ବୁଚାରେଷ୍ଟ,୨୬ ।୨: ୟୁକ୍ରେନ୍ ଓ ରୁଷିଆ ମଧ୍ୟରେ ଯୁଦ୍ଧ ଆରମ୍ଭ ହୋଇଯିବା ପରେ ସେଠାରେ ଫସି ରହିଥିବା ଭାରତୀୟଙ୍କ ପ୍ରଥମ ଦଳ ଶୁକ୍ରବାର ସୁସେବା ବର୍ଡର ଦେଇ ରୋମାନିୟା ପହଞ୍ଚିଛନ୍ତି । ଏମାନଙ୍କ ମଧ୍ୟରେ ଅଧିକାଂଶ ଛାତ୍ର ରହିଥିବା ବେଳେ ପ୍ରାୟ ୪୭୦ ଜଣ ଭାରତୀୟ ରୋମାନିଆ ପହଞ୍ଚିଥିବା ସୂଚନା ମିଳିଛି । ଏମାନଙ୍କୁ ଏବେ ରୋମାନିୟାର ରାଜଧାନୀ ବୁଚାରେଷ୍ଟ ପଠାଇ ଦିଆଯାଉଛି । ସେଠାରୁ ସେମାନେ ଭାରତ ଫେରିବେ । ବୈଦେଶିକ ମନ୍ତ୍ରଣାଳୟର ପ୍ରବକ୍ତା ଅରିନ୍ଦମ ବାଗଚି ଟୁଇଟ କରି ଏହି ସୂଚନା ଦେଇଛନ୍ତି ।
ଏବେ ଏମାନଙ୍କୁ ଉଦ୍ଧାର କରିବା ଲାଗି ବୁଚାରେଷ୍ଟକୁ ଏୟାର ଇଣ୍ଡିଆର ଦୁଇଟି ବିମାନ ପଠଇବାର ବ୍ୟବସ୍ଥା କରାଯାଉଛି । ସୂଚନାଯୋଗ୍ୟ, ଯୁଦ୍ଧର ଦ୍ୱିତୀୟ ଦିନରେ ୟୁକ୍ରେନର ରାଜଧାନୀ କ୍ୱିଭ୍ ଓ ଅନ୍ୟ ସହରରେ ରୁଷିଆ ପକ୍ଷରୁ ବିମାନ ଆକ୍ରମଣ କରାଯାଇଛି । ଏଥିପାଇଁ ଲୋକେ ୟୁକ୍ରେନ୍ ଛାଡିବାକୁ ବାଧ୍ୟ ହେଉଛନ୍ତି । ଜାତିସଂଘର ସୂଚନା ଅନୁଯାୟୀ, ପାଖାପାଖି ୫୦ ହଜାର ଲୋକ ୟୁକ୍ରେନ୍ ଛାଡି ବାହାରକୁ ଚାଲି ଯାଇଛନ୍ତି ।
