ଭୁବନେଶ୍ୱର,୧।୫: ରାଜ୍ୟ ପ୍ରମୁଖ ଖାଦ୍ୟପ୍ରକ୍ରିୟାକରଣ ୟୁନିଟ୍ ରୁଚି ମସଲା ଜର୍ମାନୀର ଡସେଲଡ଼ର୍ଫଠାରେ ଆୟୋଜିତ ହେବାକୁ ଥିବା ଇଣ୍ଟରପ୍ୟାକ୍ ଆନ୍ତର୍ଜାତିକ ପ୍ରଦର୍ଶନୀରେ ଯୋଗ ଦେଉଛି ବୋଲି କମ୍ପାନୀ ପକ୍ଷରୁ ସୂଚନା ଦିଆଯାଇଛି। ଏପରିକି ଅନ୍ତଃରାଷ୍ଟ୍ରୀୟସ୍ତରର ବୃହତ୍ ଶିଳ୍ପ ଓ ଉଦ୍ୟୋଗ ପ୍ରଦର୍ଶନୀରେ ଯୋଗଦେବା ପାଇଁ ରୁଚିର ପରିଚାଳନା ନିର୍ଦ୍ଦେଶକ ଡ.ଶରତ କୁମାର ସାହୁ ରବିବାର ଜର୍ମାନୀ ଓ ନେଦରଲାଣ୍ଡ ଗସ୍ତ କରିଛନ୍ତି। ବିଶେଷ କରି ରାଜ୍ୟ ସରକାରଙ୍କ ଦ୍ୱାରା ବିକଶିତ ରାମଦାସପୁର ନୂତନ ଶିଳ୍ପାଞ୍ଚଳଠାରେ ରୁଚିର ଆଉ ଏକ ୟୁନିଟ ପ୍ରତିଷ୍ଠା ହେବାକୁ ଯାଉଛି। ଉଲ୍ଲେଖଯୋଗ୍ୟ ରୁଚି ଶିଳ୍ପାନୁଷ୍ଠାନ ପରିସରରେ ଇଟାଲୀ, ଜାପାନ ଏବଂ ଜର୍ମାନୀର ଉନ୍ନତ ଜ୍ଞାନକୌଶଳ ସହଯୋଗରେ ଏକ ଅତ୍ୟାଧୁନିକ ପାସ୍ତା ଓ ଖାଦ୍ୟପ୍ରକ୍ରିୟାକରଣର ନୂତନ ଉଦ୍ୟୋଗ ପ୍ରତିଷ୍ଠା ହେବାକୁ ଯାଉଛି। ସେହିଭଳି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ରାଜ୍ୟର ପ୍ରମୁଖ ଶିଳ୍ପୋଦ୍ୟୋଗୀମାନଙ୍କୁ ନେଇ ଜାପାନ ଗସ୍ତରେ ଯାଇଥିଲେ। ଏପରିକି ମୁଖ୍ୟମନ୍ତ୍ରୀଙ୍କ ସହିତ ଡ. ସାହୁ ମଧ୍ୟ ସେଥିରେ ଯୋଗ ଦେଇଥିଲେ। ଏହି ପରିପ୍ରେକ୍ଷୀରେ ଜର୍ମାନୀର ଅତ୍ୟାଧୁନିକ ଜ୍ଞାନକୌଶଳ ସହଯୋଗରେ ୫୦୦ କୋଟି ଟଙ୍କା ବ୍ୟୟରେ ଏକ ଅତ୍ୟାଧୁନିକ ଶିଳ୍ପାନୁଷ୍ଠାନ ପ୍ରତିଷ୍ଠା ପାଇଁ ‘ରୁଚି’ ପକ୍ଷରୁ ପ୍ରସ୍ତୁତ କରାଯାଉଥିବା ନୂତନ ପ୍ରକଳ୍ପ ବିଷୟରେ ବିସ୍ତୃତ ଆଲୋଚନା କରାଯାଇଥିଲା। ରାଜ୍ୟର ଦ୍ରୁତ ଶିଳ୍ପାୟନର ବିକାଶ କ୍ଷେତ୍ରରେ ରୁଚି ମସଲାର ପ୍ରମୁଖ ଭୂମିକା ରହିଥିଲା ବେଳେ ଡ. ସାହୁ ଲୋକସେବା ଭବନଠାରେ ମୁଖ୍ୟ ଶାସନ ସଚିବ ପ୍ରଦୀପ କୁମାର ଜେନାଙ୍କୁ ସୌଜନ୍ୟମୂଳକ ସାକ୍ଷାତ୍ କରି ଏ ନେଇ ବିସ୍ତୃତ ଆଲୋଚନା କରିଥିଲେ। ଏପରିକି ଶିଳ୍ପ ଓ ଔଦ୍ୟୋଗିକ ବିକାଶ କ୍ଷେତ୍ରରେ ରୁଚି ମସଲାର ସହଭାଗିତା ପାଇଁ ମୁଖ୍ୟ ଶାସନ ସଚିବ ସାହୁଙ୍କୁ ଉଚ୍ଚ ପ୍ରଶଂସା କରିଥିଲେ।
