ନୂଆଦିଲ୍ଲୀ,୧୮।୪ : ମଙ୍ଗଳବାର ବହିର୍ବ୍ୟାପାର ମନ୍ତ୍ରୀ ଏସ ଜୟଶଙ୍କର ଦିଲ୍ଲୀରେ ରୁଷିଆର ଉପପ୍ରଧାନମନ୍ତ୍ରୀ ଡେନିସ ମଣ୍ଟୁରୋଭଙ୍କୁ ଭେଟିଛନ୍ତି। ଭାରତ ସହିତ ମୁକ୍ତ ବାଣିଜ୍ୟ କରିବାକୁ ରୁଷିଆ ଆଗ୍ରହୀ ବୋଲି ସେ କହିଛନ୍ତି। ମଣ୍ଟୁରୋଭ ରୁଷିଆର ଶିଳ୍ପ ଏବଂ ବାଣିଜ୍ୟ ମନ୍ତ୍ରୀ ଭାବେ ମଧ୍ୟ କାର୍ଯ୍ୟ କରୁଛନ୍ତି।
ରୁଷିଆ-ଭାରତ ବ୍ୟବସାୟ ସଂଳାପକୁ ସମ୍ବୋଧିତ କରି ମଣ୍ଟୁରୋଭ କହିଛନ୍ତି, ଭାରତ ସହ ମୁକ୍ତ ବାଣିଜ୍ୟ ଚୁକ୍ତି କରିବାକୁ ୟୁରୋସିଆ ଅର୍ଥନୈତିକ ଆୟୋଗ ସହିତ ଉଭୟ ଦେଶ ଆଲୋଚନା କରୁଛନ୍ତି। ରୁଷିଆ ମଧ୍ୟ ଭାରତ ସହିତ ବାଣିଜ୍ୟ ବୃଦ୍ଧି କରିବାକୁ ଚେଷ୍ଟା କରୁଛି। ଇଣ୍ଡିଆନ ଚାମ୍ବର ଅଫ କମର୍ସ ଏବଂ ରୁଷିଆ ଇଣ୍ଡିଆ ବ୍ୟବସାୟ ପରିଷଦ ଦ୍ୱାରା ଆୟୋଜିତ ଏକ କାର୍ଯ୍ୟକ୍ରମରେ ମଣ୍ଟୁରୋଭ କହିଛନ୍ତି, ଆମେ ଦୁଇ ଦେଶ ମଧ୍ୟରେ ଦ୍ୱିପାକ୍ଷିକ ଚୁକ୍ତିନାମା ସ୍ବାକ୍ଷର କରିବାକୁ ଚେଷ୍ଟା କରୁଛୁ ଯାହା ଦ୍ୱାରା ନିବେଶକମାନେ ସୁରକ୍ଷିତ ହୋଇପାରିବେ।
ଭାରତ ଏବଂ ରୁଷିଆ ମଧ୍ୟ ବିମାନ ସେବା ବୃଦ୍ଧି ଉପରେ ଧ୍ୟାନ ଦେଉଛନ୍ତି ଯାହାଦ୍ୱାରା ଦୁଇ ଦେଶ ମଧ୍ୟରେ ବାଣିଜ୍ୟ ଏବଂ ପର୍ଯ୍ୟଟନ ବିକଶିତ ହୋଇପାରିବ। ସେ କହିଛନ୍ତି ଯେ କରୋନା କାରଣରୁ ଲଜିଷ୍ଟିକ୍ସ ପ୍ରଭାବିତ ହୋଇଛି ଏବଂ ପଶ୍ଚିମ ଦେଶମାନଙ୍କ ଦ୍ୱାରା ରୁଷିଆ ବିରୋଧରେ ପ୍ରତିବନ୍ଧକ ଲଗାଇବା ଯୋଗୁ ଅନେକ ଦେଶରେ ମୁଦ୍ରାସ୍ଫୀତି ବୃଦ୍ଧି ପାଇଛି। ପ୍ରତିବନ୍ଧକ ଯୋଗୁ ଅନ୍ତର୍ଜାତୀୟ ପରିବହନ, ମାଲ ପରିବହନ ଏବଂ ଆର୍ଥିକ କାରବାରରେ ଅସୁବିଧା ସୃଷ୍ଟି ହୋଇଛି।