ମସ୍କୋ,୧୦।୧୦ : ରୁଷିଆ-କ୍ରିମିୟାକୁ ସଂଯୋଗ କରୁଥିବା କର୍ଚ ରେଳ-ରୋଡ ବ୍ରିଜ ବିସ୍ଫୋରଣକୁ ନେଇ ରାଷ୍ଟ୍ରପତି ଭ୍ଲାଦିମିର ପୁଟିନ ଅନୁସନ୍ଧାନକାରୀ ଦଳଙ୍କ ସହ ଏକ ବୈଠକ କରିଛନ୍ତି। ପୁଟିନ ଏହି ଆକ୍ରମଣର ସମସ୍ତ ଗୁରୁତ୍ୱପୂର୍ଣ୍ଣ ବିଷୟ ଉପରେ ଅନୁସନ୍ଧାନ କମିଟିର ଅଧ୍ୟକ୍ଷ ଆଲେକ୍ସଜାଣ୍ଡାର୍ ବସ୍ତ୍ରିକିନଙ୍କ ସହ ଆଲୋଚନା କରିଛନ୍ତି। ପୁଟିନ କହିଛନ୍ତି ଯେ ବ୍ରିଜକୁ ବିସ୍ଫୋରଣ କରିବା ଏକ ଆତଙ୍କବାଦୀ ଆକ୍ରମଣ ସଦୃଶ।
ୟୁକ୍ରେନର ଗୁପ୍ତଚର ସଂଗଠନ ପୁରା ବ୍ଲୁପ୍ରିଣ୍ଟ ପ୍ରସ୍ତୁତ କରି ଏହି ଘଟଣା ଘଟାଯାଇଥିବା ସେ ଅଭିଯୋଗ କରିବା ସହିତ ଏଥି ପାଇଁ ୟୁକ୍ରେନ୍କୁ ଦାୟୀ କରିଛନ୍ତି। ପୁଟିନ କହିଛନ୍ତି ଯେ ଏଭଳି ଆତଙ୍କବାଦୀ ଆକ୍ରମଣ ମାଧ୍ୟମରେ ଗୁରୁତ୍ୱପୂର୍ଣ୍ଣ ନାଗରିକ ଭିତ୍ତିଭୂମି ନଷ୍ଟ କରିବାକୁ ଲକ୍ଷ୍ୟ ରଖାଯାଇଛି।
ପୁଟିନ କ୍ରିମିୟା ନିକଟରେ ଥିବା କର୍ଚ ବ୍ରିଜ ଏବଂ ଶକ୍ତି ଭିତ୍ତିଭୂମି ପାଇଁ ସୁରକ୍ଷାକୁ କଡାକଡି କରିଛନ୍ତି। ଏହାର ତଦାରଖ ଦାୟିତ୍ୱ ସୁରକ୍ଷା ସେବା ବାହିନୀଙ୍କୁ ଦିଆଯାଇଛି। କ୍ରିମିୟା ରୁଷିଆ ସହ ସଂଯୋଗ କରୁଥିବା ଗ୍ୟାସ ପାଇପଲାଇନ ସୁରକ୍ଷିତ ରଖିବାକୁ ପୁଟିନ ନିର୍ଦ୍ଦେଶ ଦେଇଛନ୍ତି।
କ୍ରିମିୟା ଗଭର୍ନର ସର୍ଗେଇ ଆକ୍ସିଓନୋଭ କହିଛନ୍ତି ଯେ ବ୍ରିଜ ଉପରେ ଟ୍ରେନର ଚଳାଚଳ ଆରମ୍ଭ ହୋଇଛି। ଦୁଇଟି ଯାତ୍ରୀବାହୀ ଟ୍ରେନ ଇତିମଧ୍ୟରେ ଗନ୍ତବ୍ୟ ପଥରେ ଯାଇଛି। ଏହି ବ୍ରିଜ୍ ଶୀଘ୍ର ମରାମତି ହୋଇ ସମସ୍ତ ଯାନ ପାଇଁ ଖୋଲାଯିବ।
