ନୂଆଦିଲ୍ଲୀ,୧୮ ।୯: ସାରା ବିଶ୍ୱରେ ବଢି ଚାଲିଥିବା କରୋନା ସଂକ୍ରମଣକୁ ଦେଖି ଏବେ ସମସ୍ତଙ୍କ ନଜର ରହିଛି କରୋନା ଭ୍ୟାକ୍ସିନ ବା ଟିକା ଉପରେ । କାରଣ କରୋନା ସଂକ୍ରମଣ ରୋକିବାକୁ ଏହା ଏକ ମାତ୍ର ମାଧ୍ୟମ ହେବ ବୋଲି କୁହାଯାଉଛି । ତେବେ ସବୁ ବିକାଶଶୀଳ ଦେଶ କରୋନା ଭ୍ୟାକ୍ସିନ ତିଆରି କାମରେ ଲାଗି ପଡିଥିବା ବେଳେ ଭାରତ ମଧ୍ୟ ଏ ଦିଗରେ ପଛରେ ନାହିଁ । କିନ୍ତୁ ସର୍ବ ପ୍ରଥମେ ରୁଷିଆ କରୋନା ଭାଇରସ ପାଇଁ ଭ୍ୟାକ୍ସିନ ତିଆରି କରିଥିବା ଦାବି କରିଛି । ଆଉ ଏହି ଭ୍ୟାକ୍ସିନର ନାଁ ରହିଛି ସ୍ପୁଟନିକ ଭି । ଭାରତକୁ ମଧ୍ୟ ଏହି ଭ୍ୟାକ୍ସିନ ରୁଷିଆ ଯୋଗାଇ ଦେବ ବୋଲି କଥା ଦେଇଛି । ହେଲେ ଏବେ ଭ୍ୟାକ୍ସିନ ସ୍ପୁଟନିକ ଭିକୁ ନେଇ ଚିନ୍ତା ବଢି ଗଲାଣି । ରୁଷିଆ ସ୍ୱାସ୍ଥ୍ୟମନ୍ତ୍ରୀଙ୍କ ସୂଚନା ଅନୁଯାୟୀ, ସ୍ପୁଟନିକ ଭି ଯେଉଁ ସ୍ୱେଚ୍ଛାସେବିଙ୍କୁ ଦିଆଯାଇଥିଲା ସେମାନଙ୍କ ମଧ୍ୟରୁ ୭ ଜଣରେ ଜଣଙ୍କଠାରେ ସ୍ୱାସ୍ଥ୍ୟ ସମସ୍ୟା ଦେଖାଯାଉଛି । ମସ୍କୋ ଟାଇମ୍ସକୁ ଦେଇଥିବା ଏକ ସାକ୍ଷାତ୍କାରରେ ସେ କହିଛନ୍ତି ଟିକା ନେଇଥିବା ପ୍ରାୟ ୧୪ ପ୍ରତିଶତ ଲୋକଙ୍କ ନିକଟରେ ଏହାର ପାଶ୍ୱର୍ ପ୍ରତିକ୍ରିୟା ଦେଖାଯାଇଛି । ଟିକା ନେଇଥିବା ଜଣେ ବ୍ୟକ୍ତିଙ୍କ ଅଭିଯୋଗ ଥିଲା ଯେ ସ୍ପୁଟନିକ ଭି ଟିକା ନେବା ପରେ ତାଙ୍କୁ ଦୁର୍ବଳ ଲାଗିବା ସହ ମାଂସପେଶୀରେ ଯନ୍ତ୍ରଣା ଆରମ୍ଭ ହୋଇଥିଲା । ହେଲେ ପୂର୍ବରୁ ସେ ଏକଥା ଜାଣିଥିବା ପ୍ରକାଶ କରିବା ସହ ପରଦିନ ଏହା ଠିକ୍ ହୋଇ ଯାଇଥିବା କହିଛନ୍ତି । ସୂଚନାଯୋଗ୍ୟ, ଭ୍ୟାକ୍ସିନ କ୍ଲିନିକାଲ ଟ୍ରାଏଲର ଫଳାଫଳ ସେପ୍ଟେମ୍ବର ୪ରେ ଦ ଲାଂସେଟ ଜର୍ନାଲରେ ପ୍ରକାଶ କାଇଥିଲା । ଏଥିରେ କୁହାଯାଇଥିଲା କି ଟିକା ୭୬ ଜଣ ଲୋକଙ୍କୁ ଦିଆଯାଇଛି । ଏହାପରେ ସମସ୍ତେ ସୁସ୍ଥ ଅଛନ୍ତି । ୨୧ ଦିନ ପରେ ସ୍ୱେଚ୍ଛାସେବୀଙ୍କ ଶରୀରରେ ଆଣ୍ଟିବଡି ପ୍ରସ୍ତୁତ ହୋଇଥିବା ଦେଖାଯାଇଛି ।