ନୂଆଦିଲ୍ଲୀ,୧୦।୨: ସର୍ବପୁରାତନ ଦଳ କଂଗ୍ରେସକୁ ନେଇ ଏକ ବଡ଼ ଖୁଲାସା ହୋଇଛି। ଅନେକ କଂଗ୍ରେସ ନେତା ସରକାରୀ ଭବନ ପାଇଁ ଭଡା ଦେଉନାହାଁନ୍ତି। ଏହି ନେତାଙ୍କ ମଧ୍ୟରେ କଂଗ୍ରେସ ସଭାପତି ସୋନିଆ ଗାନ୍ଧୀଙ୍କ ନାମ ମଧ୍ୟ ରହିଛି। ଦିଲ୍ଲୀ ମୁଖ୍ୟାଳୟ ଏବଂ ସୋନିଆ ଗାନ୍ଧୀଙ୍କ ବାସଭବନ ପାଇଁ ପାର୍ଟି ପକ୍ଷରୁ ଦୀର୍ଘ ଦିନ ହେବ ଭଡା ପଇଠ କରାଯାଇନାହିଁ। ସୂଚନା ଅଧିକାର ଅଧୀନରେ ମିଳିଥିବା ତଥ୍ୟରୁ ଏହି ସୂଚନା ମିଳିଛି। କେନ୍ଦ୍ର ନଗର ଉନ୍ନୟନ ଓ ଗୃହ ମନ୍ତ୍ରଣାଳୟ ଏକ ଆରଟିଆଇ ଆବେଦନକୁ ଜବାବରେ କହିଛି ଲକ୍ଷ ଲକ୍ଷ ଭଡା ଟଙ୍କା ବାକି ରହିଥିବାବେଳେ ଏପର୍ଯ୍ୟନ୍ତ ଦିଆଯାଉନାହିଁ।ଆରଟିଆଇ କାର୍ଯ୍ୟକର୍ତ୍ତା ସୁଜିତ ପଟେଲଙ୍କ ଆବେଦନକୁ ଦୃଷ୍ଟିରେ ରଖି କେନ୍ଦ୍ର ଗୃହ ମନ୍ତ୍ରଣାଳୟ ଏହି ସୂଚନା ଦେଇଛି।
ବର୍ତ୍ତମାନ କଂଗ୍ରେସ ନେତାମାନଙ୍କୁ ଲଜ୍ଜିତ କରିବା ପାଇଁ ଦାନ ସଂଗ୍ରହ କରି ଭଡା ଦେବା ପାଇଁ ଭାଜପାଏକ ଅଭିଯାନ ଆରମ୍ଭ କରିଛି। ଭାଜପା ନେତା ତେଜିନ୍ଦର ପାଲ ସିଂ ବାଗ୍ଗା କହିଛନ୍ତି, ବକେୟା ଭଡା ଟଙ୍କା ଆଦାୟ କରାଯିବା ପରେ ଏହାକୁ ସୋନିଆ ଗାନ୍ଧୀଙ୍କ ନିକଟକୁ ପଠାଯିବ। ରାଜନୈତିକ ମତଭେଦକୁ ଛାଡି ମୁଁ ତାଙ୍କୁ ଜଣେ ମଣିଷ ଭାବରେ ସାହାଯ୍ୟ କରିବାକୁ ଚାହୁଁଛି। ତେଜିନ୍ଦର ଆଜି ସୋସିଆଲ ମିଡିଆରେ ଏହି ଅଭିଯାନ ଆରମ୍ଭ କରିଛନ୍ତି। #SoniaGandhiReliefFund ଅଭିଯାନ ଆରମ୍ଭ କରି ସେ ସୋନିଆ ଗାନ୍ଧୀଙ୍କ ଆକାଉଣ୍ଟକୁ ୧୦ ଟଙ୍କା ପଠାଇଛନ୍ତି।