ଜଗତ୍ସିଂହପୁର ଅଫିସ, ୨୯ା୬: ଜଗତ୍ସିଂହପୁରର ପୂର୍ବତନ ବିଧାୟକ ତଥା ପ୍ରଦେଶ କଂଗ୍ରେସ କମିଟି କାର୍ଯ୍ୟକାରୀ ସଭାପତି ଚିରଞ୍ଜୀବ ବିଶ୍ୱାଳ କଂଗ୍ରେସ ଛାଡ଼ି ବିଜେଡିରେ ମିଶିବା ନେଇ ପୁଣି ଚର୍ଚ୍ଚା ଜୋର ଧରିଛି। ୨୦୧୯ ସାଧାରଣ ନିର୍ବାଚନରେ ସେ ଏହି ବିଧାନସଭା ଆସନରୁ କଂଗ୍ରେସ ପ୍ରାର୍ଥୀ ହୋଇ ହାରିଯିବା ପରେ ନିର୍ବାଚନମଣ୍ଡଳୀ ସହ ସମ୍ପର୍କ କମାଇ ଦେଇଥିଲେ। ଏପରି କି ମାସ ମାସ ନିର୍ବାଚନମଣ୍ଡଳୀ ନ ଆସିବା ଦଳୀୟ ନେତା ଓ କର୍ମୀଙ୍କୁ ନିରାଶ କରୁଥିଲେ। ପଞ୍ଚାୟତ ନିର୍ବାଚନ ଘୋଷଣା ପରେ ସେ ଜଗତ୍ସିଂହପୁର ଆସିବା ଆରମ୍ଭ କରିଥିଲେ। କିନ୍ତୁ ସେତେବେଳେ ତାଙ୍କର ଆନ୍ତରିକତା ନ ଥିବା ଆଲୋଚନା ହୋଇଥିଲା। ତେଣୁ ସେ ବିଜେଡିରେ ମିଶିବା ନେଇ ଚର୍ଚ୍ଚା ଜୋର ଧରିଥିଲା। ସେତେବେଳେ ଅର୍ଥାତ୍ ଗତବର୍ଷ ଡିସେମ୍ବର ୯ରେ ସେ ଏହି ଚର୍ଚ୍ଚାରେ ପୂର୍ଣ୍ଣଚ୍ଛେଦ ପକାଇଥିଲେ। ତାଙ୍କୁ ଏ ପର୍ଯ୍ୟନ୍ତ କେହି ଆପ୍ରୋଚ୍ କରି ନ ଥିବାରୁ ଦଳ ଛାଡିବେ ନାହିଁ ବୋଲି ଧରିତ୍ରୀକୁ ସ୍ବତନ୍ତ୍ର ଭାବେ କହିଥିଲେ। କେବଳ ଏତିକି ନୁହେଁ, ବିଜେଡି କାର୍ଯ୍ୟାଳୟରେ କ’ଣ ସେ ଝାଡୁ ମାରିବେ ବୋଲି କହିଥିଲେ। ଏବେ ପୁଣି ଚିରଞ୍ଜୀବ ଓ ତାଙ୍କ ଭାଇ ତଥା ପୂର୍ବତନ ରାଜ୍ୟ ସଭା ସଦସ୍ୟ ରଞ୍ଜୀବ ବିଶ୍ୱାଳ କଂଗ୍ରେସ ଛାଡିବା ନେଇ ଆଲୋଚନା ଜୋର ଧରିଛି। ଏହା ଉପରେ ରଞ୍ଜୀବଙ୍କୁ ପଚାରିବାରୁ ଚର୍ଚ୍ଚା ଭିତ୍ତିହୀନ ଓ ଗୁଜବ ବୋଲି ଧରିତ୍ରୀକୁ କହିଛନ୍ତି। ରଞ୍ଜୀବଙ୍କ ସହ ଯୋଗାଯୋଗ କରିବାରୁ ଆଖି ଦେଖାଇବା ପାଇଁ ଡାକ୍ତରଖାନା ଯାଇଛି, ପରେ କଥା ହେବି ବୋଲି କହି ଆଉ ମୋବାଇଲ୍ କଲ୍ ଉଠାଇ ନ ଥିଲେ।
ଗତ ବର୍ଷ ଡିସେମ୍ବର ୧୧ରେ ‘ଧରିତ୍ରୀ ଆଳାପ’ରେ ଚିରଞ୍ଜୀବଙ୍କ ସହ ସ୍ବତନ୍ତ୍ର ସାକ୍ଷାତ୍କାର ପ୍ରକାଶ ପାଇଥିଲା। ଏଥିରେ କଂଗ୍ରେସର କେତେଜଣ ଆଗଧାଡ଼ିର ନେତା ଓ କର୍ମୀ ଏପରିକି ଚିରଞ୍ଜୀବଙ୍କ କେତେଜଣ ପାଖ ଲୋକଙ୍କୁ ଦଳ ଛାଡ଼ି ବିଜେଡିରେ ମିଶିଥିବା ସମ୍ପର୍କରେ ପଚରାଯାଇଥିଲା। ସେ ଏହାର ଉତ୍ତରରେ କହିଥିଲେ, କିଏ କାହାର ଲୋକ ହୋଇ ରହିବ ତାହା ବାଧ୍ୟତାମୂଳକ ନୁହେଁ। ତେଣୁ କିଏ କୁଆଡେ ଯିବ କହିହେବ ନାହିଁ। ଗଣତାନ୍ତ୍ରିକ ରାଷ୍ଟ୍ରରେ ପ୍ରତ୍ୟେକଙ୍କ ସ୍ବାଧୀନ ବିଚାର ଓ ନିଷ୍ପତ୍ତି ଅଛି। ହେଲେ ସେ ନିଜେ ବିଜେଡିରେ ମିଶିବା ସମ୍ପର୍କିତ ଆଲୋଚନା ଉପରେ ପୂର୍ଣ୍ଣଚ୍ଛେଦ ପକାଇ କହିଥିଲେ, ଲୋକେ ଅନେକ କଥା କହିବେ। ଏହାର କୌଣସି ଭିତ୍ତି ନାହିଁ। କିନ୍ତୁ ସେ ତାଙ୍କର ଅସନ୍ତୋଷବ୍ୟକ୍ତ କରିଥିବା ଜଣାପଡ଼ୁଥିଲା। ୧୦ ଦିନରେ ଜଣେ ଆସି ବିଧାୟକ ହୋଇପାରୁଥିବା ବେଳେ ସେ ୧୦ ବର୍ଷ କାଳ ସବୁଦିନ ନିର୍ବାଚନ ମଣ୍ଡଳୀ ଯାଇ ହାରିଥିବାରୁ ଦୁଃଖପ୍ରକାଶ କରିଥିଲେ।