କ୍ୱିଭ/ଖାର୍କିଭ,୨୩ ।୬: ରୁଷିଆ ସେନା ୟୁକ୍ରେନର ଦ୍ୱିତୀୟ ବଡ ସହର ଖାର୍କିଭ ଓ ଏହାର ଆଖପାଖ ଅଞ୍ଚଳରେ ମଙ୍ଗଳବାର ରାତି ଓ ବୁଧବାର ସକାଳେ ରକେଟ୍ ବର୍ଷା କରିଥିବା ସୂଚନା ମିଳିଛି । ଏଥିରେ ଅତିକମରେ ୧୫ ଜଣଙ୍କ ମୃତ୍ୟୁ ହୋଇଥିବ କୁହାଯାଉଛି । ଏହାସହ ୧୬ରୁ ଅଧିକ ଆହତ ବି ହୋଇଛନ୍ତି । ଏହାର ଉଦ୍ଦେଶ୍ୟ ରହିଛି ୟୁକ୍ରେନ ସେନାଙ୍କୁ ମୁଖ୍ୟ ଯୁଦ୍ଧସ୍ଥଳରୁ ହଟାଇ ସହରକୁ ସୁରକ୍ଷା ଦେବାକୁ ବାଧ୍ୟ କରିବା ।
ସୂଚନାଯୋଗ୍ୟ, ଖାର୍କିଭରେ ସାଧାରଣ ଜୀବନ ପୁଣିଥରେ ଆରମ୍ଭ ହେବାକୁ ଯାଉଥିବା ବେଳେ କିଛି ସପ୍ତାହ ହେବ ଏଠାରେ ଭିଷଣ ଆକ୍ରମଣ ଫଳରେ ସ୍ଥିତି ପୁଣି ବିଗିଡିବାରେ ଲାଗିଛି । ଗତ ମାସରେ ୟୁକ୍ରେନ୍ ସେନା ଖାର୍କିଭରୁ ରୁଷିଆ ସେନାଙ୍କୁ ହଟାଇ ଦେଇଥିଲେ । ୟୁକ୍ରେନ୍ ଅଧିକାରୀମାନେ କହିଛନ୍ତି ରୁଷିଆ ସେନାଙ୍କ ଦ୍ୱାରା ହୋଇଥିବା ଆକ୍ରମଣରେ ଖାର୍କିଭ ବାହାରେ ଥିବା ଘର ଗୁଡିକ ବି ନଷ୍ଟ ହୋଇଯାଇଛି ।
ଏହାପରେ ୟୁକ୍ରେନ ରାଷ୍ଟ୍ରପତିଙ୍କ ପରାମର୍ଶଦାତା ଓଲେସ୍କେ ଏରେତୋପିଜ ଏକ ଭିଡିଓ ବାର୍ତ୍ତାରେ କହିଛନ୍ତି ରୁଷିଆ ସେନାଙ୍କ ଦ୍ୱାରା ସେହିଭଳି ଭାବେ ଆକ୍ରମଣ କରାଯାଇଛି ଯେଉଁଭଳି ଭାବେ ମୋରିଉପୋଲରେ କରାଯାଇଥିଲା । ଏହାର ଗୋଟିଏ ଲକ୍ଷ୍ୟ ଲୋକଙ୍କୁ ଭୟଭୀତ କରାଇବା । ଯଦି ରୁଷିଆ ସେନା ଏଭଳି କାର୍ଯ୍ୟ ଜାରି ରଖିବ ତେବେ ଆମକୁ ଏହାର ପ୍ରତିକ୍ରିୟା ଦେବାକୁ ପଡିବ । ଏଥିପାଇଁ ଆମକୁ ସେନାଙ୍କୁ ସହରକୁ ଆଣିବାକୁ ପଡିବ ।
