ଟ୍ରମ୍ପଙ୍କ ନୂଆ ଟାରିଫ ଲିଷ୍ଟରେ ନାହିଁ ଋଷିଆ, ହେଲେ ଭାରତ ଉପରେ ଲାଗିଲା ୨୬%ର ଛାଟ, ଭିତିରିଆ ହୋଇଗଲା କି ବଡ଼ ଡିଲ୍‌!

ନୂଆଦିଲ୍ଲୀ,୩।୪: ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ନିକଟରେ ଏକ ନୂଆ ଟାରିଫ ନୀତି ଘୋଷଣା କରିଛନ୍ତି। ଯେଉଁଥିରେ ୧୮୦ଟି ଦେଶ ଉପରେ ଭାରୀ ଶୁଳ୍କ ଲଗାଇବାର ନିଷ୍ପତ୍ତି ନିଆଯାଇଛି। ଏହି ତାଲିକାରେ ଆମେରିକାର ଅନେକ ସହଯୋଗୀ ଦେଶ ମଧ୍ୟ ସାମିଲ ଅଛନ୍ତି। କିନ୍ତୁ ଆଶ୍ଚର୍ଯ୍ୟଜନକ ଭାବେ ଟ୍ରମ୍ପଙ୍କ ଏହି ନୂଆ ଟାରିଫ ଯୋଜନାରେ ରୁଷିଆକୁ ଅନ୍ତର୍ଭୁକ୍ତ କରାଯାଇ ନାହିଁ। ରୁଷିଆକୁ ଏହି ଶୁଳ୍କରୁ ଛାଡ଼ ଦିଆଯାଇଥିବା ଖବର ଅନେକଙ୍କୁ ଆଶ୍ଚର୍ଯ୍ୟ କରିଛି। ତେବେ ଏହା ପଛରେ କାରଣ କ’ଣ ରହିଛି, ଆସନ୍ତୁ ଜାଣିବା।

ଟ୍ରମ୍ପଙ୍କ ନୀତି ଅନୁସାରେ, ଭାରତ ଉପରେ ୨୭ ପ୍ରତିଶତ ଏବଂ ଚାଇନା ଉପରେ ୩୪ ପ୍ରତିଶତ ଟାରିଫ ଲାଗୁ କରାଯାଇଛି। ଏହା ସହିତ ଇଉରୋପୀୟ ସଂଘ (ଇଇଉ), ଜାପାନ ଏବଂ ଭିଏତନାମ ଭଳି ଦେଶମାନଙ୍କ ଉପରେ ମଧ୍ୟ ୨୦ ପ୍ରତିଶତରୁ ଅଧିକ ଶୁଳ୍କ ଲଗାଯାଇଛି। କିନ୍ତୁ ରୁଷିଆ ଏହି ତାଲିକାରୁ ବାଦ ପଡ଼ିଛି। ଏହାର ମୁଖ୍ୟ କାରଣ ହେଉଛି, ୨୦୧୪ରେ ରୁଷିଆ ଦ୍ୱାରା ୟୁକ୍ରେନ ଆକ୍ରମଣ ପରେ ଆମେରିକା ରୁଷିଆ ଉପରେ କଡ଼ା ଆର୍ଥିକ ପ୍ରତିବନ୍ଧକ (ସାଙ୍କସନ) ଲଗାଇଥିଲା। ଏହି ପ୍ରତିବନ୍ଧକ ଯୋଗୁଁ ଆମେରିକା ଓ ରୁଷିଆ ମଧ୍ୟରେ ବାଣିଜ୍ୟ ପ୍ରାୟ ଶୂନ୍ୟକୁ ଖସି ଆସିଛି। ୨୦୨୪ ସୁଦ୍ଧା ଉଭୟ ଦେଶ ମଧ୍ୟରେ ବାଣିଜ୍ୟ ମୂଲ୍ୟ ମାତ୍ର ୩.୫ ବିଲିୟନ ଡଲାର ରହିଛି, ଯାହା ୨୦୨୧ରେ ୩୬ ବିଲିୟନ ଡଲାର ଥିଲା।

ହୱାଇଟ ହାଉସର ଜଣେ ଅଧିକାରୀଙ୍କ କହିବା ଅନୁସାରେ, ରୁଷିଆ ସହ ବାଣିଜ୍ୟ ପୂର୍ବରୁ ହିଁ ନାମମାତ୍ର ରହିଛି। ତେଣୁ ଏହି ନୂଆ ଟାରିଫ ତାଲିକାରେ ରୁଷିଆକୁ ସାମିଲ କରିବାର କୌଣସି ଆବଶ୍ୟକତା ନାହିଁ। ଏହା ବ୍ୟତୀତ ବେଲାରୁଷ, କ୍ୟୁବା ଏବଂ ଉତ୍ତର କୋରିଆ ଭଳି ଦେଶମାନେ ମଧ୍ୟ ଏହି ଟାରିଫରୁ ବାଦ ପଡ଼ିଛନ୍ତି, କାରଣ ଏହି ଦେଶମାନଙ୍କ ସହ ଆମେରିକାର ବାଣିଜ୍ୟ ପୂର୍ବରୁ ହିଁ ଅତି କମ ରହିଛି। ଅନ୍ୟପକ୍ଷରେ, ଇରାନ ଏବଂ ସିରିଆ ଉପରେ ଅତିରିକ୍ତ ୧୦ ଓ ୪୦ ପ୍ରତିଶତ ଟାରିଫ ଲଗାଯାଇଛି।

ଅନେକ ବିଶେଷଜ୍ଞଙ୍କ ମତରେ, ଟ୍ରମ୍ପଙ୍କ ଏହି ନୀତିରେ ରୁଷିଆକୁ ଛାଡ଼ ଦେବା ପଛରେ ଆଉ ଏକ ରାଜନୈତିକ କାରଣ ମଧ୍ୟ ରହିପାରେ। ଟ୍ରମ୍ପ ଏବଂ ରୁଷିଆର ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ମଧ୍ୟରେ ୟୁକ୍ରେନ ଯୁଦ୍ଧକୁ ନେଇ ଆଲୋଚନା ଚାଲିଛି। ଯଦି ଏହି ଆଲୋଚନା ସଫଳ ହୁଏ, ତେବେ ଟ୍ରମ୍ପ ରୁଷିଆ ସହ ସମ୍ପର୍କ ସୁଧାରିବାକୁ ଚାହୁଁଥିବେ, ଏବଂ ଏହି ଟାରିଫ ଛାଡ଼ ତାହାର ଏକ ପ୍ରାରମ୍ଭିକ ସଙ୍କେତ ହୋଇପାରେ। ଏହି ନୀତି ଘୋଷଣା ପରେ ଅନେକ ଦେଶ ଆମେରିକା ବିରୁଦ୍ଧରେ ପ୍ରତିଶୋଧମୂଳକ ଶୁଳ୍କ ଲଗାଇବାକୁ ପ୍ରସ୍ତୁତି ଆରମ୍ଭ କରିଛନ୍ତି। ଏହା ବିଶ୍ୱ ବାଣିଜ୍ୟକୁ ଆହୁରି ଜଟିଳ କରିପାରେ ବୋଲି ବିଶେଷଜ୍ଞମାନେ ଆଶଙ୍କା କରୁଛନ୍ତି।