ମସ୍କୋ/କ୍ୱିଭ,୩।୧୨ : ଗତ ୧୦ ମାସ ଧରି ଚାଲିଥିବା ରୁଷିଆ-ୟୁକ୍ରେନ ଯୁଦ୍ଧରେ ଆଣବିକ ଅସ୍ତ୍ରଶସ୍ତ୍ର ବ୍ୟବହାର କରିବାର ଆଶଙ୍କା ଏବେ ବୃଦ୍ଧି ପାଇଛି। ୟୁକ୍ରେନ ସେନା ଦାବି କରିଛି ଯେ ରୁଷିଆ ବର୍ତ୍ତମାନ ଆଣବିକ କ୍ଷେପଣାସ୍ତ୍ର ବ୍ୟବହାର କରିବାକୁ ପ୍ରସ୍ତୁତ ହେଉଛି। ବିଶେଷଜ୍ଞମାନେ କହିଛନ୍ତି ଯେ ଯଦି ଆଣବିକ ଆକ୍ରମଣ ହୁଏ ତେବେ କିଛି ଘଣ୍ଟା ମଧ୍ୟରେ ଲକ୍ଷ ଲକ୍ଷ ଲୋକଙ୍କ ମୃତ୍ୟୁ ଘଟିବ।
ୟୁକ୍ରେନ ପ୍ରତିରକ୍ଷା ବିଶେଷଜ୍ଞମାନେ କହିଛନ୍ତି ଯେ ଆଣବିକ ଆକ୍ରମଣ ପାଇଁ ବ୍ୟବହୃତ ପୂର୍ବତନ ସୋଭିଏତ କ୍ଷେପଣାସ୍ତ୍ର ଯୁଦ୍ଧକ୍ଷେତ୍ରରେ ମିଳିଛି। ବିଶେଷଜ୍ଞମାନେ ଏହି କ୍ଷେପଣାସ୍ତ୍ରର ଖଣ୍ଡଗୁଡ଼ିକୁ ଗଣମାଧ୍ୟମକୁ ମଧ୍ୟ ଦେଖାଇଥିଲେ।
ରୁଷିଆ ୟୁକ୍ରେନର ଦାବିକୁ ଏପର୍ଯ୍ୟନ୍ତ ନିଶ୍ଚିତ କରି ନାହିଁ।କିନ୍ତୁ ୟୁରୋପୀୟ ଦେଶମାନଙ୍କର ନିଦ ଏହାକୁ ନେଇ ହଜି ଯାଇଛି। ୟୁକ୍ରେନ ଦାବି କରିଛି ଯେ ଆଣବିକ କ୍ଷେପଣାସ୍ତ୍ର ସହିତ ରୁଷିଆ ୟୁକ୍ରେନ ଉପରେ ଆକ୍ରମଣ କରିଛି। ୟୁକ୍ରେନର ପଶ୍ଚିମ ଭାଗରେ ଏହି ଆକ୍ରମଣ କରାଯାଇଥିଲା।
ୟୁକ୍ରେନ ସାମରିକ ଅଧିକାରୀ ମାଇକୋଲା ଡାନିଲୁକ ଗଣମାଧ୍ୟମକୁ କହିଛନ୍ତି ଯେ ରୁଷିଆ ଲଭିଭ ଏବଂ ଖେଲମନିଟସ୍କି ଅଞ୍ଚଳରେ ଆଣବିକ କ୍ଷେପଣାସ୍ତ୍ର ବ୍ୟବହାର କରିଛି। ସେ ଏକ୍ସ-୫୫ କ୍ରୁଜ କ୍ଷେପଣାସ୍ତ୍ରର କିଛି ଅଂଶ ବିଶେଷ ମିଡିଆକୁ ମଧ୍ୟ ଦେଖାଇଥିଲେ। ଦେଶର ବାୟୁ ପ୍ରତିରକ୍ଷା ପ୍ରଣାଳୀକୁ ହଟାଇବା ଉଦ୍ଦେଶ୍ୟରେ ଏହି ଆକ୍ରମଣ କରାଯାଉଛି ବୋଲି ସେ କହିଛନ୍ତି। ସେ କହିଛନ୍ତି ଯେ ଏହି କ୍ଷେପଣାସ୍ତ୍ରଗୁଡିକର ଖଣ୍ଡଗୁଡ଼ିକରେ ରେଡିଓଆକ୍ଟିଭିଟିର ପରୀକ୍ଷଣରେ ଅସ୍ବାଭାବିକ ସ୍ତର ଦେଖାଯାଇ ନାହିଁ।
