ମସ୍କୋ,୧।୧୨: ୟୁକ୍ରେନ ସହିତ ଯୁଦ୍ଧ ଲଢ଼ୁଥିବା ରୁଷିଆର ତୈଳ ଉପରେ ‘ପ୍ରାଇସ୍ କ୍ୟାପ’ ଲାଗୁ କରିବା ମାମଲାରେ ମସ୍କୋ ବୈଦେଶିକ ମନ୍ତ୍ରଣାଳୟ ପକ୍ଷରୁ ଏକ ବଡ଼ ବୟାନ ସାମ୍ନାକୁ ଆସିଛି। ରୁଷିଆର ବୈଦେଶିକ ମନ୍ତ୍ରଣାଳୟ ପକ୍ଷରୁ କୁହାଯାଇଛି ଯେ, ‘ପ୍ରାଇସ୍ କ୍ୟାପ’ ଧାର୍ଯ୍ୟ କରିବାକୁ ପାଶ୍ଚାତ୍ୟ ଦେଶଗୁଡିକର ଏହି ପ୍ରସ୍ତାବ ବଜାର ବିରୋଧୀ ତଥା ନିୟମ ବିରୁଦ୍ଧ ଅଟେ। ଏହାର ବୃହତ ପ୍ରଭାବ ତେଲ ଯୋଗାଣ ଶୃଙ୍ଖଳା ଉପରେ ପଡ଼ିବ। ଏଥିସହ ଏହା ବିଶ୍ୱ ଶକ୍ତି ବଜାରର ସ୍ଥିତିକୁ ମଧ୍ୟ ଆହୁରି ଅଧିକ ଗମ୍ଭୀର କରିପାରେ ବୋଲି ରୁଷିଆର ବୈଦେଶିକ ମନ୍ତ୍ରଣାଳୟର ମୁଖପାତ୍ର ମାରିଆ ଜଖାରୋଭା କହିଛନ୍ତି। ଅନ୍ୟପଟେ ରୁଷିଆ ପୁଣି ଥରେ ସ୍ପଷ୍ଟ କରିଛି ଯେ, ଯେଉଁ ଦେଶ ଏହି ‘ପ୍ରାଇସ୍ କ୍ୟାପ୍’କୁ ସମର୍ଥନ କରିବ ତା’କୁ ମସ୍କୋ ତୈଳ ଯୋଗାଣ କରିବ ନାହିଁ। ଏହି ପ୍ରସ୍ତାବ ରୁଷିଆର ସମ୍ପୂର୍ଣ୍ଣ ବିରୋଧୀ ବୋଲି ବୈଦେଶିକ ମନ୍ତ୍ରଣାଳୟର ମୁଖପାତ୍ର କହିଛନ୍ତି। ଏହାପୂର୍ବରୁ ରୁଷିଆର ଉପ ପ୍ରଧାନମନ୍ତ୍ରୀ ଆଲେକ୍ସଜାଣ୍ଡାର୍ ନୋଭାକ କହିଥିଲେ ଯେ, ରୁଷିଆ ପାଇଁ ଯେତେ ଲାଭଦାୟକ ହେଉ ନା କାହିଁକି ସେହି ଦେଶକୁ ତେଲ ବିକ୍ରି କରାଯିବ ନାହିଁ ଯିଏ ଏହି ପ୍ରାଇସ୍ କ୍ୟାପକୁ ସମର୍ଥନ କରିବ। ବଜାର ସ୍ଥିତି ଅନୁଯାୟୀ ଆମେ ଅଗକୁ ବଢ଼ିବୁ ବୋଲି ଆଲେକ୍ସଜାଣ୍ଡାର୍ ନୋଭାକ କହିଥିଲେ। ସୂଚନାଯୋଗ୍ୟ, ଗତ କିଛି ମାସରୁ ରୁଷିଆ ଓ ୟୁକ୍ରେନ ମଧ୍ୟରେ ଯୁଦ୍ଧ ଜାରି ରହିଛି। ଏହି କାରଣରୁ ରୁଷିଆକୁ ଆମେରିକା, ବ୍ରିଟେନ ସମେତ ବହୁ ପ୍ରମୁଖ ପାଶ୍ଚାତ୍ୟ ଦେଶର ପ୍ରତିବନ୍ଧକକୁ ସାମ୍ନା କରିବାକୁ ପଡ଼ୁଛି। ତେବେ ରୁଷିଆକୁ ଝଟ୍କା ଦେବା ପାଇଁ ଆମେରିକାର ପ୍ରାଧାନ୍ୟ ବିସ୍ତାରିତ ଜି-୭ ଗୋଷ୍ଠୀ ଏବଂ ୟୁରୋପୀୟ ୟୁନିଅନ ଏକ ‘ପ୍ରାଇସ୍ କ୍ୟାପ’ ଲାଗୁ କରିବାକୁ ନିଷ୍ପତ୍ତି ନେଇଥିଲେ। ଏହା ମାଧ୍ୟମରେ ରୁଷିଆ ତୈଳର ମୂଲ୍ୟ ସ୍ଥିର କରାଯାଇପାରିବ ଏବଂ ଏହାର ଆଧାରରେ ରୁଷିଆ ନିଜର ତେଲ ବିକ୍ରି କରିପାରିବ।
