ଦୁବାଇ, ୨୯।୧୦(ପି.ଟି.)- ଚଳିତ ଇଣ୍ଡିଆନ ପ୍ରିମିୟର ଲିଗ୍ରେ ରନ୍ ଚେଜ୍ ଦିଲ୍ଲୀ କ୍ୟାପିଟାଲ୍ସ ପାଇଁ ଚିନ୍ତାଜନକ ହୋଇଛି ବୋଲି କୋଚ୍ ରିକି ପଣ୍ଟିଂ ସ୍ବିକାର କରିଛନ୍ତି। ପ୍ଲେ-ଅଫ୍ରେ ସ୍ଥାନ ପକ୍କା କରିବା ପାଇଁ ଏହା ଉପରେ ବିଶେଷ ଧ୍ୟାନ ଦେବାକୁ ପଡ଼ିବ ବୋଲି ସେ କହିଛନ୍ତି। କ୍ରମାଗତ ୩ଟି ମ୍ୟାଚ ହାରିବାପରେ ଦିଲ୍ଲୀ ଏବେ ପ୍ଲେ-ଅଫ୍ ପାଇଁ ଚାପରେ ରହିଛି। ଏହା ମଧ୍ୟରେ ୨ଟି ମ୍ୟାଚ ରନ୍ ଚେଜ୍ କରି ହାରିଛି। ” ଆମେ ଯେତେବେଳେ ପ୍ରଥମେ ଫିଲ୍ଡିଂ ନିଷ୍ପତ୍ତି ନେଉଛୁ ସେତେବେଳେ ପ୍ରତିପକ୍ଷ ଦଳ ଯେପରି ବଡ଼ ସ୍କୋର ନ କରିବ ସେଥିପ୍ରତି ନଜର ରଖିବାକୁ ହେବ। ସେଥିପାଇଁ ଆମକୁ ଭଲ ବୋଲିଂ କରିବାକୁ ପଡ଼ିବ, ଯାହାକି ଆମେ ଗତ କିଛି ମ୍ୟାଚରେ କରି ପାରିନାହୁଁ“ ବୋଲି ପଣ୍ଟିଂ କହିଛନ୍ତି। ଦିଲ୍ଲୀ ଏହାର ପରବର୍ତ୍ତୀ ୨ଟି ମ୍ୟାଚରେ ମୁମ୍ବାଇ ଇଣ୍ଡିଆନ୍ସ ଓ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋରକୁ ଭେଟିବ। ଆମେ ଶୀଘ୍ର ୭ଟି ମ୍ୟାଚ ଜିତିବାପରେ ଲଗାତର ୩ଟିରେ ପରାଜିତ ହୋଇଛୁ। ଏବେ ଆମେ ଯୋଜନାବଦ୍ଧଭାବେ ଅବଶିଷ୍ଟ ୨ଟି ମ୍ୟାଚ ଖେଳିବୁ ବୋଲି ସେ ପ୍ରକାଶ କରିଛନ୍ତି। ଥରେ ବ୍ୟାକ୍ଫୁଟ୍କୁ ଚାଲି ଯିବାପରେ ଦଳ ସଫଳ ପ୍ରତ୍ୟାବର୍ତ୍ତନ କରିପାରିନାହିଁ ବୋଲି ପଣ୍ଟିଂ ସ୍ବିକାର କରିଛନ୍ତି। ସନ୍ରାଇଜର୍ସ ହାଇଦ୍ରାବାଦ ବିପକ୍ଷ ମ୍ୟାଚରେ ୨୨୦ ରନ ଚେଜ୍ କରିବାବେଳେ ଦିଲ୍ଲୀ ମାର୍କୁସ ଷ୍ଟୋଇନିସ ଓ ଶିମରନ ହେଟମେରଙ୍କୁ ବ୍ୟାଟିଂ ଅର୍ଡରରେ ଉପରେ ପଠାଇ ଅଧିନାୟକ ଶ୍ରେୟାସ ଆୟାରଙ୍କୁ ପଛରେ ରଖିଥିଲା। ପାଓ୍ବାର ପ୍ଲେରେ ସନ୍ରାଇଜର୍ସ ସମକକ୍ଷ ୭୭ ରନ ସଂଗ୍ରହ ଆମର ଲକ୍ଷ୍ୟ ଥିଲା। ଆମେ ଶୀଘ୍ର ଉଇକେଟ ହରାଇଲେ ମଧ୍ୟ ୬୫ରୁ ୭୦ ରନ ସ୍କୋର କରିବା ଲକ୍ଷ୍ୟରେ ଏପରି ନିଷ୍ପତ୍ତି ନେଇଥିଲୁ। ଷ୍ଟୋଇନିସ ବଡ଼ ହିଟ୍ ମାରିବାର ଦକ୍ଷତା ରଖିଥିଲେ ହେଁ ନିର୍ଦ୍ଧିଷ୍ଟ ଦିବସରେ ବିଫଳ ହେଲେ। ଫଳରେ ଆମ ଯୋଜନା କାର୍ଯ୍ୟକାରୀ ହୋଇ ପାରିଲା ନାହିଁ ବୋଲି ପଣ୍ଟିଂ ପ୍ରକାଶ କରିଛନ୍ତି। ରିଦ୍ଧିମାନ ଶାହାଙ୍କ ୪୫ ବଲ୍ରୁ ୮୭ ରନ ଇନିଂସରେ ସେ ବିସ୍ମିତ ବୋଲି ପଣ୍ଟିଂ କହିଛନ୍ତି। ଆମେ ଜାଣିଥିଲୁ ଯେ ଜନି ବେୟାରଷ୍ଟୋଙ୍କ ସ୍ଥାନ କେନ୍ ଓ୍ବିଲିୟମସନ ନେଲେ ରିଦ୍ଧିମାନଙ୍କୁ ଉଇକେଟ କିପର ଭାବେ ସୁଯୋଗ ମିଳିବ। ଦୀର୍ଘଦିନପରେ ଫେରିଥିଲେ ହେଁ ରିଦ୍ଧିମାନ ସେ ଚମତ୍କାର ଖେଳିଲେ ବୋଲି ପଣ୍ଟିଂ କହିଛନ୍ତି।
