ପାଟନା, ୩ା୩:ପ୍ରେମ ଅନ୍ଧ। ପ୍ରେମ କରିବା ପୂର୍ବରୁ ବର୍ଣ୍ଣ, ଜାତି କିମ୍ବା ଗୁଣକୁ ଦେଖାଯାଏ ନାହିଁ। ଅଜବ ପ୍ରେମ ଘଟଣାକୁ ନେଇ ଅନେକ ସମୟରେ ଘଟଣାମାନ ଖବରକାଗଜ ଓ ନ୍ୟୁଜ୍ ଚ୍ୟାନେଲରେ ଦେଖିବାକୁ ମିଳୁଛି। ତେବେ ସେମିତି ଏକ ଅଜବ ପ୍ରେମ କାହାଣୀ ବିହାରରୁ ସାମ୍ନାକୁ ଆସିଛି। ବିହାର ଖଗରିଆ ଜିଲାର ରୁବୀ ଦେବୀ ୨୦୦୯ ରେ ନୀରଜ କୁମାର ସିଂଙ୍କୁ ବୈଦିକ ରୀତିନୀତିରେ ବାହାହୋଇଥିଲେ। ନୀରଜଙ୍କ ଔରସରୁ ରୁବୀଙ୍କର ୪ଟି ସନ୍ତାନ ଥିଲେ। ପରବର୍ତ୍ତୀ ସମୟରେ ରୁବୀ ପାଖ ପସ୍ରହାଗ୍ରାମର ମୁକେଶ ନାମକ ଅନ୍ୟ ଜଣେ ବିବାହିତ ବ୍ୟକ୍ତିଙ୍କ ପ୍ରେମରେ ପଡ଼ିଗଲେ। ସେମାନଙ୍କ ମଧ୍ୟରେ ଗଢ଼ିଉଠିଥିବା ପ୍ରେମ ସମୟକ୍ରମେ ଏତେ ମଜଭୁତ ହୋଇଯାଇଥିଲା ଯେ, ଦୁହେଁ ପରସ୍ପରକୁ ଛାଡ଼ି ରହିପାରୁ ନ ଥିଲେ। ଫଳରେ ଗୋଟିଏ ଦିନ ସେମାନେ ଘରଛାଡ଼ି ଚାଲିଯିବାକୁ ନିଷ୍ପତ୍ତି ନେଲେ। ରୁବୀ ପ୍ରେମିକଙ୍କ ସହ ଗତବର୍ଷ ଫେବୃୟାରୀ ୬ରେ ଫେରାର୍ ହୋଇଥିଲେ। ସେ ନିଜ ସହ ତାଙ୍କ ୩ ପିଲାଙ୍କୁ ନେଇ ଯାଇଥିବାବେଳେ ସେପଟେ ଘରେ ନୀରଜଙ୍କ ପାଖରେ ଛାଡ଼ିଚାଲିଯାଇଥିଲେ ତାଙ୍କ ଗୋଟିଏ ଝିଅକୁ। ବିବାହିତ ମୁକେଶଙ୍କ ସ୍ତ୍ରୀଙ୍କ ନାଁ ମଧ୍ୟ ରୁବୀ ଦେବୀ ଓ ତାଙ୍କର ୨ ପିଲା ଥିଲେ।
ନୀରଜଙ୍କ ସ୍ତ୍ରୀ ରୁବୀଙ୍କୁ ମୁକେଶ ଅପହରଣ କରି ନେଇଥିବା ଅଭିଯୋଗ କରିବା ପରେ ଗାଁରେ ପଞ୍ଚାୟତ ବସିଥିଲା। ଗାଁ ପଞ୍ଚାୟତ ପକ୍ଷରୁ ଯେଉଁ ନିଷ୍ପତ୍ତି ନିଆଗଲା ସେଥିରେ ମୁକେଶ ରାଜି ହେଲେ ନାହିଁ। ଘଟଣାକୁ କିଛିଦିନ ବିତିଯିବା ପରେ ମୁକେଶଙ୍କ ସ୍ତ୍ରୀ ରୁବୀ ଦେବୀଙ୍କ ନମ୍ବର ନୀରଜଙ୍କୁ କୌଣସି ସୂତ୍ରରୁ ମିଳିଯାଇଥିଲା। ଏହାପରେ ଦୁହେଁ ଫୋନ୍ରେ କଥା ହେବା ଆରମ୍ଭ କଲେ। ଘଣ୍ଟା ଘଣ୍ଟା ଫୋନ୍ ଯୋଗେ କଥା ହେଉ ହେଉ ଦୁହେଁ ପରସ୍ପର ପ୍ରେମରେ ପଡ଼ିଯାଇଥିଲେ। ପରବର୍ତ୍ତୀ ସମୟରେ ଉଭୟଙ୍କ ପରିବାରର ସମ୍ମତିକ୍ରମେ ସେମାନଙ୍କର ବାହାଘର ହୋଇଥିଲା। ନୀରଜ ମୁକେଶଙ୍କ ୨ ପିଲାଙ୍କୁ ଗ୍ରହଣ କରିବାକୁ ମଧ୍ୟ ରାଜି ହୋଇଥିଲେ। ତେବେ ପ୍ରତିଶୋଧପରାୟଣ ହୋଇ ମୁକେଶଙ୍କ ସ୍ତ୍ରୀ ରୁବୀଙ୍କ ସହିତ ନୀରଜ ପ୍ରେମ ସମ୍ପର୍କ ଗଢ଼ିଥିବା ଆଲୋଚନା ହେଉଛି। ସୂଚନାଯୋଗ୍ୟ ଦୁଇ ଦମ୍ପତି ମଧ୍ୟପ୍ରଦେଶରେ ରହୁଛନ୍ତି। ନୀରଜ ଟାଟା କମ୍ପାନୀରେ କାମ କରୁଥିବାବେଳେ ମୁକେଶ ଶ୍ରମିକ ଭାବେ କାର୍ଯ୍ୟ କରୁଥିବା ଜଣାପଡ଼ିଛି।