କାମାକ୍ଷାନଗର,୮ା୮ (ସୁଧୀର ପରିଡ଼ା): ବୟସ ଆଣି ବୃଦ୍ଧାବସ୍ଥାରେ ପହଞ୍ଚାଇଲାଣି। ଶରୀର ଦୁର୍ବଳ ହୋଇଗଲାଣି। ଖଟି ଖାଇବା ଆଉ ସମ୍ଭବ ନୁହେଁ। ହେଲେ ଏକଥା ଜାଣି ବି ପର କରିଦେଲେ ପରିବାର ଲୋକେ। ଘରୁ ତଡ଼ିଦେଲେ ବୋହୂ ଓ ପୁଅ। ଏପରି ଅବସ୍ଥାରେ ପର ପିଣ୍ଡାରେ ଆଶ୍ରୟ ନେଇଥିବାରୁ ତାଙ୍କୁ ତୁରନ୍ତ ନ୍ୟାୟ ଦେବାକୁ ଢେଙ୍କାନାଳ ଜିଲା କାମାକ୍ଷାନଗର ଆଳତୁମା ବଡ଼ବିଲା ସାହିର ରୁକ୍ମଣୀ ପାତ୍ର ସୋମବାର ଉପଜିଲାପାଳଙ୍କୁ ନିବେଦନ କରିଛନ୍ତି।
ଅଭିଯୋଗରେ ରୁକ୍ମଣୀ ଦର୍ଶାଇଛନ୍ତି, ବୟସ ଅଧିକ ହୋଇଯାଇଥିବାରୁ ସେ ଆଉ ବାହାରେ କାମ କରି ନିଜ ଗୁଜରାଣ ମେଣ୍ଟାଇବା ଅବସ୍ଥାରେ ନାହାନ୍ତି। ପରିବାରରେ ବୋହୂ ଓ ପୁଅ ଥିଲେ ମଧ୍ୟ ସେମାନେ ତାଙ୍କର ଦେଖାଶୁଣା କରୁନାହାନ୍ତି। ଏପରି କି ନିଜ ଘରେ ବି ତାଙ୍କୁ ରଖାଇ ଦେଉନାହାନ୍ତି। ସେମାନେ ଘରୁ ବାହାର କରିଦେବା ପରେ ସେ ଏବେ ସାହି ପଡିଶାଙ୍କ ପିଣ୍ଡାରେ ମୁଣ୍ଡ ଗୁଞ୍ଜିଛନ୍ତି। ତାଙ୍କ କଥା ବୁଝିବାକୁ ଆଉ କେହି ନ ଥିବାରୁ ପ୍ରଶାସନ ଉପରେ ଭରସା କରି ସେ ଧାଇଁ ଆସିଥିବା ରୁକ୍ମଣୀ କାମାକ୍ଷାନଗର ଉପଜିଲାପାଳ ନାରାୟଣ ଚନ୍ଦ୍ର ନାୟକଙ୍କୁ ଅଭିଯୋଗ କରିଛନ୍ତି। ଏହି ଅଭିଯୋଗ ପାଇବା ପରେ ଉପଜିଲାପାଳ ତୁରନ୍ତ ଏନ୍ଏସି ନିର୍ବାହୀ ଅଧିକାରୀ ଯତୀନ୍ଦ୍ର ମିଶ୍ରଙ୍କୁ ଏହାର ସମାଧାନ କରିବା ପାଇଁ ନିର୍ଦ୍ଦେଶ ଦେଇଛନ୍ତି। ସମାଧାନ ନ ହେଲେ ଆଇନ ଅନୁଯାୟୀ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଉପଜିଲାପାଳ ପ୍ରତିଶ୍ରୁତି ଦେଇଛନ୍ତି।