ଢେଙ୍କାନାଳ ଅଫିସ,୫ ।୨
ଆରଆର୍ବି ଏନ୍ଟିପିସି ପରୀକ୍ଷାରେ ହୋଇଥିବା ତ୍ରୁଟି ସଂଶୋଧନ କରିବା ପାଇଁ ଢେଙ୍କାନାଳ ଜିଲା ଛାତ୍ର କଂଗ୍ରେସ ପକ୍ଷରୁ ଦାବି କରାଯାଇଛି। ଏହାର ପ୍ରତିବାଦରେ ଦଳୀୟ କର୍ମକର୍ତ୍ତାମାନେ ସ୍ଥାନୀୟ ରେଳ ଷ୍ଟେଶନରେ ଶୁକ୍ରବାର ପ୍ରତିବାଦ କରିଛନ୍ତି।
ଅଭିଯୋଗ ଅନୁଯାୟୀ, ୨୦୧୯ ଜାନୁୟାରୀରେ ରେଲଓ୍ବେ ନିଯୁକ୍ତି ବୋର୍ଡ ଆରଆରବି ନନ୍ ଟେକ୍ନିକାଲ ପପୁଲାର କାଟେଗୋରିରେ ଅନ୍ତର୍ଭୁକ୍ତ ୩୫ ହଜାର ୨୮୧ ପଦବୀ ପାଇଁ ବିଜ୍ଞାପନ ପ୍ରକାଶ କରିଥିଲା। ଘୋଷିତ ପଦବୀ ମଧ୍ୟରୁ ୧୦ ହଜାର ୬୨୮ ପଦପଦବୀରେ ସର୍ବନିମ୍ନ ଶିକ୍ଷାଗତ ଯୋଗ୍ୟତା ୧୦ମ ଓ ଯୁକ୍ତ୨ ରହିଥିବାବେଳେ ୨୪ ହଜାର ୬୪୯ ପଦ ଲାଗି ସର୍ବନିମ୍ନ ଶିକ୍ଷାଗତ ଯୋଗ୍ୟତା ସ୍ନାତକ ଡିଗ୍ରୀ ରହିଥିଲା। ୨୦୨୦ ଡିସେମ୍ବରଠାରୁ ୨୦୨୧ ଜୁଲାଇ ମଧ୍ୟରେ ୭ ପର୍ଯ୍ୟାୟରେ ୧୩ଟି କାଟେଗୋରିରେ ପରୀକ୍ଷା ହୋଇଥିଲା। ଗତ ଜାନୁୟାରୀ ୧୪ ଓ ୧୫ରେ ପରୀକ୍ଷା ଫଳ ପ୍ରକାଶିତ ହେବାପରେ ଏଥିରେ ବ୍ୟାପକ ତ୍ରୁଟିବିଚ୍ୟୁତି ପରିଲକ୍ଷିତ ହୋଇଛି। ରେଳ ବିଭାଗର ତ୍ରୁଟି ପାଇଁ ଜଣେ ପରୀକ୍ଷାର୍ଥୀ ୩ରୁ ୪ଟି ବିଭାଗରେ ଉତ୍ତୀର୍ଣ୍ଣ ହୋଇଛନ୍ତି। ଏହାପରେ ବିହାର, ଉତ୍ତରପ୍ରଦେଶ ସମେତ ଅନ୍ୟ ରାଜ୍ୟର ପରୀକ୍ଷାର୍ଥୀ ଆନ୍ଦୋଳନ କରିଥିଲେ।
ସେହିପରି ୨୦୧୯ରେ ଗ୍ରୁପ-ଡି ପରୀକ୍ଷାରେ ୧ଲକ୍ଷ ୩ହଜାର ୭୬୯ ପଦବୀ ପୂରଣ ପାଇଁ ବିଜ୍ଞାପନ ଜାରି କରାଯାଇଥିଲେ ମଧ୍ୟ ପରୀକ୍ଷା ହୋଇନାହିଁ। ଆସନ୍ତା ଫେବୃୟାରୀ ୨୩ରେ ପରୀକ୍ଷା କରାଯିବ ବୋଲି ଘୋଷଣା କରାଯାଇଛି। ପୂର୍ବରୁ କେବଳ ଗୋଟିଏ ପର୍ଯ୍ୟାୟ ପରୀକ୍ଷା କରାଯିବାକୁ ଘୋଷଣା ହୋଇଥିବାବେଳେ ବର୍ତ୍ତମାନ ପ୍ରାଥମିକ ଓ ମୁଖ୍ୟ ୨ଟି ପର୍ଯ୍ୟାୟରେ ପରୀକ୍ଷା ହେବ ବୋଲି କୁହାଯାଇଛି, ଯାହାକୁ ନେଇ ଅସନ୍ତୋଷ ପ୍ରକାଶ ପାଇଛି। ଆରଆରବି ଏନ୍ଟିପିସି ପରୀକ୍ଷାରେ ତ୍ରୁଟି ସଂଶୋଧନ କରି ଖାଲିଥିବା ପଦବୀର ୨୦ ଗୁଣାକୁ ସିବିଟି-୧ ପାଇଁ ସୁଯୋଗ ଦେବା, ଜଣେ ପରୀକ୍ଷାର୍ଥୀଙ୍କୁ କେବଳ ଗୋଟିଏ ବିଭାଗ ଲାଗି ସୁଯୋଗ ଦେବା, ଗ୍ରୁପ୍-ଡି ପରୀକ୍ଷାକୁ ଗୋଟିଏ ପର୍ଯ୍ୟାୟରେ କରିବା ପାଇଁ ଜିଲା ଛାତ୍ର କଂଗ୍ରେସର ଶୁଭମ୍ ଦାଶ ଦାବି କରିଛନ୍ତି।