ନୂଆଦିଲ୍ଲୀ: କରୋନା ଯୋଗୁ ଏବେ ଅଧିକାଂଶ ସମୟ ଘରେ ରହିବା ଫଳରେ ଅନେକ ବୋର୍ ହୋଇଗଲେଣି। ବାହାରକୁ କେଉଁଠିକୁ ଯାଇ ହେଉନି କି ବୁଲାବୁଲି କରି ହୋଟେଲରେ ଖିଆପିଆ କରି ହେଉନି। ତେବେ ଏମିତି ଏକ ସମୟରେ ଆପଣଙ୍କ ପାଖକୁ ଯଦି ଏକ ଷ୍ଟାର ହୋଟେଲ ଚାଲି ଚାଲି ଆସି ପହଞ୍ଚିବ ତା’ହେଲେ ନିଶ୍ଚୟ ମଜା ଲାଗିବ।
କଥାଟା ଶୁଣିବା ପାଇଁ ହୁଏତ ଅଡୁଆ ଲାଗିପାରେ। କିନ୍ତୁ ଗୁଡଗାଓଁର ସୋହନା ରୋଡ୍ ରେଡିଶନ୍ ହୋଟେଲ ପକ୍ଷରୁ ଏବେ ଲୋକଙ୍କୁ ଏପରି ସୁବିଧା ଦିଆଯାଉଛି। ଏହି ହୋଟେଲଟି ଏବେ ଏପରି ଏକ ଚାଲୁଥିବା ହୋଟେଲ ତିଆରି କରିଛି, ଯେଉଁଥିରେ ଆପଣ ପଞ୍ଚତାରକା ହୋଟେଲର ସମସ୍ତ ସୁବିଧା ପାଇପାରିବେ। ଅର୍ଥାତ୍ ହୋଟେଲ ପକ୍ଷରୁ ଏକ ବସ୍ରେ ପଞ୍ଚତାରକା ହୋଟେଲର ସମସ୍ତ ସୁବିଧା ଉପଲବ୍ଧ ହେଉଛି। ଅବଶ୍ୟ ଏଭଳି ସୁବିଧା ପାଇବା ପାଇଁ ଆପଣଙ୍କୁ ସେଇଭଳି ମୋଟା ଅଙ୍କର ଅର୍ଥ ତ ଖର୍ଚ୍ଚ କରିବାକୁ ପଡ଼ିବ। ଏହି ପଞ୍ଚତାରକା ହୋଟେଲର ନାଁ ରହିଛି ‘ଲବ୍ଜ ହ୍ବିଲ୍ସ’। ବସ୍ରେ ତିଆରି ଏହି ହୋଟେଲରେ ଆପଣ ପୂରା ପରିବାର ସହିତ ଡେ ଟ୍ରିପ୍ କିମ୍ବା ନାଇଟ୍ ଟ୍ରିପରେ ଯେକୌଣସି ସ୍ଥାନକୁ ଯାଇପାରିବେ। ଏଥିପାଇଁ ଆଗରୁ ବୁକ୍ କରିବାକୁ ପଡ଼ିବ। ଏହି ହୋଟେଲରେ ୫ଜଣଙ୍କ ପାଇଁ ରହିବା ତଥା ଖାଇବା ପିଇବାର ବ୍ୟବସ୍ଥା କରାଯାଇଛି। ତେଣୁ ପରିବାର ସହିତ ଏଥିରେ ଫାଇଭ୍ଷ୍ଟାର ଲଗ୍ଜୁରି ହୋଟେଲର ମଜା ଉଠାଇପାରିବେ।
ଏହି ବସ୍ ହୋଟେଲ ଭିତରେ ଆପଣ ଅର୍ଡର କରିବାର ମାତ୍ର କେଇ ମିନିଟ୍ ମଧ୍ୟରେ ଖାଦ୍ୟ ପରଷି ଦିଆଯିବ। ଆପଣଙ୍କ ପଛେ ପଛେ ରୋଷେଇ କରିବା ପାଇଁ ଏବଂ ଖାଦ୍ୟ ପରଷିବା ଲାଗି ଏକ ଟିମ୍ ଆପଣଙ୍କ ପଛେ ପଛେ ଯିବ। ଏହା ଭିତରେ ଯିବା ସମୟରେ ରାସ୍ତାର ଦୁଇ ପାଖର ଦୃଶ୍ୟ ଉପଭୋଗ କରିହେବ। ଏହି ବସ୍ର ସିଟ୍କୁ ଦାବିବା ମାତ୍ରେ କିଛି ସମୟ ମଧ୍ୟରେ ଏହା ଏକ ବେଡ୍ରେ ପରିଣତ ହୋଇଯିବ। ଏହା ସହିତ ମନୋରଞ୍ଜନ ନିମନ୍ତେ ଏଥିରେ ଦୁଇଟି ସ୍ମାର୍ଟ ଏଲ୍ଇଡି ଟିଭି ଲଗାଯାଇଛି। ବସ୍ରେ ସେଣ୍ଟ୍ରାଲାଇଜ୍ ଏସି ସହିତ ମାଇକ୍ରୋୱେଭ୍, ଫ୍ରିଜ୍ ଏବଂ ଚା କଫି ତିଆରି କରିବା ପାଇଁ ମେଶିନ୍ ମଧ୍ୟ ରହିଛି। ସେହିପରି ଆଧୁନିକ ସୁବିଧା ଥିବା ବାଥରୁମ୍ ଓ ଟଏଲେଟ୍ ମଧ୍ୟ ଏଥିରେ ରହିଛି। ତେବେ କରୋନା ଭାଇରସ୍କୁ ଦୃଷ୍ଟିରେ ରଖି ଏଥିରେ ସାନିଟାଇଜେସନ୍ ତଥା ପରିଷ୍କାର ପରିଚ୍ଛନ୍ନତା ପ୍ରତି ମଧ୍ୟ ବିଶେଷ ଦୃଷ୍ଟି ଦିଆଯାଇଛି।