ନୂଆଦିଲ୍ଲୀ, ୨୧ା୪: କୋଭିଡ୍ ଭାରିଆଣ୍ଟ ଓମିକ୍ରନ୍ ସଂକ୍ରମଣ ପରେ ଦେଶରେ ଆକ୍ରାନ୍ତଙ୍କ ସଂଖ୍ୟା କମିଥିଲାବେଳେ ଏବେ ପୁଣି ଆକ୍ରାନ୍ତଙ୍କ ସଂଖ୍ୟା ବୃଦ୍ଧି ଚିନ୍ତା ବଢ଼ାଇଛି। ୩ ମାସରେ ପ୍ରଥମ ଥର ପାଇଁ ରିପ୍ରଡକ୍ସନ ନମ୍ବର (ଆର୍) ଭାଲ୍ୟୁ ୧ ଟପିଛି। ସଂକ୍ରମଣ କେତେ ଶୀଘ୍ର ବ୍ୟାପୁଛି ତାହା ଆର୍ ଭାଲ୍ୟୁ ସୂଚକାଙ୍କରୁ ଜଣାପଡ଼ିଥାଏ। ଗତ ଜାନୁୟାରୀ ପରଠାରୁ ଦେଶରେ ଆର୍ ଭାଲ୍ୟୁ ସର୍ବାଧିକ ଥିବା ଚେନ୍ନାଇ ଇନ୍ଷ୍ଟିଚ୍ୟୁଟ୍ ଅଫ୍ ମାଥମେଟିକାଲ ସାଇନ୍ସର ଗବେଷକ ସୀତାଭ୍ର ସିହ୍ନା ଆକଳନ କରିଛନ୍ତି। ଏପ୍ରିଲ ୫-୧୧ରେ ତାହା ୦.୯୩ ଥିଲା। ଜାନୁୟାରୀ ୧୬-୨୨ ମଧ୍ୟରେ ଆର୍ ଭାଲ୍ୟୁ ୧.୨୮ ରହିଥିଲା। ବିଶେଷ କରି ଦିଲ୍ଲୀ, ଉତ୍ତରପ୍ରଦେଶ, ହରିୟାଣାରେ ସଂକ୍ରମଣ ଉପରମୁହାଁ ହେବାରେ ଲାଗିଛି। ତେବେ ଆର୍ ଭାଲ୍ୟୁ ବଢ଼ିବା ପାଇଁ କେବଳ ଦିଲ୍ଲୀ, ୟୁପି କିମ୍ବା ହରିୟାଣା ଦାୟୀ ନୁହେଁ। ଏହି ସୂଚକାଙ୍କରେ ନମ୍ବର ବୃଦ୍ଧି ପାଇବା ଅର୍ଥ ସାରା ଦେଶରେ ସକ୍ରିୟ ମାମଲା ବଢ଼ିଛି ବୋଲି ସିହ୍ନା କହିଛନ୍ତି। ମହାମାରୀକୁ ନିୟନ୍ତ୍ରଣରେ ରଖିବାକୁ ହେଲେ ଆର୍ ଭାଲ୍ୟୁ ୧ ତଳକୁ ଆଣିବାକୁ ପଡ଼ିବ। ଏପ୍ରିଲ ୧୮ରେ କେବଳ ଦିଲ୍ଲୀ ଓ ୟୁପିରେ ଏହା ୨.୧୨ ରହିଥିବାବେଳେ ହରିୟାଣାରେ ୧,୭୦, କର୍ନାଟକରେ ୧.୦୪, ମୁମ୍ବାଇରେ ୧,୧୩ , ଚେନ୍ନାଇରେ ୧,୧୮ ଏବଂ ବେଙ୍ଗାଲୁରୁରେ ୧,୦୪ ରହିଛି।
ଦେଶରେ ଗତ ୨୪ ଘଣ୍ଟାରେ ୨,୦୬୭ ନୂଆ କରୋନା ସଂକ୍ରମିତ ଚିହ୍ନଟ ହୋଇଛନ୍ତି। ଫଳରେ ମୋଟ ମାମଲା ୪ କୋଟି ୩୦ ଲକ୍ଷ ୪୭ ହଜାର ୫୯୪ରେ ପହଞ୍ଚିଛି। ପୂର୍ବଦିନ ତୁଳନାରେ ଭାରତରେ ଆକ୍ରାନ୍ତଙ୍କ ସଂଖ୍ୟା ୬୬% ବୃଦ୍ଧି ପାଇଛି। ସକ୍ରିୟ ମାମଲା ୧୨,୩୪୦ରେ ପହଞ୍ଚିଥିବା ସ୍ବାସ୍ଥ୍ୟ ମନ୍ତ୍ରଣାଳୟ ପକ୍ଷରୁ କୁହାଯାଇଛି। ଦୈନିକ ପଜିଟିଭ୍ ହାର ୦.୪୯ ପ୍ରତିଶତ ରହିଛି। କେତେକ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳରେ ସଂକ୍ରମଣ ବଢ଼ୁଥିବାବେଳେ ଦେଶରେ ଚତୁର୍ଥ ଲହରର ଆଶଙ୍କା କମ୍ ବୋଲି ଆଇସିଏମ୍ଆର୍ ପୂର୍ବତନ ମୁଖ୍ୟ ବୈଜ୍ଞାନିକ ଡା. ଆର୍. ଗଙ୍ଗାଖେଦକର କହିଛନ୍ତି।
