କିଭ୍/ମସ୍କୋ,୨।୨ : ୟୁକ୍ରେନର ପ୍ରତିରକ୍ଷା ମନ୍ତ୍ରୀ ଓଲକେସି ରେଜନିକୋଭ ଦାବି କରିଛନ୍ତି ଯେ ରୁଷିଆ ୟୁକ୍ରେନ ଉପରେ ଏକ ବଡ଼ ଧରଣର ଆକ୍ରମଣ ପାଇଁ ଯୋଜନା କରୁଛି। ରେଜନିକୋଭ କହିଛନ୍ତି ଯେ ଏହି ଆକ୍ରମଣ ଫେବୃଆରୀ ୨୪ କିମ୍ବା ଏହାର ପାଖାପାଖି କୌଣସି ତାରିଖରେ ହୋଇପାରେ। ୟୁକ୍ରେନ ଉପରେ ରୁଷିଆର ଆକ୍ରମଣ ଫେବୃଆରୀ୨୪ରେ ଗୋଟିଏ ବର୍ଷ ପୂରଣ ହେବ। ଏଭଳି ପରିସ୍ଥିତିରେ ଯୁଦ୍ଧର ପ୍ରଥମ ବାର୍ଷିକୀରେ ରୁଷିଆ ୟୁକ୍ରେନ ଉପରେ ଏକ ବଡ଼ ଆକ୍ରମଣ କରିବାକୂ ପ୍ରସ୍ତୁତ ହେଉଥିବା କୁହାଯାଉଛି। ଏହା ବ୍ୟତୀତ ୨୩ ଫେବୃଆରୀରେ ରୁଷିଆ ନିଜର ସାମରିକ ଦିବସ ପାଳନ କରିଥାଏ। ଏହି ଦିନ ମଧ୍ୟ ୟୁକ୍ରେନ ଉପରେ ଏକ ଶକ୍ତିଶାଳୀ ଆକ୍ରମଣ ହେବାର ଆଶଙ୍କା ରହିଛି।
ୟୁକ୍ରେନର ପ୍ରତିରକ୍ଷା ମନ୍ତ୍ରୀ କହିଛନ୍ତି ଯେ ରୁଷିଆ ପ୍ରାୟ ୫ ଲକ୍ଷ ସୈନିକ ସଂଗ୍ରହ କରୁଛି। ରାଷ୍ଟ୍ରପତି ଭ୍ଲାଦିମିର ପୁଟିନ ଗତ ବର୍ଷ ସେପ୍ଟେମ୍ବରରେ ସୀମାରେ ତିନି ଲକ୍ଷ ସୈନିକ ମୁତୟନ କରିବାକୁ ଘୋଷଣା କରିଥିଲେ। ବର୍ତ୍ତମାନ ୟୁକ୍ରେନ ପ୍ରତିରକ୍ଷା ମନ୍ତ୍ରୀ କହିଛନ୍ତି ଯେ ଏହି ସଂଖ୍ୟା ତିନି ଲକ୍ଷରୁ ଅଧିକ ଅଟେ। ଏଥି ସହିତ ୟୁକ୍ରେନର ଇନଷ୍ଟିଚ୍ୟୁଟ ଷ୍ଟଡି ଅଫ ୱାର୍ ଦାବି କରିଛି ଯେ ରୁଷିଆ ୟୁକ୍ରେନର ପୂର୍ବ ଭାଗରେ ଏକ ବଡ଼ ଧରଣର ଆକ୍ରମଣ କରିପାରେ। ତେବେ ୟୁକ୍ରେନ ରୁଷିଆ ଆକ୍ରମଣର କଡ଼ା ମୁକାବିଲା କରିବାକୁ ମଧ୍ୟ କହିଛି।
ୟୁକ୍ରେନ ପ୍ରତିରକ୍ଷା ମନ୍ତ୍ରୀ ଏମଜି-୨୦୦ ବାୟୁ ପ୍ରତିରକ୍ଷା ରାଡାର କ୍ରୟ ପାଇଁ ଫ୍ରାନ୍ସ ଗସ୍ତରେ ଅଛନ୍ତି। ନିକଟରେ ୟୁକ୍ରେନ ୟୁରୋପୀୟ ଦେଶରୁ ଯୁଦ୍ଧ ବିମାନ ଦେବାକୁ ଦାବି କରିଛି। ନିକଟରେ ଜର୍ମାନୀ, ଆମେରିକା ଏବଂ ବ୍ରିଟେନ ୟୁକ୍ରେନକୁ ଟ୍ୟାଙ୍କ ପଠାଇବାକୁ ନିଷ୍ପତ୍ତି ନେଇଥିଲେ। ୟୁକ୍ରେନର ଗୁପ୍ତଚର ବିଭାଗର ରିପୋର୍ଟ ଅନୁଯାୟୀ ରାଷ୍ଟ୍ରପତି ଭ୍ଲାଦିମିର ପୁଟିନ ତାଙ୍କ ସୈନ୍ୟମାନଙ୍କୁ ବସନ୍ତ ପୂର୍ବରୁ ଡୋନବାସ ଅଞ୍ଚଳକୁ ଫେରାଇ ଆଣିବାକୁ ନିର୍ଦ୍ଦେଶ ଦେଇଛନ୍ତି। ବର୍ତ୍ତମାନ ରୁଷିଆର ସୈନ୍ୟ ଏବଂ ୟୁକ୍ରେନ ସେନା ମଧ୍ୟରେ ଡୋନବାସରେ ଭୟଙ୍କର ଯୁଦ୍ଧ ଚାଲିଛି। ୟୁକ୍ରେନର ରାଷ୍ଟ୍ରପତି ଭୋଲଡିମେୟର ଜେଲେନସ୍କି କହିଛନ୍ତି ଯେ ଆଗାମୀ ଦିନରେ ଏହି ଯୁଦ୍ଧ ଅଧିକ ଗମ୍ଭୀର ହୋଇପାରେ।