ଭଦ୍ରକ ଅଫିସ, ୨୨।୩ – କେନ୍ଦ୍ରାଞ୍ଚଳ ଅବକାରୀ ଗୋଇନ୍ଦା ବିଭାଗ ପକ୍ଷରୁ ରବିବାର ରାତିରେ ଭଦ୍ରକ ଚରମ୍ପା ଅଞ୍ଚଳରୁ ଜବତ କରାଯାଇଛି ୧୫୨ ଗ୍ରାମର ବ୍ରାଉନସୁଗାର। ଏଥିସହ ସମ୍ପୃକ୍ତ ୨ ଯୁବକଙ୍କୁ ଗିରଫ କରାଯାଇଥିବା ବେଳେ ଏକ ବାଇକ୍ ଜବତ ହୋଇଛି। ସେମାନେ ହେଲେ ତିହିଡ଼ି ଅଞ୍ଚଳ ନୟାନନ୍ଦର ହରମନ ଦାସ ଓ ଚରମ୍ପା ବରାଳପୋଖରୀର ରାଜେନ୍ଦ୍ର ଷଡ଼ଙ୍ଗୀ। ସେମାନଙ୍କ ନିକଟରୁ ଜବତ ବ୍ରାଉନସୁଗାରର ଆନୁମାନିକ ମୂଲ୍ୟ ୧୫ ଲକ୍ଷ ଟଙ୍କା ହେବ।
ପ୍ରକାଶ ଯେ, ଚରମ୍ପା ଅଞ୍ଚଳରେ ବ୍ୟାପକ ଭାବେ ଚୋରାରେ ବ୍ରାଉନସୁଗାର ବେପାର ଚାଲିଥିବା ନେଇ ଗୋଇନ୍ଦା ବିଭାଗର ଏହି ଟିମ୍ ସୂଚନା ପାଇଥିଲା। ଏଣୁ ବିଭାଗ ପକ୍ଷରୁ ଏହି ଅଞ୍ଚଳରେ ପାଟ୍ରୋଲିଂ ଜୋର୍ଦାର କରାଯାଇଥିଲା। ରବିବାର ରାତିରେ ପାଟ୍ରୋଲିଂ ସମୟରେ ଗୋଟିଏ ବାଇକ୍ରେ ହରମନ ଓ ରାଜେନ୍ଦ୍ର ଯାଉଥିବା ସମୟରେ ଏହି ଟିମ୍ ସନ୍ଦେହ କରି ସେମାନଙ୍କୁ ଅଟକାଇଥିଲା। ସେମାନେ ଖସିଯିବା ପାଇଁ ଚେଷ୍ଟା କରୁଥିବା ସମୟରେ ଟିମ୍ କାବୁ କରିନେଇଥିଲା।
