ନୂଆଦିଲ୍ଲୀ,୨୯।୭: ଦିଲ୍ଲୀ ବିଧାନସଭା ମୌସୁମୀ ଅଧିବେଶନରେ ଗୁରୁବାର ଜୋରଦାର ହଟ୍ଟଗୋଳ ହୋଇଛି। ବିରୋଧୀ ଦଳ ସଦସ୍ୟମାନେ ବାଚସ୍ପତିଙ୍କ ସହ ଯୁକ୍ତିତର୍କ ମଧ୍ୟ କରିଛନ୍ତି। ଗୃହରେ ପ୍ରବଳ ହଟ୍ଟଗୋଳ ଯୋଗୁ ବାଚସ୍ପତି ଭାଜପା ବିଧାୟକ ଅନୀଲ ବାଜପେୟୀଙ୍କୁ ମାର୍ଶଲ ଆଉଟ କରିବାକୁ ନିର୍ଦ୍ଦେଶ ଦେଇଥିଲେ। ଇତିମଧ୍ୟରେ ଭାଜପା ବିଧାୟକ ଉଠାଇଥିବା ପ୍ରଶ୍ନ ବିରୋଧରେ ଆମ ଆଦମୀ ପାର୍ଟି(ଏଏପି)ର ବିଧାୟକମାନେ ବାଚସ୍ପତିଙ୍କ ଚେୟାର ନିକଟରେ ପହଞ୍ଚିଥିଲେ। ଏହି ସମୟରେ ଭାଜପା ବିଧାୟକ ଓପି ଶର୍ମା ଏଏପିର ଜଣେ ବିଧାୟକଙ୍କୁ ଟାର୍ଗେଟ କରି ଗୃହର ଗାରିମାକୁ କ୍ଷୂର୍ଣ୍ଣ ପହଞ୍ଚାଇବା ଭଳି ମନ୍ତବ୍ୟ ଦେଇଥିଲେ। ଫଳରେ ଗୃହରେ ଉତ୍ତେଜନାକୁ ଦୃଷ୍ଟିରେ ରଖି ବାଚସ୍ପତି ଦିନସାରା ଓପି ଶର୍ମାଙ୍କୁ ଗୃହରୁ ନିଲମ୍ବିତ କରିଛନ୍ତି। ଏତଦ୍ ବ୍ୟତୀତ ବିଜେନ୍ଦ୍ର ଗୁପ୍ତା ଓ ଜିତେନ୍ଦ୍ର ମହାଜନଙ୍କୁ ମଧ୍ୟ ମାର୍ଶଲ ଆଉଟ କରିବାକୁ ବାଚସ୍ପତି ନିର୍ଦ୍ଦେଶ ଦେଇଥିଲେ। ହଟ୍ଟଗୋଳ ସମୟରେ ବିରୋଧୀଙ୍କୁ ୨୦ମିନିଟ୍ରୁ ଆଉ ଏକ ସେକେଣ୍ଡ ସମୟ ଦିଆଯିବ ନାହିଁ ବୋଲି ବାଚସ୍ପତି କହିଥିଲେ। ଅନ୍ୟପଟେ ଗୃହର ହଟ୍ଟଗୋଳକୁ ନେଇ ବାଚସ୍ପତି ପ୍ରତିକ୍ରିୟା ରଖିଛନ୍ତି। ଏହି ଉତ୍ତେଜନାରେ ବିବ୍ରତ ହୋଇ ବାଚସ୍ପତି କହିଛନ୍ତି, କେନ୍ଦ୍ର ସରକାର ସମ୍ବିଧାନକୁ ହତ୍ୟା କରିବାରେ ଲାଗିପଡ଼ିଛନ୍ତି। ତାଙ୍କର ଅଧ୍ୟକ୍ଷତା କାର୍ଯ୍ୟକାଳ ସମୟରେ କେନ୍ଦ୍ର ସରକାର ବିଧାନସଭା କମିଟିଙ୍କ ଅଧିକାର ଛଡ଼ାଇ ନେବା ଏହା ଏକ ଦୁର୍ଭାଗ୍ୟଜନକ।