ନୂଆଦିଲ୍ଲୀ,୧୮ ।୯: ଚାଇନା ସହ ଲାଗି ରହିଥିବା ସୀମା ବିବାଦ ମଧ୍ୟରେ ରୁଷିଆ ରାଷ୍ଟ୍ରପତି ଭ୍ଲାଦିମିର ପୁତିନ ଶୁକ୍ରବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦଙ୍କ ସହ ଟେଲିଫୋନ ଯୋଗେ କଥା ହୋଇଛନ୍ତି । ପୁତିନ ରୁଷିଆ ଓ ଭାରତ ମଧ୍ୟରେ ବିଶେଷ ଓ ବିଶେଷାଧିକାର ପ୍ରାପ୍ତ ସାମରିକ ଭାଗିଦାରିକୁ ଆହୁରି ମଜଭୁତ କରିବାକୁ କଥା ଦେଇଥିବା ବିଷୟକୁ ପୁଣିଥରେ ମନେ ପକାଇଥିଲେ । ଏହାସହ କରୋନା ସଂକ୍ରମଣ ପରେ ବି ଦ୍ୱିପାକ୍ଷିତ କଥାବାର୍ତ୍ତା ଜାରି ରହିଥିବାରୁ ପୁତିନ ଏହାର ପ୍ରଶଂସା କରିଥିଲେ । ଏହି ସୂଚନା ବୈଦେଶିକ ମନ୍ତ୍ରଣାଳୟ ପକ୍ଷରୁ ଦିଆଯାଇଛି । ବୈଦେଶିକ ମନ୍ତ୍ରଣାଳୟ କହିଛି ଚଳିତ ବର୍ଷ ରୁଷିଆ ଅଧ୍ୟକ୍ଷତାରେ ଅନୁଷ୍ଠିତ ଏସ୍ସିଓ ଓ ବ୍ରିକ୍ସ ସମ୍ମିଳନୀକୁ ନେଇ ପୁତିନଙ୍କୁ ଧନ୍ୟବାଦ ଦେଇଥିଲେ ମୋଦି । ଏହାସହ ଚଳିତ ବର୍ଷ ଶେଷକୁ ଆୟୋଜିତ ହେବାକୁ ଥିବା ଏସ୍ସିଓ ଓ ବ୍ରିକ୍ସ ଶିଖର ସମ୍ମିଳନୀରେ ଯୋଗ ଦେବାକୁ ଉତ୍ସାହିତ ଥିବା ପ୍ରକାଶ କରିଥିଲେ । ଏହାପରେ ଭାରତ ଦ୍ୱାରା ଆୟୋଜିତ ହେବାକୁ ଥିବା ଏସ୍ସିଓ ସମ୍ମିଳନୀର ଶାସନାଧ୍ୟକ୍ଷ ପରିଷଦଙ୍କ ସହ କଥା ହେବାକୁ ସେ ଇଚ୍ଛା ପ୍ରକାଶ କରିଛନ୍ତି । ମନ୍ତ୍ରଣାଳୟ କହିଛି ପ୍ରଧାନମନ୍ତ୍ରୀ ମୋଦି ଭାରତ ସହ ଦ୍ୱିପାକ୍ଷିକ ସମ୍ପର୍କକୁ ମଜଭୁତ କରି୍ଥିବାରୁ ନିଜର ବ୍ୟକ୍ତିଗତ ପ୍ରତିଶ୍ରୁତିକୁ ନେଇ ସେ ପୁତିନଙ୍କୁ ଧନ୍ୟବାଦ ଦେଇଛନ୍ତି ।