ଭୁବନେଶ୍ୱର,୨୮ା୩(ବ୍ୟୁରୋ): ପିପିଲି ଉପନିର୍ବାଚନ ପାଇଁ ବିଜେଡି ପ୍ରାର୍ଥୀ ରୁଦ୍ର ପ୍ରତାପ ମହାରଥୀ ଆସନ୍ତା ୩୦ ତାରିଖରେ ନାମାଙ୍କନପତ୍ର ଦାଖଲ କରିବେ। ମନ୍ତ୍ରୀ ସୁଶାନ୍ତ ସିଂଙ୍କ ସରକାରୀ କାର୍ଯ୍ୟାଳୟରେ ଅନୁଷ୍ଠିତ ଦଳୀୟ ବୈଠକ ପରେ ଗଣମାଧ୍ୟମକୁ ସୂଚନା ଦେଇ ବିଜେଡି ମୁଖପାତ୍ର ତଥା ପିପିଲି ପର୍ଯ୍ୟବେକ୍ଷକ ପ୍ରତାପ ଦେବ କହିଛନ୍ତି ଯେ, ଏହି ଆସନରେ ବିଜୟ ପାଇଁ ଦଳ ସବୁପ୍ରକାର ଉଦ୍ୟମ କରିବ। ପରିବାରରେ ଥିବା ମନୋମାଳିନ୍ୟ ସମ୍ପର୍କରେ ଉତ୍ତର ଦେଇ କହିଛନ୍ତି ଯେ, ପରିବାର ମଧ୍ୟରେ କୌଣସି ଅସନ୍ତୋଷ ନାହିଁ। ଗଣମାଧ୍ୟମ ଜରିଆରେ କେବଳ ଅପପ୍ରଚାର କରାଯାଉଛି। ପରିବାରର ଜଣେ ସଦସ୍ୟ ଅନ୍ୟ ସଦସ୍ୟଙ୍କ ବିରୋଧରେ କେମିତି ଯିବ ବୋଲି ସେ ପ୍ରଶ୍ନ କରିଛନ୍ତି। ଏଭଳି ପ୍ରଚାର ନ କରିବାକୁ ସେ ଗଣମାଧ୍ୟମକୁ ଅନୁରୋଧ କରିଛନ୍ତି।
