ନୂଆଦିଲ୍ଲୀ,୯।୩: ୟୁକ୍ରେନ ଏବଂ ରୁଷିଆ ମଧ୍ୟରେ ଯୁଦ୍ଧ ଚାଲିଛି। ୟୁକ୍ରେନରେ ଫସିଥିବା ଲୋକଙ୍କୁ ସ୍ବଦେଶ ଫେରାଇ ଆଣିବାକୁ ଭାରତ ସରକାର ଲଗାତର ଉଦ୍ୟମ କରୁଛନ୍ତି। ତେବେ ବୁଧବାର ଭାରତର ପ୍ରୟାସ ଉପରେ କେନ୍ଦ୍ର ମନ୍ତ୍ରୀ ପୀୟୁଷ ଗୋୟଲ ଗୁରୁତ୍ୱପୂର୍ଣ୍ଣ ସୂଚନା ଦେଇଛନ୍ତି। ସେ କହିଛନ୍ତି, ୟୁକ୍ରେନରୁ ଭାରତୀୟ ଛାତ୍ର ଆଣିବା ସହଜ ନୁହେଁ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଅକ୍ଲାନ୍ତ ପରିଶ୍ରମ ପରେ ଏହି କଷ୍ଟସାଧ୍ୟ କାର୍ଯ୍ୟ ସଫଳତାର ସହିତ ସମାପ୍ତ ହୋଇଛି।
ଗୋଏଲ ଆହୁରି ମଧ୍ୟ କହିଛନ୍ତି, ତିନି ସପ୍ତାହ ମଧ୍ୟରେ ୨୦ ହଜାରରୁ ଅଧିକ ଭାରତୀୟ ନାଗରିକ ସେଠାରୁ ଅଣାଯାଇଛି। ସେମାନଙ୍କ ମଧ୍ୟରୁ ଅଧିକାଂଶ ଛାତ୍ରୀଛାତ୍ର। ଏତେ ସଂଖ୍ୟକ ଲୋକଙ୍କୁ ସେଠାରୁ ଆଣିିବା ନିହାତି ଗର୍ବର ବିଷୟ। ଆଜି ସମଗ୍ର ଦେଶରେ ଏକ ବିଶ୍ୱାସ ରହିଛି ଯେ କୌଣସି ସଙ୍କଟ ସମୟରେ ଭାରତ ସରକାର ଏବଂ ଭାରତର ଲୋକପ୍ରିୟ ପ୍ରଧାନମନ୍ତ୍ରୀ ଆମକୁ ସଙ୍କଟରୁ ବାହାର କରିବେ। ପ୍ରଧାନମନ୍ତ୍ରୀ ପ୍ରାୟ ୧୧ ଥର ବିଶ୍ୱର ବଡ ନେତାଙ୍କ ସହ କଥା ହୋଇଥିଲେ। ୟୁକ୍ରେନରେ ଫସିଥିବା ଲୋକଙ୍କ ଉଦ୍ଧାର ପାଇଁ କୂଟନୈତିକ ସ୍ତରରେ ଜୋରଦାର ଉଦ୍ୟମ ହୋଇଥିଲା। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ନିଜେ ଏହି ବିଷୟକୁ ଗମ୍ଭୀରତାର ସହ ନେଇଥିଲେ। ସେ ୮ଟି ଉଚ୍ଚ ସ୍ତରୀୟ ବୈଠକ କରିଥିଲେ। ପ୍ରତ୍ୟେକ ବୈଠକ ପରେ ନାଗରିକଙ୍କୁ କିପରି ଭାରତକୁ ଫେରାଇ ନିଆଯିବ ସେନେଇ କଠୋର ପଦକ୍ଷେପ ନିଆଯାଇଥିଲା। ସଙ୍କଟ ସମୟରେ ପ୍ରଧାନମନ୍ତ୍ରୀ ଏହି ଅଭିଯାନର ନେତୃତ୍ୱ ନେଇଛନ୍ତି। ଅନ୍ୟ କୌଣସି ଦେଶର ଏପରି ଉଦାହରଣ ନାହିଁ, ଯାହା ନାଗରିକମାନଙ୍କୁ ଏତେ ଗମ୍ଭୀରତାର ସହିତ ଫେରାଇ ଆଣିବା କାର୍ଯ୍ୟକୁ ନେଇଥିଲା। ଆଜି ଆମେ ଗର୍ବିତ ଯେ ସେଠାରେ ଥିବା ଛାତ୍ରମାନଙ୍କର ଶେଷ ବ୍ୟାଚ ଏବେ ଯୁଦ୍ଧ କ୍ଷେତ୍ରରୁ ବାହାରି ନିକଟ ଦେଶ ଦେଇ ଆସୁଛନ୍ତି। ଏହାସହ ଏହି କାର୍ଯ୍ୟରେ ଜଡିତ ସମସ୍ତ ସଂଗଠନ ଏବଂ କର୍ମଚାରୀଙ୍କୁ ଧନ୍ୟବାଦ ଦେବାକୁ ଚାହୁଁଛି ବୋଲି ସେ କହିଛନ୍ତି।
ସେହିପରି ଗୋଏଲ କଂଗ୍ରେସକୁ ଟାର୍ଗେଟ କରିଛନ୍ତି। ଦୁର୍ଭାଗ୍ୟବଶତଃ, କଂଗ୍ରେସ ଏବଂ ଅନ୍ୟାନ୍ୟ ରାଜନୈତିକ ଦଳ ଏବଂ କିଛି ମୁଖ୍ୟମନ୍ତ୍ରୀ ମଧ୍ୟ ଏହା ଉପରେ ରାଜନୀତି କରିବାକୁ ଚେଷ୍ଟା କରିଥିଲେ। ସଙ୍କଟ ସମୟରେ ସମସ୍ତ ଲୋକ ଏକଜୁଟ ହୋଇଥିଲେ ମଧ୍ୟ ଏହି ସଙ୍କଟରେ ଲୋକଙ୍କୁ ସାନ୍ତ୍ୱନା ଦେବା ପରିବର୍ତ୍ତେ ବିରୋଧୀ ଦଳର ନେତାମାନେ ମିଥ୍ୟା ପ୍ରଚାରରେ ଲିପ୍ତ ଥିବା ସେ କହିଛନ୍ତି।