ଭୁବନେଶ୍ୱର, ୨।୪ (ବ୍ୟୁରୋ): ବୟସ ସିନା କମ୍, ହେଲେ ବହୁ ପ୍ରତିଭାର ଅଧିକାରୀ। ମାତ୍ର ୨ବର୍ଷ ୧୧ ମାସ ବୟସରେ ଇଣ୍ଡିଆ ବୁକ୍ ଅଫ୍ ରେକର୍ଡସ୍ ହାସଲ କରିଛନ୍ତି ରୁଦ୍ରାଂଶ ମହାପାତ୍ର। ତାଙ୍କ ବୟସର ପିଲା ସ୍ପଷ୍ଟ ଭାବେ କଥା କହିପାରୁ ନ ଥିବାବେଳେ ସେ ଅନର୍ଗଳ ମନ୍ତ୍ର ଆଉ ଶ୍ଳୋକ ଗାଉଛନ୍ତି। ବାପା, ଜେଜେବାପାଙ୍କ ମୁହଁରୁ ଗାୟତ୍ରୀ ମନ୍ତ୍ର, ମହାମୃତ୍ୟୁଞ୍ଜୟ ମନ୍ତ୍ର, ଭୋଜନ ମନ୍ତ୍ର, ଦୁର୍ଗା ସ୍ତୁତି, ଶିବ ତାଣ୍ଡବ ସ୍ତୋତ୍ରମ୍ ଭଳି ଅନେକ ଶ୍ଳୋକ ମନେ ରଖି ଗାଉଛନ୍ତି। ଖାଲି ସେତିକି ନୁହେଁ, ହିନ୍ଦୀ, ଇଂଲିଶ୍ ରାଇମ୍ସ, ଇଂଲିଶ୍ ଆଲଫାବେଟ୍ରେ ୫ଟି ଲେଖାଏ ଶବ୍ଦ, ଜାତୀୟ ଏବଂ ଅନ୍ତଜାର୍ତୀୟସ୍ତରୀୟ ସାଧାରଣ ଜ୍ଞାନ, ୫୯ଟି ପଶୁର ନାଁ, ପକ୍ଷୀ, ବେବି ଆନିମଲ୍ସ, ଫୁଲ, ପନିପରିବା, ଫଳ, ରଙ୍ଗ, ଶରୀରର ୩୦ରୁ ଅଧିକ ଅଙ୍ଗପ୍ରତ୍ୟଙ୍ଗର ନାମ କହିବା, ୧୨ମାସ, ସପ୍ତାହର ୭ ଦିନ, ଇନ୍ଦ୍ରଧନୁର ୭ ରଙ୍ଗର ନାମ, ବିଭିନ୍ନ ପ୍ରକାରର ଶେପ୍ ଆଦିକୁ ପ୍ରାଞ୍ଜଳ ଭାବେ ଚିହ୍ନଟ କରି କହିପାରନ୍ତି। ଜେଜେ ମା’ ଓ ଜେଜେବାପାଙ୍କଠାରୁ ପୌରାଣିକ ଗପ, କବିତା, କଥାବସ୍ତୁ ଆଦି ଶୁଣି ଶୁଣି ସେ ମନେ ରଖିଦିଅନ୍ତି ଏବଂ ଖୁବ୍ ସୁନ୍ଦର ଭାବେ ମଧ୍ୟ କହିପାରନ୍ତି। ଏସବୁ ବ୍ୟତୀତ ରୁଦ୍ରାଂଶ ସୁନ୍ଦର ଅଭିନୟ କରିବା ସହ ନିଜ ୟୁଟ୍ୟୁବ୍ ଚ୍ୟାନେଲ୍ ‘ମାଇଁ ଲିଟିଲ୍ ହିରୋ ରୁଦ୍ରାଂଶ’ରେ ଭିଡିଓ ମାଧ୍ୟମରେ କରୋନା, ରାସ୍ତା କଡ଼ରେ ଆବର୍ଜନା ନ ପକାଇ ଡଷ୍ଟବିନ୍ ବ୍ୟବହାର କରିବା, ଗଛ ନ କାଟିବା ଆଦି ସମ୍ପର୍କରେ ବିଭିନ୍ନ ସଚେତନତା ବାର୍ତ୍ତା ଦେଇ ବେଶ୍ ଲୋକପ୍ରିୟତା ହାସଲ କରିପାରିଛନ୍ତି। ଶକ୍ତିଜିତ୍ ମହାପାତ୍ର ଓ ପୌର୍ଣ୍ଣମାସୀ ରାଜଲକ୍ଷ୍ମୀ ସେନାପତିଙ୍କ ଏକମାତ୍ର ପୁତ୍ର ରୁଦ୍ରାନ୍ସ ପୋଖରୀପୁଟରେ ପରିବାର ସହିତ ରହୁଛନ୍ତି। ନିଜ ପୁଅଙ୍କ ସଫଳତା ନେଇ ବାପା ଶକ୍ତିଜିତ୍ କୁହନ୍ତି, ତାକୁ ଆମେ କୌଣସି କଥା ଶିଖାଇବା ଲାଗି ବାଧ୍ୟ କରି ନ ଥାଉ। ଏତେ ଅଳ୍ପ ବୟସରେ ଏସବୁ ମନେ ରଖିପାରୁଥିବାରୁ ତା’ ନାମ ଇଣ୍ଡିଆ ବୁକ ଅଫ୍ ରେକଡର୍ସ ପାଇଁ ଆବେଦନ କରିଥିଲୁ। ଇଣ୍ଡିଆ ବୁକ୍ ଅଫ୍ ରେକର୍ଡସ ପକ୍ଷରୁ ଗୁରୁବାର ଆଚିଭର୍ସ ପ୍ୟାକ୍, ମେଡାଲ, ସାର୍ଟିଫିକେଟ, ଆଇକାର୍ଡ ଆଦି ପହଞ୍ଚିବା ପରେ ତା’ର ସଫଳତାରେ ଆମେ ବେଶ୍ ଖୁସି ଅଛୁ ବୋଲି କହିଛନ୍ତି। ତାଙ୍କର ଏହି ସଫଳତା ପାଇଁ ତାଙ୍କୁ ଏବେ ସବୁଆଡୁ ପ୍ରଶଂସାର ସୁଅ ଛୁଟୁଛି।
