କିଭ୍, ୨୯ା୫: ପୂର୍ବ ୟୁକ୍ରେନ୍ରେ ଆକ୍ରମଣ ତୀବ୍ର କରିଥିବା ରୁଷିଆ ଏବେ ରଣନୈତିକ ଦୃଷ୍ଟିରୁ ଗୁରୁତ୍ୱପୂର୍ଣ୍ଣ ଥିବା ଛୋଟ ଛୋଟ ସହର ଦଖଲ ଉଦ୍ୟମ ଜାରି ରଖିଛି। ଶନିବାର ରୁଷିଆ ଲିମ୍ୟାନ ସହରକୁ କବ୍ଜା କରିଥିବା ଦାବି କରିଛି। ଡୋନ୍ବାସ ଅଞ୍ଚଳରେ ଡୋନେସ୍କ ପିପୁଲ୍ସ ରିପବ୍ଲିକ୍ ବିଦ୍ରୋହୀ ଏବଂ ରୁଷୀୟ ସୈନ୍ୟ ମିଳିତ ଭାବେ କ୍ରାସନି ଲିମ୍ୟାନ୍କୁ ନିୟନ୍ତ୍ରଣକୁ ନେଇଥିବା ରୁଷିଆ ପ୍ରତିରକ୍ଷା ମନ୍ତ୍ରଣାଳୟର ମୁଖପାତ୍ର ଆଇଗୋର କୋନାଶେନ୍କୋଭ୍ କହିଛନ୍ତି। ଏଥିସହ ପୂର୍ବ ୟୁକ୍ରେନ୍ର ଏକ ପ୍ରମୁଖ ରେଲଓ୍ବେ ଜଙ୍କସନ୍ ମଧ୍ୟ ରୁଷିଆ ସୈନ୍ୟଙ୍କ ନିୟନ୍ତ୍ରଣକୁ ଯାଇଛି। ଡୋନ୍ବାସରେ ରୁଷୀୟ ସୈନ୍ୟଙ୍କୁ ୟୁକ୍ରେନ୍ ସୁରକ୍ଷାବାହିନୀ ପ୍ରତିରୋଧ ଜାରି ରଖିଥିବାରୁ ଏବେ ମସ୍କୋ ଛୋଟ ଛୋଟ ସହରକୁ କବ୍ଜା କରି ସେଠାରୁ ଅନ୍ୟ ଅଞ୍ଚଳରେ ସହଜରେ ଆକ୍ରମଣ କରିବାର ରଣନୀତି ପ୍ରସ୍ତୁତ କରିଥିବା କୁହାଯାଉଛି।
ରୁଷିଆ ଆକ୍ରମଣ କରିବା ପୂର୍ବରୁ ଲିମ୍ୟାନ୍ରେ ପ୍ରାୟ ୨୦ ହଜାର ଲୋକ ବାସ କରୁଥିଲେ। ଲିମ୍ୟାନରେ ଥିବା ଆଞ୍ଚଳିକ ରେଳ ହବ୍ ଯୋଗେ ୟୁକ୍ରେନ୍ର ମୁଖ୍ୟ ଭାଗରୁ ବିଚ୍ଛିନ୍ନତାବାଦୀ ଅଞ୍ଚଳ ଡୋନ୍ବାସ୍କୁ ଅସ୍ତ୍ରଶସ୍ତ୍ର ପଠାଯାଇଥାଏ। ଏଥିସହ ରୁଷିଆ ଆକ୍ରମଣବେଳେ ଏହି ରେଳଷ୍ଟେଶନ ଦେଇ ବହୁ ସଂଖ୍ୟାରେ ଲୋକଙ୍କୁ ଉଦ୍ଧାର କରାଯାଇଥିଲା। ଲିମ୍ୟାନ୍ ଦଖଲ ଦ୍ୱାରା ରୁଷିଆକୁ ଏହାର ଫାଇଦା ମିଳିବ। ବିଚ୍ଛିନ୍ନତାବାଦୀଙ୍କ ଅକ୍ତିଆରରେ ଥିବା ଡୋନେସ୍କ ଓ ଲୁହାନ୍ସ୍କ ସହ ୟୁକ୍ରେନ୍ ସରକାରଙ୍କ ନିୟନ୍ତ୍ରଣରେ ରହିଥିବା ଡୋନ୍ବାସର ଅନ୍ୟ ବଡ଼ ସହରକୁ ମଧ୍ୟ ଦଖଲ କରିବ ପାଇଁ ଲିମ୍ୟାନ୍ ଭଳି ଅଞ୍ଚଳ ରୁଷିଆ ପାଇଁ ସହାୟକ ହେବ। ରାଜଧାନୀ କିଭ୍କୁ ଦଖଲରେ ବିଫଳ ହେବା ପରେ ମସ୍କୋ ଏବେ ପୂର୍ବ ୟୁକ୍ରେନ୍ ଉପରେ ଧ୍ୟାନ କେନ୍ଦ୍ରୀଭୂତ କରିଛି। ୟୁକ୍ରେନ୍ ସରକାରଙ୍କ ନିୟନ୍ତ୍ରଣରେ ଥିବା ଲୁହାନ୍ସ୍କର ପ୍ରମୁଖ ଟ୍ବିନ ସିଟି ସିଭିଏରୋଡୋନେସ୍କ ଓ ଲିସିଚାନ୍ସ୍କକୁ ଦଖଲ ପାଇଁ ରୁଷିଆ ଶନିବାର ଜୋର୍ଦାର ଆକ୍ରମଣ କରିଛି। ଡୋନ୍ବାସରେ ସ୍ଥିତି ଗମ୍ଭୀର ଥିବା ୟୁକ୍ରେନ୍ ରାଷ୍ଟ୍ରପତି ଭୋଲୋଡିମିର ଜେଲେନ୍ସ୍କି କହିଛନ୍ତି। ତେବେ ସବୁପ୍ରକାର ପରିସ୍ଥିତିରେ ଡୋନ୍ବାସ ୟୁକ୍ରେନ୍ର ହୋଇ ରହିବ ବୋଲି ସେ ଦୃଢ଼ୋକ୍ତି ବାଢ଼ିଛନ୍ତି। ମଙ୍ଗଳବାର ରୁଷୀୟ ସୈନ୍ୟ ସିଭିଏରୋଡୋନେସ୍କର ଦକ୍ଷିଣରେ ଥିବା ଏକ ଛୋଟ ମ୍ୟୁନିସିପାଲିଟି ଭିତ୍ଲୋଡାର୍ସ୍କକୁ ଅକ୍ତିଆର କରିଛି। ରୁଷିଆ ଆକ୍ରମଣ ସହ ଚିକିତ୍ସା ସୁବିଧା ନ ପାଇ ସେଠାରେ ପ୍ରାୟ ୧୫ ଶହ ସାଧାରଣ ନାଗରିକଙ୍କ ମୃତ୍ୟୁ ଘଟିଥିବା ସିଭିଏରୋଡୋନେସ୍କର ମେୟର ଆଲେକଜାଣ୍ଡର ଷ୍ଟ୍ରିଉକ୍ କହିଛନ୍ତି।