ମସ୍କୋ,୨୮।୨: ଲଗାତର ପଞ୍ଚମ ଦିନରେ ରୁଷିଆ ସୈନ୍ୟମାନେ ୟୁକ୍ରେନ ଉପରେ ଆକ୍ରମଣ ଜାରି ରଖିଛନ୍ତିି। ଇତିମଧ୍ୟରେ ୟୁରୋପୀୟ ଦେଶଗୁଡିକ ନେଇଥିବା ନିଷ୍ପତ୍ତି ଉପରେ ରୁଷିଆ ଏବେ ପ୍ରତିଶୋଧପରାୟଣ ହୋଇଯାଇଛି। ବ୍ରିଟେନ ଓ ଜର୍ମାନୀ ସମେତ ୩୬ଟି ଦେଶ ପାଇଁ ମସ୍କୋ ନିଜର ଏୟାର ସ୍ପେସ୍କୁ ବନ୍ଦ କରିଦେଇଥିବା ଜଣାପଡ଼ିଛି। ସୂଚନା ମୁତାବକ ଏହି ଦେଶଗୁଡ଼ିକ ରୁଷିଆ ଉପରେ ଅନେକ ପ୍ରକାରର ପ୍ରତିବନ୍ଧକ ଲଗାଇଛନ୍ତି। ୟୁରୋପୀୟ ସଂଘ ରୁଷିଆ ଏୟାରଲାଇନ୍ସ ପାଇଁ ନିଜର ବିମାନ ବନ୍ଦରକୁ ବନ୍ଦ କରିବାକୁ ସହମତି ପ୍ରକାଶ କରିଥିଲା। ଯାହାଫଳରେ ରୁଷିଆ ବୈଦେଶିକ ମନ୍ତ୍ରୀ ସର୍ଗେଇ ଭିକ୍ଟୋରୋଭିଚ୍ ଲାଭରୋଭଙ୍କୁ ନିଜର ଜେନେଭା ଗସ୍ତକୁ ବାତିଲ କରିବାକୁ ପଡ଼ିଥିଲା। ଜାତିସଂଘର ଏକ ବୈଠକରେ ଲାଭରୋଭଙ୍କ ଯୋଗଦେବାର କାର୍ଯ୍ୟକ୍ରମ ରହିଥିଲା।
