କିଭ୍,୨୫ା୨: ଦ୍ୱିତୀୟ ବିଶ୍ୱଯୁଦ୍ଧ ପରେ ୟୁକ୍ରେନ୍ରେ ଲଢ଼ାଯାଉଛି ୟୁରୋପର ସବୁଠୁ ଲମ୍ବା ଲଢ଼େଇ। ରୁଷିଆର ଏହି ଆକ୍ରମଣକୁ ଶୁକ୍ରବାର ବର୍ଷେ ପୂରଣ ହୋଇଛି। ସଂଘର୍ଷର ବର୍ଷପୂର୍ତ୍ତି ଅବସରରେ ୟୁକ୍ରେନ୍ ରାଷ୍ଟ୍ରପତି ଭୋଲୋଡିମିର ଜେଲେନ୍ସ୍କି କହିଛନ୍ତି, ଆମ ଦେଶ ସାରା ବିଶ୍ୱକୁ ପ୍ରେରଣା ଦେଇଛି। ୟୁକ୍ରେନ୍ ପୃଥିବୀକୁ ଏକାଠି କରିଛି। ବୁଚା, ଇରପିନ୍ ଓ ମାରିଉପୋଲ୍ ଭଳି ସହର ଆଜି ‘ଦୁର୍ଜୟ ରାଜଧାନୀ’ ସାଜି ରୁଷିଆର ଯୁଦ୍ଧ ଅପରାଧ ବିରୋଧରେ ପ୍ରତିରୋଧର ପ୍ରତୀକ। ରୁଷୀୟ ହତ୍ୟାକାରୀଙ୍କୁ ଦଣ୍ଡିତ ନ କରିବା ଯାଏ ଆମେ ବିଶ୍ରାମ ନେବୁ ନାହିଁ ବୋଲି ଜେଲେନ୍ସ୍କି ସୋସିଆଲ ମିଡିଆରେ ଏକ ଭିଡିଓ ମେସେଜ୍ ଦେଇଛନ୍ତି।
ରାଷ୍ଟ୍ରପତି ଭ୍ଲାଡିମିର ପୁଟିନ୍ ୟୁକ୍ରେନ୍ ଆକ୍ରମଣ ପାଇଁ ନିଜ ସେନାକୁ ନିର୍ଦ୍ଦେଶ ଦେବା ପରଠାରୁ ଉଭୟ ପକ୍ଷର ୧,୫୦,୦୦୦ ଜଣ ନିହତ ହେଲେଣି। ଅନେକ ଲକ୍ଷ ୟୁକ୍ରେନୀୟ ବିସ୍ଥାପିତ ହେଲେଣି। ଏଥିରେ କ୍ଷୁବ୍ଧ ପାଶ୍ଚାତ୍ୟ ରୁଷିଆ ଉପରେ କଠୋର କଟକଣା ଜାରି କରିଛି। ୟୁକ୍ରେନ୍କୁ ମାନବୀୟ ସହାୟତା ପଠାଇବା ସହ ମସ୍କୋକୁ କଡ଼ା ଚେତାବନୀ ମଧ୍ୟ ଦେଇଛି। ଆମେରିକା ଏବଂ ଏହାର ଜି୭ ସହଯୋଗୀ ରାଷ୍ଟ୍ର ସମୂହ ଶୁକ୍ରବାର ଆହୁରି ଅନେକ କଟକଣା ଲଗାଇବାକୁ ନିଷ୍ପତ୍ତି ନେଇଛନ୍ତି। ଆମେରିକାର ଜାତୀୟ ସୁରକ୍ଷା ପରାମର୍ଶଦାତା (ଏନ୍ଏସ୍ଏ) ଜେକ୍ ସୁଲିଭାନ୍ କହିଛନ୍ତି, ଓ୍ବାଶିଂଟନ ୟୁକ୍ରେନ୍କୁ ଆହୁରି ୨ ବିଲିୟନ ଡଲାର ମୂଲ୍ୟର ସାମରିକ ସହାୟତା ପ୍ୟାକେଜ ପଠାଇବ। ଗତ ୨୦ ତାରିଖରେ ଆମେରିକା ରାଷ୍ଟ୍ରପତି ଜୋ ବାଇଡେନ୍ ଅଚାନକ କିଭ୍ ଗସ୍ତ କରି ବିଶ୍ୱକୁ ଚକିତ କରିଦେଇଥିଲେ। ଯୁଦ୍ଧ ପ୍ରଭାବିତ ୟୁକ୍ରେନ୍ ସହ ଆମେରିକା ସର୍ବଦା ଛିଡ଼ାହୋଇ ରହିବ ବୋଲି ପ୍ରତିଶ୍ରୁତି ଦେଇଥିଲେ। ବର୍ଷକ ପରେ ବି କିଭ୍ ତିଷ୍ଠିରହିଛି। ଗଣତନ୍ତ୍ର ତିଷ୍ଠିଛି। ଆମେରିକା ଓ ବିଶ୍ୱ ୟୁକ୍ରେନ୍ ସହ ରହିଥିବା ବାଇଡେନ୍ ଟୁଇଟ୍ କରିଥିଲେ। ଯୁଦ୍ଧର ବର୍ଷପୂର୍ତ୍ତି ଅବସରରେ ୟୁକ୍ରେନ୍ ଉପରେ ବିଶ୍ୱବାସୀ ସହଯୋଗ, ସହାନୁଭୂତି ଓ ସମର୍ଥନ ଅଜାଡ଼ି ଦେଇଛନ୍ତି। ପ୍ୟାରିସ୍ର ଇଫେଲ୍ ଟାଓ୍ବାରକୁ ୟୁକ୍ରେନୀୟ ପତାକା ରଙ୍ଗ(ହଳଦିଆ ଓ ନୀଳ)ର ଆଲୋକମାଳାରେ ସଜ୍ଜିତ କରାଯାଇଛି। ଲଣ୍ଡନସ୍ଥିତ ଏକ ୟୁକ୍ରେନୀୟ ଚର୍ଚ୍ଚରେ ବ୍ରିଟିଶ୍ ଏମ୍ପି ଏବଂ କୂଟନୀତିଜ୍ଞମାନେ ପ୍ରାର୍ଥନା କରିଛନ୍ତି। ପୁଟିନ୍ ନିଜ ବିସ୍ତାରବାଦୀ ଲକ୍ଷ୍ୟ ହାସଲ କରିପାରିବେ ନାହିଁ ବୋଲି ଜର୍ମାନୀ ଚାନ୍ସଲର ଓଲାଫ୍ ସ୍କୋଲ୍ଜ କହିଥିବାବେଳେ ଆକ୍ଟିଭିଷ୍ଟମାନେ ବର୍ଲିନ୍ସ୍ଥିତ ମସ୍କୋର ଦୂତାବାସ ସମ୍ମୁଖରେ ୟୁକ୍ରେନ୍ରୁ ଅଣାଯାଇଥିବା ଏକ ଧ୍ୱସ୍ତ ରୁଷୀୟ ଟ୍ୟାଙ୍କ ରଖି ପ୍ରତିବାଦ ଜଣାଇଛନ୍ତି। ୟୁକ୍ରେନ୍ ପ୍ରତି ଜର୍ମାନୀର ସମର୍ଥନକୁ ସାରା ବିଶ୍ୱ ସ୍ବୀକୃତି ପ୍ରଦାନ କରିଥିବା ଜଣେ ଆୟୋଜକ କହିଛନ୍ତି।