ମସ୍କୋ/କ୍ୱିଭ୍/ଓ୍ବାଶିଂଟନ,୧୮ା୨:ବେଲାରୁଷ, କ୍ରିମିଆ ଓ ପଶ୍ଚିମ ରୁଷିଆରେ ବିପୁଳ ସୈନ୍ୟ ଠୁଳ ତଥା ଯୁଦ୍ଧାସ୍ତ୍ର ମୁତୟନର ଉପଗ୍ରହ ଚିତ୍ର ୟୁକ୍ରେନ୍ ସୀମାରୁ ସେନା ପ୍ରତ୍ୟାହାର ନେଇ ମସ୍କୋର ଦାବିକୁ ମିଛ ପ୍ରମାଣିତ କରିଛି। ସାମରିକ ବଳ ଅପସାରଣ କଥା କହି ସୀମାନ୍ତକୁ ଅତିରିକ୍ତ ୭,୦୦୦ ସୈନ୍ୟ ପଠାଇଛି। ଏହି ପ୍ରସଙ୍ଗରେ ରୁଷିଆ ବିଶ୍ୱ ସମୁଦାୟକୁ ବିଭ୍ରାନ୍ତ କରୁଥିବା ଗୁରୁବାର ନାଟୋ ଅଭିଯୋଗ ଆଣିଛି। ଆମେରିକା କହିଛି, ସୈନ୍ୟମାନେ ନିଜ ଛାଉଣିକୁ ଫେରୁଛନ୍ତି ବୋଲି ରୁଷିଆ କହି ଓଲଟା ସମ୍ପୃକ୍ତ କ୍ଷେତ୍ରରେ ସାମରିକ ଉପସ୍ଥିତି ବଢ଼ାଇ ଚାଲିଛି।
୨୦୧୪ରେ ୟୁକ୍ରେନ୍ରୁ କ୍ରିମିଆକୁ ରୁଷିଆ ଛଡ଼ାଇ ନେଇ ଦଖଲ କରିଥିଲା। ରୁଷିଆ ରାଷ୍ଟ୍ରପତି ଭ୍ଲାଡିମିର ପୁଟିନ୍ ଏବେ ନିଜ ବିସ୍ତାରବାଦୀ ମହତ୍ତ୍ୱାକାଂକ୍ଷାକୁ ଚରିତାର୍ଥ କରିବା ଲାଗି ସେହି କ୍ରିମିଆ ଉପଦ୍ୱୀପକୁ ଅସ୍ତ୍ର କରିଛନ୍ତି। କ୍ରିମିଆରୁ ସମରାଭ୍ୟାସ ଶେଷକରି ସୈନ୍ୟ ଫେରିଯାଇଥିବା ରୁଷିଆ ପ୍ରତିରକ୍ଷା ମନ୍ତ୍ରଣାଳୟର ସଦ୍ୟ ବିବୃତି ବୁଧବାର ଆସିଥିଲା। କିନ୍ତୁ ବାସ୍ତବ ସ୍ଥିତି ସମ୍ପୂର୍ଣ୍ଣ ଭିନ୍ନ। ୟୁକ୍ରେନ୍ ସଙ୍କଟର କୂଟନୈତିକ ସମାଧାନ ପାଇଁ ରୁଷିଆ କେତେ ଆଗ୍ରହୀ ତା’ର ପ୍ରମାଣ ଦେଇଛି ଆମେରିକାର ଘରୋଇ କମ୍ପାନୀ ମାକ୍ସାର ପକ୍ଷରୁ ଉତ୍ତୋଳିତ ସାଟେଲାଇଟ୍ ଇମେଜ୍। ଉପଗ୍ରହ ଜରିଆରେ ୪୮ ଘଣ୍ଟା ଧରି ସଂଗୃହୀତ ହାଇ-ରିଜୋଲ୍ୟୁଶନ୍ ଫଟୋରେ ଏକ ନୂଆ ବ୍ରିଜ୍ ଦେଖିବାକୁ ମିଳିଛି। ବେଲାରୁଷରୁ ୟୁକ୍ରେନ୍ ବର୍ଡରକୁ ଯୋଡ଼ୁଥିବା ଏହି ସେତୁର ଲମ୍ବ ପ୍ରାୟ ୬ କି.