କ୍ୱିଭ୍,୨୯ ।୩: ଏକ ମାସରୁ ଅଧିକ ସମୟ ଧରି ଚାଲିଲାଣି ରୁଷିଆ-ୟୁକ୍ରେନ୍ ଯୁଦ୍ଧ । ଏଥିରେ ଶହ ଶହ ସେନାଙ୍କ ସମେତ ବହୁ ସାଧାରଣ ନାଗରିକଙ୍କର ମୃତ୍ୟୁ ବି ହେଲାଣି । କେବଳ ସେତିକି ନୁହେଁ ଏହି ଯୁଦ୍ଧରେ ବହୁ ଧନ ମଧ୍ୟ ହରାଇଲେଣି ଉଭୟ ଦେଶ । ମିଳିଥିବା ସୂଚନା ଅନୁଯାୟୀ, ପାଖାପାଖି ସାଢେ ୪ କୋଟି ଜନବସତି ବିଶିଷ୍ଟ ୟୁକ୍ରେନ ଉପରେ ରୁଷିଆ ଆକ୍ରମଣ କରିବା ପରେ ଏଠାକାର ସ୍ଥିତି ଖୁବ୍ ଖରାପ ହୋଇ ପଡିଛି । ଏଠାକାର ପ୍ରାୟ ୪୦ ଲକ୍ଷ ଲୋକ ଦେଶ ଛାଡି ପଡୋଶୀ ଦେଶକୁ ଚାଲିଯାଇଛନ୍ତି । ଏମାନଙ୍କ ମଧ୍ୟରୁ ୯୮ ପ୍ରତିଶତ ବୟସ୍କ ଓ ଶିଶୁ ରହିଛନ୍ତି । ମହିଳାମାନେ ବି ବହୁ ସଂଖ୍ୟାରେ ଦେଶ ଛାଡି ପଡୋଶୀ ଦେଶ ଚାଲିଯାଇଛନ୍ତି । ଏମାନଙ୍କ ମଧ୍ୟରୁ ସର୍ବାଧିକ ୨୩ଲକ୍ଷ ଲୋକ ପୋଲାଣ୍ଡରେ ଶରଣ ନେଇଥିବା ବେଳେ ୬ ଲକ୍ଷ ରୋମାନିଆରେ ଶରଣ ନେଇଛନ୍ତି । ମିଳିତ ଜାତିସଂଘ କହିଛି ଦ୍ୱିତୀୟ ବିଶ୍ୱଯୁଦ୍ଧ ପରେ ଏହା ସବୁଠାରୁ ବଡ ଶରଣାର୍ଥୀ ସଙ୍କଟ । ଆଗକୁ ସ୍ଥିତି ଆହୁରି ବିଗିଡିପାରେ । ତେବେ ୪୦ ଲକ୍ଷ ପଳାୟନ କରିବା ପରେ ଏବେବି ୟୁକ୍ରେନ୍ରେ ପ୍ରାୟ୧୦ ଲକ୍ଷ ଲୋକ ଯୁଦ୍ଧ ଅଞ୍ଚଳରେ ଫସି ରହିଥିବା କୁହାଯାଏ ।