ଡିଜନି ପ୍ଲସ୍ ହଟ୍ଷ୍ଟାର, ହଟଷ୍ଟାର ସ୍ପେସିଆଲ ଓ ବଲିଉଡ୍ ଅଭିନେତା ଅଜୟ ଦେବଗନଙ୍କ ବହୁ ପ୍ରତିକ୍ଷୀତ କ୍ରାଇମ, ଥ୍ରୀଲର ଓ ସସ୍ପେନ୍ସ ସିରିଜ୍ ‘ରୁଦ୍ର ଦ ଏଜ୍ ଅଫ୍ ଡାର୍କନେସ୍’ର ଦ୍ୱିତୀୟ ଟ୍ରେଲର ରିଲିଜ୍ ହୋଇଛି। ସୋମବାର ମୁମ୍ବାଇର ଏକ ଇଭେଣ୍ଟରେ ଏହି ଟ୍ରେଲରକୁ ରିଲିଜ୍ କରାଯାଇଛି। ୨ମିନିଟ୍ ୬ସେକେଣ୍ଡର ଏହି ଟ୍ରେଲରଟି ଅଜୟ ଦେବଗନଙ୍କ ଜବରଦସ୍ତ ଡାଏଲଗ୍ ଅନ୍ଧାରରେ ଯିଏ ଲୁଚି ରୁହେ, ମୁଁ ତା’କୁ ସେଠାରେ ହିଁ ମିଳିଥାଏରୁ ଆରମ୍ଭ ହୋଇଛି। ନିର୍ଦ୍ଦେଶକ ରାଜେଶ ମାପୁସ୍କରଙ୍କ ନିର୍ଦ୍ଦେଶିତ ଏହି ଡିଜିଟାଲ ସିରିଜ୍ରେ ଏସ୍ପି ରୁଦ୍ର ବୀର ଚରିତ୍ରରେ ଅଜୟଙ୍କ ଅଭିନୟର ଯାଦୁ ଦେଖିବାକୁ ମିଳିବ। ଯିଏ ରହସ୍ୟମୟ ଅପରାଧର ସମାଧାନ କରୁଥିବାର ନଜର ଆସିଛନ୍ତି। ସାଇକ୍ଲୋଜିକାଲ କ୍ର୍ରାଇମ୍ ଡ୍ରାମା ସହ ଅଜୟ ଦେବଗନ ଏକ ନୂଆ ଅନ୍ଦାଜରେ ଡିଜିଟାଲ ସିରିଜ୍ ଦୁନିଆରେ ପାଦ ରଖିଛନ୍ତି। ଏହି ଫିଲ୍ମରେ ଥିବା ତାଙ୍କର ରୁଦ୍ର ଚରିତ୍ର ଅତ୍ୟନ୍ତ ଚ୍ୟାଲେଞ୍ଜିଂ ଏବଂ ପ୍ରେରଣାଦାୟକ। ଦର୍ଶମାନେ ତାଙ୍କୁ କେବେ ଏହି ଚରିତ୍ରରେ ଦେଖି ନ ଥିବେ ବୋଲି ଅଜୟ କହିଛନ୍ତି। ଏହି ୬ଟି ଧାରାବାହିକ ହେଉଛି ବ୍ରିଟିଶ ସିରିଜ ‘ଲୁଥର୍’ର ଭାରତୀୟ ସଂସ୍କରଣ। ଯାହା ସାରା ବିଶ୍ୱରେ ଲୋକପ୍ରିୟ ହୋଇଥିଲା। ଏହି ସିରିଜ୍ରେ ରାଶି ଖନ୍ନା, ଇଶା ଦେଓଲ, ଅତୁଲ କୁଲକର୍ଣ୍ଣୀ, ଅଶ୍ୱୀନ, ତରୁଣ ଗେହଲଟ ଓ ଆଶିଷ ବିଦ୍ୟାର୍ଥି ସମେତ ସତ୍ୟଦୀପ ମିଶ୍ରାଙ୍କୁ ମୁଖ୍ୟ ଭୂମିକାରେ ଦେଖିବାକୁ ମିଳିବ। ମୁମ୍ବାଇର ସବୁଠାରୁ ଲୋକପ୍ରିୟ ସ୍ଥାନଗୁଡ଼ିକରେ ଏହାର ଶୁଟିଂ କରାଯାଇଛି। ତେବେ ମାର୍ଚ୍ଚ ୪ରେ ଏହାକୁ ଡିଜନି ପ୍ଲସ ହଟଷ୍ଟାରରେ ହିନ୍ଦୀ, ମରାଠୀ, ତାମିଲ, ତେଲୁଗୁ, କନ୍ନଡ, ମାଲାୟାଲମ ଓ ବଙ୍ଗାଳୀରେ ରିଲିଜ୍ ହେବ ବୋଲି ଜଣାପଡ଼ିଛି।