କିଭ୍, ୬ା୪: ରୁଷିଆର ୟୁକ୍ରେନ୍ ଆକ୍ରମଣକୁ ୪୧ ଦିନ ପୂରିଥିବାବେଳେ ବୁଚା ଗଣହତ୍ୟାକୁ ନେଇ ସାରା ବିଶ୍ୱରେ ଉଦ୍ବେଗ ପ୍ରକାଶ ପାଇଛି। ରୁଷିଆ ରାଷ୍ଟ୍ରପତି ଭ୍ଲାଡିମିର ପୁଟିନ୍ ଯୁଦ୍ଧ ଅପରାଧ କରିଥିବା କହି ୟୁକ୍ରେନ୍ ରାଷ୍ଟ୍ରପତି ଭୋଲୋଡିମିର ଜେଲେନ୍ସ୍କି ମଙ୍ଗଳବାର ଜାତିସଂଘ ସୁରକ୍ଷା ପରିଷଦ (ୟୁଏନ୍ଏସ୍ସି)କୁ ସମ୍ବୋଧନ କରିଛନ୍ତି। ଜେଲେନ୍ସ୍କି କହିଛନ୍ତି, ୟୁକ୍ରେନ୍ରେ ବୁଚା ଭଳି ଦୃଶ୍ୟ ଆହୁରି ମିଳିବ। ରୁଷୀୟ ସୈନ୍ୟ ନିଜ ଆନନ୍ଦ ପାଇଁ ସାଧାରଣ ଲୋକଙ୍କୁ ହତ୍ୟା କରୁଛନ୍ତି। ସେମାନଙ୍କ ଗୋଡ଼ ହାତ ବାନ୍ଧି ରାସ୍ତାରେ ଗୁଳି କରୁଛନ୍ତି। ଘରେ ପଶି ସମ୍ପୂର୍ଣ୍ଣ ପରିବାରକୁ ମାରିବା ସହ ସେମାନଙ୍କୁ କୂଅରେ ଫିଙ୍ଗି ଦେଉଛନ୍ତି, ଲୋକଙ୍କ ଉପରେ ଟ୍ୟାଙ୍କ ଚଢ଼ାଇ ଦେଉଛନ୍ତି। ରୁଷୀୟ ସୈନ୍ୟଙ୍କ କାମ ଆତଙ୍କବାଦୀ ଗୋଷ୍ଠୀ ସଙ୍ଗଠନ ଇସ୍ଲାମିକ୍ ଷ୍ଟେଟ୍(ଆଇଏସ୍)ଠାରୁ କମ୍ ନୁହେଁ। ଦ୍ୱିତୀୟ ବିଶ୍ୱଯୁଦ୍ଧ ପରେ ଏହା ସବୁଠୁ ବଡ଼ ଯୁଦ୍ଧ ଅପରାଧ। ୟୁକ୍ରେନ୍ ବ୍ୟତୀତ ଅନ୍ୟ ଦେଶରେ ମଧ୍ୟ ପୁଟିନ୍ ନିଜ ଘୃଣା, ହିଂସା ମନୋଭାବ ବିସ୍ତାର କରିବାକୁ ଚାହୁଁଛନ୍ତି। ତେଣୁ ସୁରକ୍ଷା ପରିଷଦ କେତେବେଳେ ସୁରକ୍ଷା ଯୋଗାଇବ ବୋଲି ଜେଲେନ୍ସ୍କି ପ୍ରଶ୍ନ କରିଛନ୍ତି। କେଉଁଠି ଶାନ୍ତି ଅଛି। ଜାତିସଂଘ ଦେଇଥିବା ସେହି ଗ୍ୟାରେଣ୍ଟିର କ’ଣ ହେଲା ବୋଲି ସେ ୟୁଏନ୍ଏସ୍ସିରେ ସମସ୍ତ ସଦସ୍ୟଙ୍କୁ ପଚାରିଛନ୍ତି। ରୁଷୀୟ ସୈନ୍ୟ ୟୁକ୍ରେନ୍ର