ଓ୍ବାଶିଂଟନ,୧୫।୮: କରୋନା ମହାମାରୀ ସାରା ବିଶ୍ୱକୁ ଅସ୍ତବ୍ୟସ୍ତ କରି ଦେଇଥିବା ବେଳେ ଏବେ ଏହାର ଭ୍ୟାକ୍ସିନ ଖୋଜିବାରେ ଲାଗିପଡିଛନ୍ତି ସମସ୍ତ ବିକାଶଶୀଳ ଦେଶ। ଏହାରି ମଧ୍ୟରେ ରୁଷିଆ ଚଳିତ ମାସରେ ପ୍ରଥମ କରୋନା ଟିକା ପ୍ରସ୍ତୁତ କରିଥିବା ଦାବି କରିଛି। ହେଲେ ଏହାକୁ କେତେକ ଦେଶ ଗ୍ରହଣ କରିବାକୁ ପ୍ରସ୍ତୁତ ନୁହଁନ୍ତି। ଏମିତିକି ଆମେରିକା ଏବେ ଏହି ଭ୍ୟାକ୍ସିନର ମଜା ଉଡାଇଛି। ଆମେରିକା କହିଛି ରୁଷିଆ ଯେଉଁ କରୋନା ଟିକା ପ୍ରସ୍ତୁତ କରିଛି ତାହା ମଣିଷତ ଦୂରର କଥା ମାଙ୍କଡ଼ ଉପରେ ମଧ୍ୟ ପରୀକ୍ଷଣ କରିବ ନାହିଁ। ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ କହିବା କଥା ହେଲା ରୁଷିଆ ଯେଉଁ ଟିକା ପ୍ରସ୍ତୁତ କରିଛି ତାହା ସମ୍ପୂର୍ଣ୍ଣ ଭାବେ ପରୀକ୍ଷଣ ହୋଇନାହିଁ। ଏହି ଟିକାକୁ ତୃତୀୟ ପର୍ଯ୍ୟାୟରେ କଠୋର ପରୀକ୍ଷଣ ଓ ଉଚ୍ଚ ଗୁଣବତ୍ତା ଦେଇ ଗତି କରିବାର ଅଛି। ଅନ୍ୟପଟେ ରୁଷିଆ ଟିକା ପ୍ରସ୍ତୁତିର ତଥ୍ୟକୁ ଆମେରିକା ସହ ଶେୟାର କରିବାକୁ ପ୍ରସ୍ତୁତ ଅଛି ବୋଲି କହିଛି। ଏମିତିକି ରୁଷିଆ ଏହାକୁ ଆମେରିକା କମ୍ପାନୀକୁ ପ୍ରସ୍ତୁତ କରିବାକୁ ଅନୁମତି ଦେବାକୁ ରାଜି ଅଛି। ତେବେ ରୁଷିଆର ଜଣେ ଅଧିକାରୀ କହିଛନ୍ତି ଆମେରିକାବାସୀଙ୍କ ଜୀବନ ବଞ୍ଚାଇବାକୁ ହେଲେ ରୁଷିଆର ଟିକା ବିଷୟରେ ଆମେରିକା ଗମ୍ଭିରତାର ସହ ଚିନ୍ତା କରିବା ଦରକାର। ସୂଚନାଯୋଗ୍ୟ, ରୁଷିଆ ଅଗଷ୍ଟ ୧୧ରେ କରୋନା ଭ୍ୟାକ୍ସିନ ପ୍ରସ୍ତୁତ କରିଥିବା କଥା ଦାବି କରିଥିଲା।
