ଓ୍ବାଶିଂଟନ/ମସ୍କୋ/ବେଜିଂ,୩।୩ : ୟୁକ୍ରେନ୍ ଉପରେ କେବେ ଆକ୍ରମଣ କରାଯିବ ତାହା ଚାଇନା ଏବଂ ରୁଷିଆ ପୂର୍ବରୁ ସ୍ଥିର କରିଥିବା ଆମେରିକା ପକ୍ଷରୁ ଅଭିଯୋଗ ହୋଇଛି। ଚାଇନାରେ ଶୀତକାଳୀନ ଅଲିମ୍ପିକ୍ସ୍ ପରେ ଆକ୍ରମଣ କରିବା ଲାଗି ଯୋଜନା ପ୍ରସ୍ତୁତ ହୋଇଥିବା ଆମେରିକା ଗୁପ୍ତଚର ସଂସ୍ଥା ପକ୍ଷରୁ କୁହାଯାଇଛି।
ବହୁ ପୂର୍ବରୁ ରୁଷିଆ ୟୁକ୍ରେନ ଉପରେ ଆକ୍ରମଣ କରିବାକୁ ଯାଉଥିଲା, କିନ୍ତୁ ବେଜିଂରେ ଶୀତକାଳୀନ ଅଲିମ୍ପିକ୍ସ ପରେ ଚାଇନା ଆକ୍ରମଣ କରିବାକୁ ପ୍ରବର୍ତ୍ତାଇଥିଲା। ରୁଷିଆ ଘନିଷ୍ଠ ବନ୍ଧୁ ଚାଇନାର ପରାମର୍ଶକୁ ମାନି କରି ଆକ୍ରମଣ ଘୁଞ୍ଚାଇ ଦେଇଥିଲା ବୋଲି ଆମେରିକା କହିଛି। ରୁଷିଆ ରାଷ୍ଟ୍ରପତି ବ୍ଲାଡିମୀର ପୁଟିନ୍ ଏବଂ ଚାଇନା ପ୍ରତିପକ୍ଷ ଶି ଜିନ୍ପିଙ୍ଗ୍ଙ୍କ ମଧ୍ୟରେ ଏନେଇ ବୁଝାମଣା ହୋଇଥିବା ଆମେରିକା ପକ୍ଷରୁ ଅଭିଯୋଗ ଅଣାଯାଇଛି।
ଶୀତକାଳୀନ ଅଲିମ୍ପିକ୍ସ ଶେଷ ହେବା ପୂର୍ବରୁ ଆକ୍ରମଣ ନକରିବାକୁ ଫେବୃଆରୀ ପ୍ରାରମ୍ଭରେ ଚାଇନାର ବରିଷ୍ଠ ଅଧିକାରୀମାନେ ରୁଷିଆ ନେତାମାନଙ୍କୁ କହିଥିଲେ। ନ୍ୟୁୟର୍କ ଟାଇମ୍ସ ଏହାର ରିପୋର୍ଟରେ ଏହା ଦାବି କରିଛି। ଏହି ରିପୋର୍ଟରେ ଆମେରିକା ଜୋ ବାଇଡେନ୍ ପ୍ରଶାସନର ଅଧିକାରୀ ଏବଂ ପାଶ୍ଚାତ୍ୟ ଗୁପ୍ତଚରଙ୍କ ରିପୋର୍ଟ ସମ୍ପର୍କରେ ଉଲ୍ଲେଖ କରାଯାଇଛି।
ରିପୋର୍ଟ ଅନୁଯାୟୀ, ୟୁକ୍ରେନ ଉପରେ ଆକ୍ରମଣ ଯୋଜନା ବିଷୟରେ ଚାଇନାର ବରିଷ୍ଠ ଅଧିକାରୀମାନେ ଅବଗତ ଥିଲେ। ଆକ୍ରମଣ ଯୋଜନା ସମ୍ପର୍କରେ ପୁଟିନ ଜିନପିଙ୍ଗଙ୍କୁ ମଧ୍ୟ ସୂଚନା ଦେଇଥିବା ଅଭିଯୋଗ ଅଣାଯାଇଛି।
ଅପରପକ୍ଷରେ ୱାଶିଂଟନରେ ଥିବା ଚାଇନା ଦୂତାବାସର ମୁଖପାତ୍ର ଲିୟୁ ପେଙ୍ଗୁ ଏହି ରିପୋର୍ଟକୁ ଅସ୍ବୀକାର କରିଛନ୍ତି। ଏହା ଭିତ୍ତିହୀନ କଳ୍ପନାଜଳ୍ପନା ବୋଲି ସେ କହିଛନ୍ତି। ଆମେରିକାର ବୈଦେଶିକ ବିଭାଗ ଏବଂ ଗୁପ୍ତଚର ଏଜେନ୍ସି ସିଆଇଏ ଏପର୍ଯ୍ୟନ୍ତ ଏହି ରିପୋର୍ଟ ଉପରେ କୌଣସି ମନ୍ତବ୍ୟ ଦେଇନାହିଁ।