ନୂଆଦିଲ୍ଲୀ,୨୯।୬ : ବିଦ୍ୟୁତ ବିତରଣ କମ୍ପାନୀଙ୍କ ଉପରେ ଶକ୍ତି ଉତ୍ପାଦନ କରୁଥିବା କମ୍ପାନୀଗୁଡିକର ମୋଟ ବକେୟା ରାଶି ୬୩% ବୃଦ୍ଧି ଘଟି ୧.୨୩ ଲକ୍ଷ କୋଟି ଟଙ୍କା ଛୁଇଁଛି। ଏହି କ୍ଷେତ୍ର ବର୍ତ୍ତମାନ ଚାପରେ ରହିଛି। ଏଭଳି ସ୍ଥିତିରେ ଗତ ବର୍ଷ ଏପ୍ରିଲ ମାସ ତୁଳନାରେ ଚଳିତ ବର୍ଷ ଏପ୍ରିଲରେ ବକେୟା ରାଶି ବୃହତ ପରିମାଣରେ ବୃଦ୍ଧି ଘଟିଥିବା ଜଣାପଡିଛି। ଏପ୍ରିଲ ୨୦୧୯ରେ ବିଦ୍ୟୁତ ବିତରଣ କମ୍ପାନୀଗୁଡିକ ଉପରେ ୭୫,୬୪୨ କୋଟି ଟଙ୍କାର ବକେୟା ରହିଥିବା ପ୍ରାପ୍ତି ପୋର୍ଟାଲରେ ଉଲ୍ଲେଖ ରହିଛି। ଏହି ପୋର୍ଟାଲକୁ ମେ ୨୦୧୮ରେ ଶୁଭାରମ୍ଭ କରାଯାଇଥିଲା। ଶକ୍ତି ଉତ୍ପାଦନ ଏବଂ ବିତରଣ କମ୍ପାନୀଙ୍କ ମଧ୍ୟରେ ହେଉଥିବା ନେଣଦେଣର ସ୍ବଚ୍ଛତା ଆଣିବା ଲକ୍ଷ୍ୟରେ ସରକାର ଏଭଳି ପଦକ୍ଷେପ ଗ୍ରହଣ କରିଥିଲେ। ଉତ୍ପାଦନକାରୀ କମ୍ପାନୀ ବିତରଣ କମ୍ପାନୀଙ୍କୁ ୬୦ ଦିନର ମହଲତ ପ୍ରଦାନ କରିଥିଲେ ମଧ୍ୟ ବକେୟା ରାଶିକୁ ଦେବାକୁ କମ୍ପାନୀ ସକ୍ଷମ ନ ହେବାରୁ ଏହି ରାଶି ବଢି ଯାଇଥିବା ଜଣାପଡିଛି।