ଗାନ୍ଧିନଗର,୧୪।୯: ପୂର୍ବତନ ମୁଖ୍ୟମନ୍ତ୍ରୀ ବିଜୟ ରୂପାନୀଙ୍କ ଝିଅ ରାଧିକା ତାଙ୍କ ଫେସବୁକ ପୃଷ୍ଠାରେ ଏକ ଭାବପ୍ରବଣ ପୋଷ୍ଟ ଲେଖି ତାଙ୍କ ବାପାଙ୍କ ସଂଘର୍ଷ ବିଷୟରେ ବର୍ଣ୍ଣନା କରିଛନ୍ତି। ଯେଉଁମାନେ ତାଙ୍କ ବାପାଙ୍କ କୋମଳ କଥିତ ଭାବମୂର୍ତ୍ତିକୁ ତାଙ୍କ ବିଫଳତାର କାରଣ ବୋଲି ଦାୟୀ କରିଛନ୍ତି ଏହି ପୋଷ୍ଟ ଜରିଆରେ ରାଧିକା ସେମାନଙ୍କୁ ଉପଯୁକ୍ତ ଜବାବ ଦେଇଛନ୍ତି। ସେମାନଙ୍କ ପାଇଁ ରାଧିକା ଲେଖିଛନ୍ତି ଯେ, ରାଜନେତାମାନଙ୍କ ମଧ୍ୟରେ ସମ୍ବେଦନଶୀଳତା ରହିବା ଉଚିତ୍ ନୁହେଁ କି? ଏହା ଏକ ଅତ୍ୟାବଶ୍ୟକ ଗୁଣ ନୁହେଁ କି ଯାହା ଜଣେ ନେତାଙ୍କ ମଧ୍ୟରେ ଆବଶ୍ୟକ? ନେତାମାନେ ସେମାନଙ୍କର ନରମ କଥାବାର୍ତ୍ତା ମାଧ୍ୟମରେ ଲୋକମାନଙ୍କୁ ସେବା କରନ୍ତି ନାହିଁ?
ରାଧିକା ଲେଖିଛନ୍ତି ଯେ ମୋ ପିତାଙ୍କ ସଂଘର୍ଷ ୧୯୭୯ ମସିହାରେ ଆରମ୍ଭ ହୋଇଥିଲା। ସେହି ସମୟରେ ସେ ମୋରବୀ ବନ୍ୟା, ଆମରେଲି ବାଦଲ ଫଟା ଘଟଣା, କୁଚ ଭୂକମ୍ପ, ସ୍ବାମୀନାରାୟଣ ମନ୍ଦିର, ଆତଙ୍କବାଦୀ ଆକ୍ରମଣ, ଗୋଧରା ଘଟଣା, ବନାସାକାଣ୍ଠା ବନ୍ୟା ସମୟରେ ନିଜ ଜୀବନକୁ ବିପଦରେ ପକାଇ ଲୋକଙ୍କ ସେବା କରିଥିଲେ। କେବଳ ଏତିକି ନୁହେଁ, ମୋ ବାପା ତାଉକ୍ତେ ବାତ୍ୟା ଏବଂ କୋଭିଡ ସମୟରେ ମଧ୍ୟ ଲାଗାତର କାମ କରୁଥିଲେ।୨୦୦୨ ମସିହାରେ ସ୍ବାମୀ ନାରାୟଣ ଅକ୍ଷୟଧାମ ମନ୍ଦିର ଉପରେ ହୋଇଥିବା ଆତଙ୍କବାଦୀ ଆକ୍ରମଣରେ ମୋ ବାପା ପ୍ରଥମ ବ୍ୟକ୍ତି ଥିଲେ, ସେ ନରେନ୍ଦ୍ର ମୋଦିଙ୍କ ପୂର୍ବରୁ ମଧ୍ୟ ମନ୍ଦିର ପରିସରରେ ପହଞ୍ଚିଥିଲେ। ୨୦୦୧ରେ ହୋଇଥିବା ଭୂକମ୍ପ ସମୟରେ ବାପା ଉଦ୍ଧାର ଓ ଥଇଥାନ କାର୍ଯ୍ୟ କରୁଥିଲେ ଏବଂ ଭୂକମ୍ପ ବୁଝିବା ପାଇଁ ତାଙ୍କୁ ଏବଂ ତାଙ୍କ ଭାଇ ରିଷଭଙ୍କୁ କୁଚକୁ ନେଇଥିଲେ। ରାଧିକା ଆହୁରି ଲେଖିଛନ୍ତି ଯେ ଯେତେବେଳେ ଆମେ ପିଲା ଥିଲୁ, ମୋ ବାପା ରବିବାର ଆମକୁ ଚଳଚ୍ଚିତ୍ର ପ୍ରେକ୍ଷାଳୟକୁ ନେଉ ନ ଥିଲେ ବରଂ ସେ ଭାଜପା କର୍ମୀଙ୍କ ଘରକୁ ବୁଲାଇବାକୁ ନେଉଥିଲେ।
ରାଧିକା କହିଛନ୍ତି ଯେ ଘରେ ଆମେ ସବୁବେଳେ ଆଲୋଚନା କରୁ, ମୋ ବାପାଙ୍କ ପରି ଜଣେ ସାଧାରଣ ବ୍ୟକ୍ତି ଭାରତୀୟ ରାଜନୀତିରେ ବଞ୍ଚିବେ କି ଯେଉଁଠାରେ ଦୁର୍ନୀତି ଏବଂ ନକାରାତ୍ମକତା ଅଧିକ ରହିଛି। ମୋ ବାପା ସର୍ବଦା କହୁଥିଲେ ଯେ, ରାଜନୀତି ଏବଂ ରାଜନେତାଙ୍କ ଭାବମୂର୍ତ୍ତି ଭାରତୀୟ ଚଳଚ୍ଚିତ୍ର ଏବଂ ପୁରୁଣା ଧାରଣା ଦ୍ୱାରା ପ୍ରଭାବିତ ହୋଇଥାଏ ଏବଂ ଆମକୁ ଏହାକୁ ପରିବର୍ତ୍ତନ କରିବାକୁ ପଡିବ। ସେ କଦାପି ଦଳବାଦକୁ ସମର୍ଥନ କରି ନ ଥିଲେ ଏବଂ ତାହା ତାଙ୍କର ବିଶେଷତା ଥିଲା। କେତେକ ରାଜନୈତିକ ବିଶ୍ଳେଷକ ଭାବୁଥିବେ ଯେ – ‘ଏହା ହେଉଛି ବିଜୟଭାଇଙ୍କ କାର୍ଯ୍ୟକାଳର ସମାପ୍ତି’ – କିନ୍ତୁ ଆମ ମତରେ ଝଗଡା ପରିବର୍ତ୍ତେ ଆରଏସଏସ ଏବଂ ଭାଜପାର ନୀତି ଅନୁଯାୟୀ ଲୋଭ ବିନା କ୍ଷମତାକୁ ଛାଡିବା ଭଲ ବୋଲି ସେ କହିଛନ୍ତି।
ସୂଚନାଯୋଗ୍ୟ, ବିଜୟ ରୂପାନୀଙ୍କୁ ଗୁଜରାଟ ମୁଖ୍ୟମନ୍ତ୍ରୀ ପଦରୁ ହଟାଯାଇ, ଭୂପେନ୍ଦ୍ର ପଟେଙ୍କୁଙ୍କୁ ମୁଖ୍ୟମନ୍ତ୍ରୀ କରାଯାଇଛି।