ମସ୍କୋ, ୯ା୩: ୟୁକ୍ରେନ୍ ଉପରେ ଆକ୍ରମଣ ଯୋଗୁ ରୁଷିଆ ଉପରେ ଆମେରିକା ସମେତ ବିଭିନ୍ନ ଦେଶ କଟକଣା ଲଗାଇ ଚାଲିଛନ୍ତି। ଏଥିଯୋଗୁ ରୁଷିଆର ବ୍ୟାଙ୍କିଙ୍ଗ ସିଷ୍ଟମ, ଅର୍ଥ ବ୍ୟବସ୍ଥା ଏବଂ ମୁଦ୍ରା ରୁବଲ ଉପରେ ଏହାର ପ୍ରଭାବ ପଡ଼ିଛି। ଏବେ ରୁଷିଆରୁ ସମ୍ପୂର୍ଣ୍ଣ ଭାବେ ତୈଳ ଓ ପ୍ରାକୃତିକ ଗ୍ୟାସ୍ ଆମଦାନୀ ବ୍ୟାନ୍ କରିବାକୁ ଆମେରିକା ଘୋଷଣା କରିସାରିଥିବାବେଳେ ରୁଷିଆ ନର୍ଡ ଷ୍ଟ୍ରିମ୍ ପାଇପ୍ଲାଇନ ଦେଇ ୟୁରୋପକୁ ହେଉଥିବା ପ୍ରାକୃତିକ ଗ୍ୟାସ୍ ଯୋଗାଣ ବନ୍ଦ କରିବାକୁ ଧମକ ଦେଇଛି। ଏଥିସହ ଯଦି ନାଟୋ ଦେଶଗୁଡ଼ିକ ଏପରି କରନ୍ତି ତେବେ ଆଗକୁ ଏନର୍ଜୀ ମାର୍କେଟରେ ବିରାଟ ବଡ଼ ସଙ୍କଟ ଦେଖାଯିବ ଏବଂ ଅଶୋଧିତ ତୈଳ ଦର ବ୍ୟାରେଲ ପିଛା ୩୦୦ ଡଲାର ଛୁଇଁବ ବୋଲି ରୁଷିଆ ଉପପ୍ରଧାନମନ୍ତ୍ରୀ ଆଲେକଜାଣ୍ଡର ନୋଭାକ୍ କହିଛନ୍ତି।
ଏକଘରକିଆ କରିବା ନିମନ୍ତେ ଆମେରିକା ଓ ୟୁରୋପୀୟ ଦେଶଗୁଡ଼ିକ ରଣନୀତି ପ୍ରସ୍ତୁତ କରିବାରେ ଲାଗିଛନ୍ତି। ତୈଳ, ଗ୍ୟାସ୍, କୋଇଲା ଆଦି ପାଇଁ ରୁଷିଆ ଉପରେ ନିର୍ଭର ନ କରିବା ପାଇଁ ବିକଳ୍ପ ଚିନ୍ତା କରୁଛନ୍ତି। ଏଥିନିମନ୍ତେ ଆସନ୍ତା ୧୦, ୧୧ ତାରିଖରେ ବୈଠକ ଆୟୋଜନ କରାଯିବାକୁ ସ୍ଥିର ହୋଇଛି। ୟୁରୋପୀୟ ସଂଘ (ଇୟୁ) ଦେଶଗୁଡ଼ିକ ପ୍ରାୟ ୫୦ ପ୍ରତିଶତ ଗ୍ୟାସ୍, କୋଇଲା ଆବଶ୍ୟକତା ପୂରଣ କରିବାକୁ ରୁଷିଆ ଉପରେ ନିର୍ଭରଶୀଳ। ଏଥିସହ ପ୍ରାୟ ଏକ ତୃତୀୟାଂଶ ତୈଳ ସେମାନେ ରୁଷିଆରୁ ଆମଦାନୀ କରିଥାନ୍ତି। ରୁଷିଆରୁ ଆସୁଥିବା ତୈଳ ଓ ଗ୍ୟାସ୍ ଆମଦାନୀ ଚଳିତ ବର୍ଷ ୮୦ ପ୍ରତିଶତ କମ୍ କରିବାକୁ ଲକ୍ଷ୍ୟ ରଖାଯାଇଥିବା ଇୟୁ ପକ୍ଷରୁ ଜଣାଯାଇଛି। ୟୁକ୍ରେନ୍ ଉପରେ ରୁଷିଆ ଆକ୍ରମଣ କରିବା ପରେ ଜର୍ମାନୀ ୧୧ ବିଲିୟନ ଡଲାରର ନର୍ଡ ଷ୍ଟ୍ରିମ୍-୨ ପାଇପ୍ଲାଇନ ପ୍ରୋଜେକ୍ଟ ବାତିଲ କରିଥିଲା। ଏବେ ଜର୍ମାନୀକୁ ଯାଇଥିବା ମୁଖ୍ୟ ପାଇପ୍ଲାଇନକୁ ବନ୍ଦ କରିଦେବାକୁ ରୁଷିଆ ଧମକ ଦେଇଛି। ୟୁକ୍ରେନ୍ରେ ଯୁଦ୍ଧ ଜାରି ଯୋଗୁ ଅଶୋଧିତ ତୈଳ ଦର ବ୍ୟାରେଲ ପିଛା ୧୩୯ରେ ପହଞ୍ଚିଛି, ଯାହା କି ୨୦୦୮ ପରଠାରୁ ସର୍ବାଧିକ। ଅପରପକ୍ଷେ ଆମେରିକା ଓ ଅନ୍ୟ ଦେଶ ଜାରି କରିଥିବା କଟକଣାର ପ୍ରଭାବର ମୁକାବିଲା କରିବାକୁ ରୁଷିଆ ସମର୍ଥ ବୋଲି ନୋଭାକ କହିଛନ୍ତି। ଆମେରିକା ଓ ଇୟୁ ରୁଷିଆରୁ ତୈଳ ଏବଂ ଗ୍ୟାସ୍ ଆମଦାନୀ ସମ୍ପୂର୍ଣ୍ଣ ବନ୍ଦ କରିଦେଲେ ମଧ୍ୟ ଏହାର ବିକ୍ରି ପାଇଁ ଅନ୍ୟ ବିକଳ୍ପ ଥିବା ନୋଭାକ ପ୍ରକାଶ କରିଛନ୍ତି।