ବ୍ରସେଲ୍ସ,୨୫ା୩:ରୁଷିଆର ୟୁକ୍ରେନ୍ ଆକ୍ରମଣକୁ ମାସେ ପୂରିଥିବାବେଳେ ମସ୍କୋକୁ କଡ଼ା ଜବାବ ଦେବା ପାଇଁ କିଭ୍କୁ ଯଥାସମ୍ଭବ ସହଯୋଗ କରିବା ନେଇ ଗୁରୁବାର ପାଶ୍ଚାତ୍ୟ ନେତାଙ୍କ ମଧ୍ୟରେ ସହମତି ପ୍ରକାଶ ପାଇଛି। ନର୍ଥ ଆଟଲାଣ୍ଟିକ୍ ଟ୍ରିଟି ଅର୍ଗାନାଇଜେଶନ (ନାଟୋ), ୟୁରୋପୀୟ ସଂଘ (ଇୟୁ) ଏବଂ ଜି-୭ ସଦସ୍ୟ ରାଷ୍ଟ୍ରଗୁଡ଼ିକ ବେଲ୍ଜିୟମ୍ର ବ୍ରସେଲ୍ସରେ ଏକାଠି ହୋଇଛନ୍ତି। ତୁରନ୍ତ ଯୁଦ୍ଧ ବନ୍ଦ ପୂର୍ବକ ୟୁକ୍ରେନ୍ରୁ ସୈନ୍ୟ ପ୍ରତ୍ୟାହାର କରିବା ପାଇଁ ରୁଷିଆ ରାଷ୍ଟ୍ରପତି ଭ୍ଲାଡିମିର ପୁଟିନ୍ଙ୍କ ଉପରେ ନାଟୋ ନେତାମାନେ ଚାପ ପକାଇଛନ୍ତି। ଆକ୍ରମଣରେ ସହଯୋଗ ବନ୍ଦ କରିବାକୁ ବେଲାରୁଷକୁ କୁହାଯାଇଛି।
ନାଟୋ ମହାସଚିବ ଜେନ୍ସ ଷ୍ଟୋଲେନବର୍ଗ ବ୍ରସେଲ୍ସରେ ରୁଦ୍ଧଦ୍ୱାର ସମ୍ମିଳନୀକୁ ଉଦ୍ଘାଟନ କରି କହିଛନ୍ତି, ଆମ ସୁରକ୍ଷା ଉପରେ ସଙ୍କଟ ସୃଷ୍ଟି ହୋଇଥିବା ସମୟରେ ଆମେ ଏକାଠି ହୋଇଛେ। ୟୁକ୍ରେନ୍ର ସାର୍ବଭୌମତ୍ୱ ଓ କ୍ଷେତ୍ରୀୟ ଅଖଣ୍ଡତା ପ୍ରତି ବିପଦ ସୃଷ୍ଟି କରୁଥିବା ରୁଷିଆର ଆକ୍ରମଣକୁ ନିନ୍ଦା କରିବା ପାଇଁ ଆମେ ଏକତ୍ରିତ। ଏହି ଆକ୍ରମଣ ହେଉଛି ସାମ୍ପ୍ରତିକ ପିଢ଼ିରେ ସର୍ବବୃହତ୍ ସୁରକ୍ଷା ସଙ୍କଟ। ଆମେ ନିଜ ସହଯୋଗୀ ରାଷ୍ଟ୍ରର ଲୋକଙ୍କ ସୁରକ୍ଷା ପାଇଁ ମିଳିତ ଭାବେ ଉଦ୍ୟମ ଜାରି ରଖିବୁ। ପୁଟିନ୍ଙ୍କ ୟୁକ୍ରେନ୍ ଆକ୍ରମଣ ଆମ ସୁରକ୍ଷା ପରିବେଶକୁ ବଦଳାଇଦେଇଛି। ନାଟୋ ମଧ୍ୟ ଦୀର୍ଘସୂତ୍ରୀ ଲଢ଼େଇ ପାଇଁ ପ୍ରସ୍ତୁତ ରହିଛି। ରୁଷିଆକୁ ଜବାବ ଦେବା ପାଇଁ ସ୍ଲୋଭାକିଆ, ହଙ୍ଗେରି, ବୁଲଗେରିଆ ଓ ରୋମାନିଆକୁ ୪୦,୦୦୦ ସୈନ୍ୟଙ୍କୁ ପଠାଇବାକୁ ନାଟୋରେ ସହମତି ପ୍ରକାଶ ପାଇଛି। ରାସାୟନିକ ଅସ୍ତ୍ର ଏହି ସଂଘର୍ଷର ପରିଭାଷା ବଦଳାଇଦେଇପାରେ। ଏହା ଅନ୍ତର୍ଜାତୀୟ ଆଇନର ଖୋଲା ଉଲ୍ଲଂଘନ। ତେଣୁ ଜୈବିକ, ରାସାୟନିକ, ରେଡିଓଲୋଜିକାଲ ଏବଂ ଆଣବିକ ବିପଦରୁ ୟୁକ୍ରେନ୍କୁ ଆମତ୍ରକ୍ଷା ପାଇଁ ସହଯୋଗ ଦିଗରେ ସାଇବର ପ୍ରତିରକ୍ଷାକୁ ମଜଭୁତ କରାଯିବ ବୋଲି ନାଟୋ ମହାସଚିବ କହିଛନ୍ତି। ନାଟୋ ସମ୍ମିଳନୀକୁ ବାଦ୍ଦେଇ ବ୍ରସେଲ୍ସରେ ପୃଥକ୍ ଭାବେ ସାତ ଶିଳ୍ପବିକଶିତ ରାଷ୍ଟ୍ର ଜି-୭ ଏବଂ ଇୟୁର ସ୍ବତନ୍ତ୍ର ସମ୍ମିଳନୀ ହେଉଛି। ବାଇଡେନ୍ ଏହି ୩ ସମ୍ମିଳନୀରେ ଯୋଗଦେଇଛନ୍ତି। ଜି-୭ ନେତାମାନେ ରୁଷିଆ ସେଣ୍ଟ୍ରାଲ ବ୍ୟାଙ୍କର ସୁନା କାରବାର ଉପରେ କଟକଣା ଜାରି କରିଛନ୍ତି। ଫେବୃୟାରୀ ୨୪ରେ ରୁଷିଆ ସୈନ୍ୟ ୟୁକ୍ରେନ୍ ଉପରେ ଆକ୍ରମଣ ଆରମ୍ଭ କରିବା ପରଠାରୁ ଯେଉଁ କଟକଣା ଜାରି କରାଯାଇଛି ମସ୍କୋ ତାକୁ ଫାଙ୍କିବାକୁ ଉଦ୍ୟମ ଚଳାଇଛି। ମସ୍କୋର ଏଭଳି ଚାଲାକି ବନ୍ଦ କରିବା ଲାଗି ଜି-୭ ଏବଂ ଇୟୁ ରାଷ୍ଟ୍ରଗୁଡ଼ିକ ପରସ୍ପର ମଧ୍ୟରେ ସୂଚନା ଆଦାନପ୍ରଦାନ ନିମନ୍ତେ ଏକ ନୂଆ ଉଦ୍ୟମ ଆରମ୍ଭ କରିଛନ୍ତି।