ଅନ୍ୟ ଅଞ୍ଚଳରେ ବୁଚା ଭଳି ନରସଂହାର ସହ ଆହୁରି ଅଧିକ ଲୋମହର୍ଷଣକାରୀ ଘଟଣା ଘଟାଇବାକୁ ଯାଉଛନ୍ତି। ତେଣୁ ରୁଷିଆକୁ ରୋକିବାକୁ ହେବ ବୋଲି ସେ ଆହ୍ବାନ ଦେଇଛନ୍ତି। ସେହିଭଳି ବୁଚା ଦୃଶ୍ୟକୁ କେବେ ଭୁଲିପାରିବେ ନାହିଁ ବୋଲି ଜାତିସଂଘ ମହାସଚିବ ଆଣ୍ଟୋନିଓ ଗୁଟେରସ୍ କହିଛନ୍ତି। ଅନ୍ୟପକ୍ଷରେ ମାରିଉପୋଲରେ ରୁଷିଆ ହତ୍ୟା କରିଥିବା ସାଧାରଣ ନାଗରିକଙ୍କ ମୃତଦେହକୁ ଏକାଠି କରି ୟୁକ୍ରେନ୍ ସୈନ୍ୟଙ୍କ ଉପରେ ଦୋଷ ଲଦିବାକୁ ଯୋଜନା କରିଥିବା ଦେଶର ସିକ୍ୟୁରିଟି ସର୍ଭିସ୍ ଏସ୍ବିୟୁ କହିଛି। ବିଶ୍ୱର ନଜର ନିଜ ଉପରୁ ହଟାଇବା ପାଇଁ ରୁଷିଆ ଏଭଳି ପ୍ଲାନ୍ ପ୍ରସ୍ତୁତ କରିଥିବା ଏସ୍ବିୟୁ ପକ୍ଷରୁ ଏକ ଟୁଇଟ୍ କରାଯାଇଛି।
ପୂର୍ବ ୟୁକ୍ରେନ୍କୁ ରୁଷିଆ ଟାର୍ଗେଟ କରିଥିବାବେଳେ ଡୋନ୍ବାସ୍ ଅଞ୍ଚଳକୁ ଏହା ସମ୍ପୂର୍ଣ୍ଣ କବ୍ଜା କରିବାକୁ ଲକ୍ଷ୍ୟ ରଖିଥିବା ନାଟୋ ମହାସଚିବ ଜେନ୍ସ ଷ୍ଟୋଲେନବର୍ଗ କହିଛନ୍ତି। ନାଟୋ ସହଯୋଗୀମାନେ ୟୁକ୍ରେନ୍କୁ ଅଧିକ ସାମରିକ ସହାୟତା ଯୋଗାଇବେ ବୋଲି ସେ ପ୍ରକାଶ କରିଛନ୍ତି। ପୁଟିନ୍ ଯୁଦ୍ଧ ଅପରାଧ ଟ୍ରାଏଲର ସମ୍ମୁଖୀନ ହେବା ଉଚିତ ବୋଲି ଆମେରିକା ରାଷ୍ଟ୍ରପତି ଜୋ ବାଇଡେନ୍ ସୋମବାର କହିଥିବାବେଳେ ଏହା ସ୍ବୀକାରଯୋଗ୍ୟ ନୁହେଁ ବୋଲି କ୍ରେମ୍ଲିନ୍ ପକ୍ଷରୁ କୁହାଯାଇଛି। ଯୁଦ୍ଧରେ ୧୮,୫୦୦ ରୁଷୀୟ ସୈନ୍ୟ ନିହତ ହୋଇଥିବା ୟୁକ୍ରେନ୍ ଆର୍ମଡ ଫୋର୍ସର ଜେନେରାଲ ଷ୍ଟାଫ୍ ଏକ ଫେସ୍ବୁକ୍ ପୋଷ୍ଟରେ କହିଛନ୍ତି।