ମି.। କ୍ରିମିଆ ଓ ପଶ୍ଚିମ ରୁଷିଆରେ ମଧ୍ୟ ସୈନ୍ୟ ମୁତୟନର ଦୃଶ୍ୟକୁ ସାଟେଲାଇଟ୍ କ୍ୟାମେରା କଏଦ୍ କରିଛି। ୟୁକ୍ରେନ୍ର ଦକ୍ଷିଣପୂର୍ବ ଏବଂ କ୍ରିମିଆରେ ବି ବୃହତ୍ ବାୟୁସେନା ଘାଟି ନିର୍ମାଣ କରିଛି। ସେହିପରି ୟୁକ୍ରେନ୍କୁ ଉତ୍ତର ଓ ଉତ୍ତର-ପୂର୍ବ ପଟୁ ଘେରିରହିଥିବା ରୁଷିଆ ସୈନ୍ୟ, ଆଟାକ୍ ହେଲିକପ୍ଟର ଏବଂ ଏକ ନୂଆ ହସ୍ପିଟାଲ ମଧ୍ୟ ଏଥିରେ ଦୃଶ୍ୟମାନ।
ପୁଟିନ୍ଙ୍କ ଦାବି ହେଉଛି ୟୁକ୍ରେନ୍ ନର୍ଥ ଆଟଲାଣ୍ଟିକ୍ ଟ୍ରିଟି ଅର୍ଗାନାଇଜେଶନ (ନାଟୋ)ରେ ସାମିଲ ହେବାର ଆଗ୍ରହ ତ୍ୟାଗ କରୁ। ସେ ସମ୍ପୃକ୍ତ କ୍ଷେତ୍ରକୁ ପାଶ୍ଚାତ୍ୟ ପ୍ରଭାବରୁ ମୁକ୍ତ କରି ପୂର୍ବ ୟୁରୋପର ସୁରକ୍ଷା ମାନଚିତ୍ରର ପୁନଃ ଅଙ୍କନ ଚାହୁଁଛନ୍ତି। ତେବେ ଆମେରିକା ଏବଂ ୟୁରୋପୀୟ ସଂଘ ପକ୍ଷରୁ ସମ୍ଭାବ୍ୟ ଆର୍ଥିକ କଟକଣା ଚେତାବନୀ ଦିଆଯାଇଥିବାବେଳେ ପାଶ୍ଚାତ୍ୟ ନେତାମାନେ ଆଲୋଚନା ଜରିଆରେ ଏହାର ସମାଧାନ ଚାହୁଁଛନ୍ତି। ଏସବୁ ଭିତରେ ମସ୍କୋ ସେନା ପ୍ରତ୍ୟାହାର ପାଇଁ ପ୍ରସ୍ତୁତ ବୋଲି ସଙ୍କେତ ଦେଇଛି ସିନା, ହେଲେ ଓଲଟା କାମ କରୁଛି। ୟୁକ୍ରେନ୍ ସାମ୍ପ୍ରତିକ ସ୍ଥିତିକୁ ଶୀତଳଯୁଦ୍ଧ ପରେ ୟୁରୋପ ନିରାପତ୍ତା ଲାଗି ସବୁଠୁ ବିପଜ୍ଜନକ ଭାବେ ଅଭିହିତ କରିଛି। ସାଟେଲାଇଟ୍ ଚିତ୍ର ଦେଖିବା ପରେ ୟୁକ୍ରେନ୍ ସୀମାରୁ ବିପଦ ଟଳିଥିବା ବିଷୟକୁ ନାଟୋ ଖଣ୍ଡନ କରିଛି। ନାଟୋ ମହାସଚିବ ଜେନ୍ସ ଷ୍ଟୋଲଟେନବର୍ଗ କହିଛନ୍ତି, ଦଶନ୍ଧି ଧରି ଆମର ନିରାପତ୍ତାକୁ ରେଖାଙ୍କିତ କରିଆସିଥିବା ମୌଳିକ ସିଦ୍ଧାନ୍ତଗୁଡ଼ିକୁ ନେଇ ଲଢ଼େଇ କରିବାକୁ ମସ୍କୋ ପ୍ରସ୍ତୁତ ଥିବା ସ୍ପଷ୍ଟ କରିଛି।