ପରଜଙ୍ଗ, ୨୫।୮(ନିଗମାନନ୍ଦ ଦଳବେହେରା): ଜନ୍ମରୁ ଗୋଟିଏ ଗୋଡ଼ ଅଚଳ। ପ୍ରମାଣପତ୍ର କହୁଛି ୫୦% ଦିବ୍ୟାଙ୍ଗ। ନିୟମ ଅନୁଯାୟୀ ଅନେକ ସରକାରୀ ଯୋଜନାର ଲାଭ ପାଇବାକୁ ଯୋଗ୍ୟ। ହେଲେ ଅଦ୍ୟାବଧି ଦୂର ହୋଇପାରିନାହିଁ ଦୁଃଖ। ଏଭଳି ସ୍ଥିତିରେ ଗୋଟିଏ ଗୋଡ଼ରେ ୧୬ ବର୍ଷ ହେଲା ଭତ୍ତା ପାଇଁ ଦୌଡ଼ ଲଗାଇଛନ୍ତି ଢେଙ୍କାନାଳ ଜିଲା ପରଜଙ୍ଗ ବ୍ଲକ କୁମୁସୀ ପଞ୍ଚାୟତ ବସନ୍ତପଡ଼ା ଗ୍ରାମର ୩୫ ବର୍ଷୀୟ ଯୁବକ ଦୁଷ୍ମନ୍ତ ବିଶ୍ୱାଳ (୩୫)। ତଥାପି ତାଙ୍କ ଭତ୍ତା ଅପେକ୍ଷାର ଅନ୍ତ ହେଉନାହିଁ।
ଅଭିଯୋଗ ଅନୁଯାୟୀ, ପିଲାଟି ଦିନରୁ ବାପାଙ୍କୁ ହରାଇଥିବା ଦୁଷ୍ମନ୍ତଙ୍କ ଗୋଟିଏ ଗୋଡ଼ ଜନ୍ମରୁ ଅଚଳ। ୨୦୦୬ରେ ତାଙ୍କୁ ପ୍ରଦାନ କରାଯାଇଛି ଭିନ୍ନକ୍ଷମ ପ୍ରମାଣପତ୍ର, ଯେଉଁଥିରେ ସେ ୫୦% ଦିବ୍ୟାଙ୍ଗ ବୋଲି ଉଲ୍ଲେଖ ରହିଛି। ଭତ୍ତା ମଞ୍ଜୁର କରିବା ଲାଗି ମା’ ପୁଅ ଦୁହେଁ ଦୀର୍ଘ ୧୬ ବର୍ଷ ଧରି ସରକାରୀ କାର୍ଯ୍ୟାଳୟ, ପ୍ରଶାସନିକ ଅଧିକାରୀଙ୍କୁ ନେହୁରା ହୋଇ ଥକି ଯାଇଥିଲେ ମଧ୍ୟ ଦାବି ପୂରଣ ହୋଇପାରିନାହିଁ। ଫଳରେ ମା’ଙ୍କୁ ମିଳୁଥିବା ବିଧବା ଭତ୍ତା ଟଙ୍କାରେ ଦୁଇ ପ୍ରାଣୀ ବଡ଼ କଷ୍ଟରେ ଚଳୁଛନ୍ତି। ଦିବ୍ୟାଙ୍ଗଙ୍କୁ ମୁଖ୍ୟସ୍ରୋତରେ ସାମିଲ କରିବା ଲାଗି ସରକାରୀସ୍ତରରେ ଏକାଧିକ ଯୋଜନା ହେଉଥିବାବେଳେ ଦୁଷ୍ମନ୍ତ ଏଥିରୁ ବଞ୍ଚତ୍ତ ହେବା ପ୍ରଶ୍ନବାଚୀ ସୃଷ୍ଟି କରିଛି।
ଏ ସଂକ୍ରାନ୍ତରେ ବିଡିଓ ମନ୍ମଥ ନାୟକ କୁହନ୍ତି, ଦୁଷ୍ମନ୍ତଙ୍କୁ ଯେଉଁ ପୁରୁଣା ପ୍ରମାଣପତ୍ର ମିଳିଛି, ତାହା ଏବେ କାମ ଦେଉନାହିଁ। ପଞ୍ଚାୟତ ନିର୍ବାହୀ ଅଧିକାରୀ ଏବଂ ଜିଆର୍ଏସ୍ଙ୍କୁ ପୂର୍ଣ୍ଣାଙ୍ଗ ତଥ୍ୟ ଦିଆଯିବା ଜରୁରୀ। ଏହାପରେ ଅଧିକାରୀମାନେ ସ୍ବାସ୍ଥ୍ୟ ବିଭାଗ ସହ ଯୋଗାଯୋଗ କରି ନୂତନ ପ୍ରମାଣପତ୍ର ଦେବା ବ୍ୟବସ୍ଥା କରିବେ। ଏହାପରେ ଦୁଷ୍ମନ୍ତଙ୍କୁ ଭତ୍ତା ପ୍ରଦାନ କରାଯିବ।
