କ୍ୱିଭ,୫ ।୩: ୟୁକ୍ରେନ୍ ଉପରେ ରୁଷିଆ ଲଗାତାର ଆକ୍ରମଣ କରି ଚାଲିଛି । ରୁଷିଆ ସେନା ୟୁକ୍ରେନର ସେନା ବେସକୁ ଏକ ପ୍ରକାର ନଷ୍ଟ କରି ଦେଇଥିବା ବେଳେ ଆଉ ଯାହା କିଛି ବାକି ରହିଛି ତା ଉପରେ ଲଗାତାର ବୋମା ବର୍ଷଣ କରାଯାଉଛି । ଅନ୍ୟପଟେ ୟୁକ୍ରେନ୍ ବାରମ୍ବାର ଦାବି କରି ଚାଲିଛି କି ରୁଷିଆ ତ’ର ରାଷ୍ଟ୍ରପତିଙ୍କୁ ହତ୍ୟା କରିବାକୁ ଉଦ୍ୟମ କରୁଛି । ଏବେ ୟୁକ୍ରେନ୍ ରାଷ୍ଟ୍ରପତିଙ୍କ ଘର ବାହାରୁ ଏକ ରକେଟ ଖଣ୍ଡ ମିଳିଛି । ଯାହାକୁ ନେଇ ଚର୍ଚ୍ଚା ଯୋର ଧରିଛି । ଆଉ ଏହି ରକେଟ ଖଣ୍ଡକୁ ନେଇ ୟୁକ୍ରେନ୍ ରାଷ୍ଟ୍ରପତି ଭୋଲୋଡେମିର ଜେଲେନ୍ସ୍କି କହିଛନ୍ତି, ଲକ୍ଷ୍ୟ ଚ୍ୟୁତ ହୋଇଛି । ଏହା ରାଷ୍ଟ୍ରପତିଙ୍କ ଉପରକୁ ଆକ୍ରମଣ ବୋଲି କୁହାଯାଉଛି ।
ସୂଚନାଯୋଗ୍ୟ, ଏହା ପୂର୍ବରୁ ଦାବି କରାଯାଇଥିଲା କି ୟୁକ୍ରେନ୍ ରାଷ୍ଟ୍ରପତିଙ୍କୁ ୩ ଥର ହତ୍ୟା ଉଦ୍ୟମ କରାଯାଇଥିବା ବେଳେ ସବୁଥର ବିଫଳ ହୋଇଛି । ଆଉ ଏଥର ବି ହତ୍ୟା ଉଦ୍ୟମ କରାଯାଉଥିବା ବେଳେ ଲକ୍ଷ୍ୟ ଚ୍ୟୁତ ହୋଇଛି । ଅନ୍ୟପଟେ ରୁଷିଆ କହିଛି କି ଜେଲେନ୍ସ୍କି ୟୁକ୍ରେନ୍ ଛାଡି ପଳାଇ ଯାଇଛନ୍ତି । ଏବେ ସେ ପୋଲାଣ୍ଡରେ ଶରଣ ନେଇଥିବା ରୁଷିଆ କହୁଥିବା ବେଳେ ୟୁକ୍ରେନ୍ କିନ୍ତୁ ଏହାକୁ ଖଣ୍ଡନ କରିଛି ।