ଆକାଉଣ୍ଟକୁ ଫେରିଲା ୮.୬୦ ଲକ୍ଷ ଟଙ୍କା
8:45 amJune 12, 2022June 12, 2022 / 09

ରାଉରକେଲା ଅଫିସ,୧୨।୬: ରାଉରକେଲା ଛେଣ୍ଡ ସ୍ଥିତ ଏଲ୍‌. ବ୍ଲକର ଜଣେ ବ୍ୟକ୍ତି ସାଇବର ଠକେଇର ଶିକାର ହୋଇଥିଲେ। ଏ ନେଇ ରାଉରକେଲା ସାଇବର ଥାନାରେ ଅଭିଯୋଗ ହୋଇଥିଲା। ସାଇବର ପୋଲିସ ତଦନ୍ତ କରିବା ପରେ ଉକ୍ତ ବ୍ୟକ୍ତି ଜଣକ ୮ଲକ୍ଷ ୬୦ ହଜାର ଟଙ୍କା ଫେରିପାଇଛନ୍ତି। ଅବଶିଷ୍ଟ ୨୪ ହଜାର ୯୯୯ ଟଙ୍କା ମିଳି ନ ଥିବା ଜଣାପଡିଛି।
ଗତ ୧ ତାରିଖରେ ଛେଣ୍ଡ ସ୍ଥିତ ଏଲ ବ୍ଲକ୍‌ର ପରେଶ ଚନ୍ଦ୍ର ପ୍ରଧାନ (୫୮) ମୋବାଇଲର ୟେନୋ ଆପ୍‌ରେ କିଛି ସାମଗ୍ରୀ କିଣିବା ପାଇଁ ଓଟିପି ମେସେଜ ଆସିଥିଲା। ପରେଶ ଉକ୍ତ ଓଟିପିକୁ ମୋବାଇଲରେ ଦେବା ପରେ ତାଙ୍କ ଏସ୍‌ବିଆଇ ଆକାଉଣ୍ଟରୁ ପ୍ରଥମେ ୨୪ହଜାର ୯୯୯ ଟଙ୍କା କଟିଯାଇଥିଲା। ପରେ ୨ଲକ୍ଷ ୬୦ ହଜାର ଟଙ୍କା ଏବଂ ଅଳ୍ପ କିଛି ସମୟରେ ୬୦ ହଜାର ଟଙ୍କା ଏଭଳି ସମୁଦାୟ ୮ ଲକ୍ଷ ୮୪ ହଜାର ୯୯୯ ଟଙ୍କା ତାଙ୍କ ଆକାଉଣ୍ଟରୁ ଗାଏବ ହୋଇଯାଇଥିଲା। ଫଳରେ ପରେଶ ଉଦିତନଗର ସ୍ଥିତ ରାଉରକେଲା ସାଇବର ଥାନାରେ ଏ ନେଇ ଲିଖିତ ଅଭିଯୋଗ କରିଥିଲେ। ସାଇବର ପୋଲିସ ଏକ ମାମଲା (ନଂ.୧୧।୨୨) ରୁଜୁ କରି ଘଟଣାର ତଦନ୍ତ ଚଳାଇଥିଲା। ସାଇବର ପୋଲିସ ପ୍ରଥମେ ପରେଶଙ୍କ ୟେନୋ ୱେଲେଟ ଆକାଉଣ୍ଟକୁ ବନ୍ଦ କରି ଦେଇଥିଲା। ଯେଉଁ ମୋବାଇଲରୁ ୟେନୋ ମେସଜ୍‌ ଆସିଥିଲା ଉକ୍ତ ମେସେଜ୍‌କୁ ଫଲୋ କରି ତାଙ୍କ ଏସ୍‌ବିଆଇ ଆକାଉଣ୍ଟରୁ କଟିଥିବା ୮ଲକ୍ଷ ୮୪ହଜାର ୯୯୯ ଟଙ୍କାରୁ ପୋଲିସ ୮ଲକ୍ଷ ୬୦ ହଜାର ଟଙ୍କା ଉକ୍ତ ବ୍ୟକ୍ତିଙ୍କୁ ଫେରସ୍ତ କରାଇଥିଲା। ଅବଶିଷ୍ଟ ୨୪ହଜାର ୯୯୯ଟଙ୍କା ଫେରି ପାଇବା ପାଇଁ ପୋଲିସ ତଦନ୍ତ ଜାରି ରହିଛି ବୋଲି ଥାନାଧିକାରୀ ସିରୋଫେନା ଖେସ୍‌ ସୂଚନା ଦେଇଛନ୍ତି।