ନୂଆଦିଲ୍ଲୀ, ୧୧।୧ : ଦିଲ୍ଲୀ ମେଟ୍ରୋ ରେଳ ନିଗମ ଲିମିଟେଡ (ଡିଏମଆରସି)ର ବିଭିନ୍ନ ବ୍ୟାଙ୍କରେ ମୋଟ ୬୨୦୮.୦୩ କୋଟି ଟଙ୍କା ରହିଛି। ଏନେଇ ଡିଏମଆରସି ପକ୍ଷରୁ ଦିଲ୍ଲୀ ହାଇକୋର୍ଟଙ୍କ ସମ୍ମୁଖରେ ସୂଚନା ପ୍ରଦାନ କରାଯାଇଛି। ଦିଲ୍ଲୀ ବିମାନ ବନ୍ଦର ମେଟ୍ରୋ ଏକ୍ସପ୍ରେସ ପ୍ରାଇଭେଟ ଲିମିଟେଡ (ଡିଏଏମଇପିଏଲ) ଦ୍ୱାରା ଦାଖଲ ହୋଇଥିବା ଆବେଦନରେ ଏକ ଅତିରିକ୍ତ ଆଫିଡେଭିଟ ଦାଖଲ କରିବାବେଳେ ଡିଏମଆରସି ଏହି ସୂଚନା ପ୍ରଦାନ କରିଛି। ଯେଉଁଥିରେ ୧୧ ମେ’ ୨୦୧୭ ମଧ୍ୟସ୍ଥତା ଆଓ୍ବାର୍ଡକୁ ଲାଗୁ କରିବାକୁ ଦାବି କରାଯାଇଛି।
ବ୍ୟାଙ୍କ ଆକାଉଣ୍ଟରେ ପଡ଼ିଥିବା ଅର୍ଥର ସବିଶେଷ ତଥ୍ୟ ଦେବାକୁ ହାଇକୋର୍ଟ ଗତ ମାସରେ ଡିଏମଆରସିଙ୍କୁ ନିର୍ଦ୍ଦେଶ ଦେଇଥିଲେ। ଡିଏମଆରସି ଦ୍ୱାରା ଦାଖଲ ହୋଇଥିବା ପୂର୍ବ ଆଫିଡେଭିଟ ଉପରେ କୋର୍ଟ ଧ୍ୟାନ ଦେଇଛନ୍ତି ଯେଉଁଥିରେ ଦର୍ଶାଯାଇଛି ଯେ ଏହାର ବ୍ୟାଙ୍କ ଆକାଉଣ୍ଟରେ ୧୬୪୨.୬୯ କୋଟି ଟଙ୍କା ଜମା କରାଯାଇଛି।
ଏହି ଆବେଦନ ସମ୍ବନ୍ଧରେ, ଡିଏମଆରସି ଆର୍ବିଟ୍ରେସନ ଆଣ୍ଡ କନ୍ସିଲିଏସନ ଆକ୍ଟ, ୧୯୯୬ ର ଧାରା ୩୪ ଅନୁଯାୟୀ ଏକ ପିଟିଶନ ଦାଖଲ କରିଥିଲା, ଯାହା ହାଇକୋର୍ଟର ଖଣ୍ଡପୀଠଙ୍କ ଦ୍ୱାରା ୨୦୧୮ ମାର୍ଚ୍ଚ ୬ରେ ଖାରଜ କରାଯାଇଥିଲା। ପରେ, ଏହି ନିଷ୍ପତ୍ତି ଅଧିନିୟମର ଧାରା ୩୭ ଅନୁଯାୟୀ ଏକ ଡିଭିଜନ ବେଞ୍ଚରେ ଚ୍ୟାଲେଞ୍ଜ କରାଯାଇଥିଲା। ଏହାକୁ ଆଂଶିକ ଅନୁମତି ଦିଆଯାଇଥିଲା ଏବଂ ୨୦୧୯ ଜାନୁୟାରୀ ୧୫ର ରାୟରେ ଖାରଜ କରାଯାଇଥିଲା।
ଡିଏଏମଇପିଏଲ୨୦୧୯ ର ରାୟ ବିରୋଧରେ ସୁପ୍ରିମକୋର୍ଟରେ ଏକ ସ୍ବତନ୍ତ୍ର ଆବେଦନ ଦାଖଲ କରିଥିଲେ। ୨୦୨୧ ସେପ୍ଟେମ୍ବର ୯ କୋର୍ଟ ସପକ୍ଷରେ ରାୟ ପ୍ରଦାନ କରିଥିଲେ।
୨୦୨୨ ଜାନୁୟାରୀ ୧୨ରେ ବିଚାରପତି ସୁରେଶ କୁମାର କୈତଙ୍କ ନେତୃତ୍ୱରେ ଗଠିତ ଖଣ୍ଡପୀଠ ଏହି ମାମଲାର ଶୁଣାଣି କରିବେ।