ମସ୍କୋ,୨୧ା୪: ଦୀର୍ଘ ୧୪ ମାସ ଧରି ୟୁକ୍ରେନ୍ ଉପରେ ଆକ୍ରମଣ ଜାରି ରଖିଥିବା ରୁଷିଆ ଭୁଲ୍ବଶତଃ ନିଜ ସହର ବେଲଗୋରୋଡ୍କୁ ଟାର୍ଗେଟ କରିଛି। ରୁଷିଆର ଏକ ଏସ୍ୟୁ-୩୪ ଯୁଦ୍ଧବିମାନ ଶୁକ୍ରବାର ଆକସ୍ମିକ ଭାବେ ଏହି ସୀମାନ୍ତ ସହରରେ ବୋମା ନିକ୍ଷେପ କରିଛି। ଶକ୍ତିଶାଳୀ ବିସ୍ଫୋରଣରେ କେତେଜଣ ଆହତ ହୋଇଥିବାବେଳେ ସ୍ଥାନୀୟ ଲୋକେ ଆତଙ୍କିତ ହୋଇଯାଇଛନ୍ତି।
ରୁଷିଆ-ୟୁକ୍ରେନ୍ ସୀମାରୁ ପ୍ରାୟ ୪୦ କି.ମି. ଦୂରରେ ଅବସ୍ଥିତ ବେଲଗୋରୋଡ୍ର ଜନସଂଖ୍ୟା ୩,୪୦,୦୦୦। ୨୦୨୨ ଫେବୃୟାରୀ ୨୪ରେ ୟୁକ୍ରେନ୍ ଉପରେ ରୁଷିଆର ଆକ୍ରମଣ ପରଠୁ ଏହି ସହରରେ ଅନେକ ଥର ଡ୍ରୋନ୍ ଆକ୍ରମଣ ହୋଇଛି। ଗୁରୁବାର ରାତିରେ ହୋଇଥିବା ବିସ୍ଫୋରଣ ପୂର୍ବର ସବୁ ବିସ୍ଫୋରଣଠାରୁ ଅଧିକ ଶକ୍ତିଶାଳୀ ଥିଲା। ଏଥିରେ ଅନେକ କୋଠା ଓ ଯାନବାହନ ଭାଙ୍ଗିଯାଇଛି। ଏକ ସ୍ଥାନରେ ୨୦ ମିଟର ଓସାର ଫାଟ ସୃଷ୍ଟି ହୋଇଛି। ରୁଷୀୟ ଅଧିକାରୀମାନେ ଏହି ଏୟାରଷ୍ଟ୍ରାଇକ୍ ପାଇଁ ୟୁକ୍ରେନୀୟ ସେନାକୁ ଦାୟୀ କରିଆସିଥିବାବେଳେ ସଦ୍ୟ ଏୟାର ଷ୍ଟ୍ରାଇକ୍ ନିଜ ଭୁଲ୍ ଯୋଗୁ ହୋଇଥିବା ସ୍ବୀକାର କରିଛନ୍ତି। ସାମରିକ ବିଶେଷଜ୍ଞଙ୍କ ମତରେ ନିକ୍ଷେପ ହୋଇଥିବା ବୋମାର ଓଜନ ୫୦୦ କେ.ଜି.।
