ଥୁଆମୂଳ ରାମପୁର,୨୦ା୩ (ଦୁର୍ଗା କୀର୍ତ୍ତି): ସରକାର ଗ୍ରାମାଞ୍ଚଳର ସାଧାରଣ ଲୋକଙ୍କ ଆମୋଦପ୍ରମୋଦ ପାଇଁ ବ୍ଲକ ତଥା ଗ୍ରାମ ପଞ୍ଚାୟତ ମୁଖ୍ୟାଳୟରେ ଗ୍ରାମୀଣ ଉଦ୍ୟାନ ନାମରେ ଯୋଜନା ପ୍ରସ୍ତୁତ କରିଛନ୍ତି। ହେଲେ କଳାହାଣ୍ଡି ଜିଲା ଥୁଆମୂଳ ରାମପୁର ପଞ୍ଚାୟତରେ ଏହି ଯୋଜନା ବାଟବଣା ହୋଇଛି। ସଦର ମହକୁମା ମୁଖ୍ୟ ରାସ୍ତାକଡ଼ ପୋଲିସ ଷ୍ଟେଶନ ନିକଟରେ ନିର୍ମିତ ଏହି ଉଦ୍ୟାନ ଏବେ ଗୋରୁଙ୍କ ଚୋରାଭୂଇଁ ପାଲଟି ମରୁଭୂମିରେ ପରିଣତ ହୋଇଛି। ୨୦୨୦-୨୧ ଆର୍ଥିକବର୍ଷରେ ୫ଲକ୍ଷ ଓ ଏମ୍ଜିଏନ୍ଆର୍ଇଜିଏସ୍ରେ ୧୦ ଲକ୍ଷ ଟଙ୍କା ଅନୁଦାନରେ ଏକ ଗ୍ରାମୀଣ ଉଦ୍ୟାନ ନିର୍ମାଣ ପାଇଁ ଲକ୍ଷ୍ୟ ଧାର୍ଯ୍ୟ କରି ରାଜରାଜୁଡ଼ା ଅମଳର ଦୁଇ ପୋଖରୀ କଡରେ କାମ ଆରମ୍ଭ ହୋଇଥିଲା। ହେଲେ ଏହାର ୩ମାସ ନ ପୂରୁଣୁ ଲଗାଯାଇଥିବା ଗଛଗୁଡ଼ିକ ମରି ନଷ୍ଟ ହୋଇ ଏବେ ଅନାବନା ଗଛଲତାରେ ପରିପୂର୍ଣ୍ଣ ହୋଇଛି। ଏପରି କି ଗତ କିଛିବର୍ଷ ହେବ ବନମହୋତ୍ସବ ପାଳନ ଅବସରରେ ଏଠାରେ ବିଭିନ୍ନ ପ୍ରକାର ଚାରା ରୋପଣ କରାଯାଇଥିଲେ ମଧ୍ୟ ତାହା ମୃତ ଅବସ୍ଥାରେ। ବିଭାଗୀୟ ଅଧିକାରୀଙ୍କ ତଦାରଖ ଅଭାବ ସହ ଠିକାଦାରଙ୍କ ମନମୁଖି କାମ ପାଇଁ ଏହି ଯୋଜନା ଦିଗହରା ହୋଇପଡିଛି। ତୁରନ୍ତ ଏହାର ତଦନ୍ତ କରି ପଦକ୍ଷେପ ନେବା ପାଇଁ ସାଧାରଣରେ ଦାବି ହେଉଛି। ଏ ସମ୍ପର୍କରେ ବିଡ଼ିଓ ଧ୍ରୁବ ଚରଣ ମୁଦୁଲିଙ୍କୁ ଯୋଗାଯୋଗ କରିଥିଲେ ମଧ୍ୟ ସେ ଛୁଟିରେ ଥିବାରୁ କୌଣସି ପ୍ରତିକ୍ରିୟା ମିଲିପାରି ନାହିଁ। ପଞ୍ଚାୟତ ନିର୍ବାହୀ ଅଧିକାରୀ ଟଙ୍କଧର ସାହୁଙ୍କୁ ପଚାରିବାରୁ ଏହା ପୂର୍ବ ଅଧିକାରୀଙ୍କ ସମୟର କାମ, ମୋ ପାଖରେ କୌଣସି ତଥ୍ୟ ନାହିଁ, ଏହି ଯୋଜନାର ଆଗାମୀ ଦିନରେ ପୁଣି କାମ ହେବ ବୋଲି କହିଥିଲେ। ସ୍ଥାନୀୟ ସରପଞ୍ଚ ବିଜୟା ମାଝୀଙ୍କୁ ପଚାରିବାରୁ ପୂର୍ବ ସରପଞ୍ଚଙ୍କ ସମୟରେ ହୋଇଥିବାରୁ ଏ ବିଷୟରେ କହିପାରିବି ନାହିଁ। ବର୍ତ୍ତମାନ ଅନ୍ୟ କୌଣସି ପାଣ୍ଠିରୁ ଅର୍ଥ ମଞ୍ଜୁର କରି କାମ କରାଯିବ ବୋଲି ଉତ୍ତର ରଖିଛନ୍ତି l
