରୁତ୍ୱପୂର୍ଣ୍ଣ ପ୍ରସଙ୍ଗ ଓ ପ୍ରକଳ୍ପ କଥା ମନେ ପଡୁ ନ ଥିଲା କି ବୋଲି ପ୍ରଶ୍ନ କରିଥିଲେ । ଆଉ ପାଦେ ଆଗକୁ ବଢ଼ି କହିଥିଲେ, ମୋର ପାଟି ଖୋଲନାହିଁ, ପାଟି ଖୋଲିଦେଲେ ସମ୍ଭାଳି ପାରିବନି। ସେ ଆହୁରି କହିଥିଲେ, ସେ କାହାକୁ ଭୟ କରନ୍ତି ନାହିଁ। ତାଙ୍କ ନଁାରେ ଶୋଭାଯାତ୍ରା କରି ସ୍ଲୋଗାନ ଦେଲେ ମଧ୍ୟ ସେ ଦବି ଯିବା ଲୋକ ନୁହନ୍ତି। ଏଭଳି କହିବା ବେଳେ ସେଥିରୁ ମୃଦୁ ଧମକର ବାସ୍ନା ବାରି ହୋଇପଡ଼ିଥିଲା। ଲୋକେ କୁହାକୁହି ହୋଇଥିଲେ କନକଙ୍କ ଏଭଳି ଉଗ୍ର ରୂପ ପୂର୍ବରୁ କେବେ ଦେଖି ନ ଥିଲେ। ଏହା ହେଉଛି ଭାଇ-ଭାଇ ଓ ଭାଜପା-ବିଜେଡିର ଶୀତଳ ଯୁଦ୍ଧର ପ୍ରତିଫଳନ। ଦୁଇଦିନ ତଳେ ଜିଲାସ୍ତରୀୟ ଦିଶା ବୈଠକରେ ବିଜେଡି ଜନପ୍ରତିନିଧିମାନେ ବିଭିନ୍ନ ପ୍ରସଙ୍ଗ ଓ ଦାବି ଉଠାଇବା ବେଳେ ଲୋକ ସଭା ଏମ୍ପି ସଙ୍ଗୀତା କୁମାରୀ ସିଂଦେଓ ମଧ୍ୟ ବିଜେଡି ସରକାର କଥା ଉଠାଇଥିଲେ। ଦୁଇ ପରିବାର ଭିତରେ ରାଜନୈତିକ କଳି ଦେଖାଦେଇଥିଲେ ହେଁ ସମ୍ପତ୍ତିଗତ କଳିକୁ ନେଇ ଟଣାଓଟରା ଚାଲିଥିବା ବିଷୟ ଲୋକେ ଟୁପୁରୁଟାପର ହେଉଛନ୍ତି।