ମସ୍କୋ,୨୬।୩ : ଆମେରିକା ସମେତ ଅନେକ ନାଟୋ ଦେଶ ରୁଷିଆ ଏବଂ ଚାଇନା ମଧ୍ୟରେ ବଢୁଥିବା ବନ୍ଧୁତାକୁ ନେଇ ଚିନ୍ତିତ ଅଛନ୍ତି। ତେବେ ରୁଷିଆ ଏବଂ ଚାଇନା ମଧ୍ୟରେ କୌଣସି ସାମରିକ ମେଣ୍ଟ ଗଠନ କରାଯାଉ ନାହିଁ ବୋଲି ସୂଚନା ସାମ୍ନାକୁ ଆସିଛି।
ରବିବାର ନ୍ୟୁଜ ଏଜେନ୍ସିକୁ ଦେଇଥିବା ଏକ ସାକ୍ଷାତକାରରେ ରୁଷିଆର ରାଷ୍ଟ୍ରପତି ଭ୍ଲାଦିମିର ପୁଟିନ କହିଛନ୍ତି ଯେ ଆମେ ମିଳିତ ସାମରିକ ମେଣ୍ଟ ଗଠନ କରୁନାହୁଁ। ସାମରିକ ସହଯୋଗ ଦୃଷ୍ଟିରୁ କିଛି ଲୁଚାଯାଉ ନାହିଁ।
ତେବେ ନାଟୋ ସଦସ୍ୟ ଦେଶଙ୍କ ଚିନ୍ତାକୁ ଦୃଷ୍ଟିରେ ରଖି ପୁଟିନ କହିଛନ୍ତି ଆମେ କିଛି ମଧ୍ୟ ଲୁଚା ଛପାରେ କରୁ ନାହୁଁ। ସବୁକିଛି ସ୍ବଚ୍ଛ, କିଛି ଗୁପ୍ତ ରଖାଯାଇ ନାହିଁ।
ଅପରପକ୍ଷରେ ପାଶ୍ଚାତ୍ୟ ଶକ୍ତିମାନେ ଅଧିକ ବିଶ୍ୱସ୍ତରୀୟ ମିଳିତ ମଞ୍ଚ ଗଠନ କରିବାକୁ ଚେଷ୍ଟା କରୁଛନ୍ତି। ଏଥି ସହିତ, ସେ ଆମେରିକା,ଜର୍ମାନୀ, ଇଟାଲୀ ଏବଂ ଜାପାନ ମିଳିତ ଭାବେ କିଛି ଯୋଜନା କରୁଥିବା ଅଭିଯୋଗ କରିଛନ୍ତି।
ନିକଟରେ ଭ୍ଲାଦିମିର ପୁଟିନ ଏବଂ ଚାଇନା ରାଷ୍ଟ୍ରପତି ଶି ଜିନପିଙ୍ଗ ପରସ୍ପରକୁ କ୍ରେମଲିନରେ ଭେଟିଥିଲେ। ଏହି ସମୟରେ ଦୁଇଜଣ ପରସ୍ପରକୁ ପ୍ରିୟ ବନ୍ଧୁ ଭାବରେ ଅଭିବାଦନ ଜଣାଇବା ସହ ୟୁକ୍ରେନ ବିବାଦର ସମାଧାନ ପାଇଁ ଚାଇନାର ପ୍ରସ୍ତାବ ଉପରେ ଆଲୋଚନା କରିଥିଲେ।