କିଭ୍,୯ା୪: ୟୁକ୍ରେନ୍ର କ୍ରାମାଟୋର୍ସ୍କ ରେଳ ଷ୍ଟେଶନକୁ ଶୁକ୍ରବାର ରୁଷୀୟ ସୈନ୍ୟ ଟାର୍ଗେଟ କରିଛନ୍ତି। ଆକାଶମାର୍ଗରୁ ରକେଟ ମାଡ଼ରେ ଏହା ଧ୍ୱସ୍ତବିଧ୍ୱସ୍ତ ହୋଇଯାଇଛି। ଆକ୍ରମଣ ସମୟରେ ସେଠାରେ ହଜାର ହଜାର ଲୋକ ଥିଲେ। ସେମାନଙ୍କ ମଧ୍ୟରୁ ୫୦ ଜଣ ନିହତ ଓ ଶତାଧିକ ଆହତ ହୋଇଛନ୍ତି। ମୃତାହତଙ୍କ ମଧ୍ୟରେ କେତେଜଣ ଶିଶୁ ଓ ମହିଳା ମଧ୍ୟ ଥିଲେ। ଏହି ବର୍ବରତାକୁ ୟୁକ୍ରେନ୍ ସମେତ ପାଶ୍ଚାତ୍ୟ ରାଷ୍ଟ୍ରଗୁଡ଼ିକ ଦୃଢ଼ ନିନ୍ଦା କରିଥିବାବେଳେ ରକେଟ ମାଡ଼ ପଛରେ ନିଜ ସମ୍ପୃକ୍ତିକୁ ମସ୍କୋ ଖଣ୍ଡନ କରିଛି।
ରୁଷିଆର ୟୁକ୍ରେନ୍ ଆକ୍ରମଣକୁ ଦେଢ଼ମାସ ପୂରିଛି। ଆମେରିକା ସମେତ ୟୁରୋପୀୟ ରାଷ୍ଟ୍ରଗୁଡ଼ିକର କଟକଣା ସତ୍ତ୍ୱେ ମସ୍କୋ ପଛଘୁଞ୍ଚା ଦେବାର ନାଁ ନେଉନାହିଁ। ରୁଷିଆ ରାଷ୍ଟ୍ରପତି ଭ୍ଲାଡିମିର ପୁଟିନ୍ ପ୍ରତିଶୋଧପରାୟଣ ହୋଇ ଦିନକୁ ଦିନ ଅଧିକ ଉଗ୍ର ହେବାରେ ଲାଗିଛନ୍ତି। ଶୁକ୍ରବାର ପୂର୍ବ ୟୁକ୍ରେନ୍ର କ୍ରାମାଟୋର୍ସ୍କ ରେଳ ଷ୍ଟେଶନରୁ ୟୁକ୍ରେନୀୟମାନେ ପ୍ରାଣ ବିକଳରେ ପଡ଼ୋଶୀ ଦେଶଗୁଡ଼ିକୁ ପଳାୟନ କରୁଥିବାବେଳେ ପୁଟିନ୍ଙ୍କ ସୈନ୍ୟ ସେଠାରେ ରକେଟ ମାଡ଼ କରିଥିଲେ। ଷ୍ଟେଶନ ଜନଗହଳିପୂର୍ଣ୍ଣ ଥିବାରୁ ଅନୂ୍ୟନ ୫୦ ଜଣ ପ୍ରାଣ ହରାଇଥିବା ସରକାରୀ ରେଲଓ୍ବେ କମ୍ପାନୀ ପକ୍ଷରୁ କୁହାଯାଇଛି। ଏଥିସହ ଶତାଧିକ ଆହତ ହୋଇଛନ୍ତି। ୟୁକ୍ରେନ୍ ରାଷ୍ଟ୍ରପତି ଭୋଲୋଡିମିର ଜେଲେନ୍ସ୍କି ଏହାକୁ ‘ଅନ୍ତହୀନ ପାପ’ ବୋଲି ଅଭିହିତ କରିଛନ୍ତି। ସାଧାରଣ ଜନତାଙ୍କୁ ରୁଷିଆର ଟାର୍ଗେଟକୁ ରୋକା ନ ଗଲେ ଏଭଳି ଅମାନବୀୟ ବର୍ବରତା ବଢ଼ିଚାଲିଥିବ ବୋଲି ସେ କହିଛନ୍ତି। ଇତିମଧ୍ୟରେ ଆମେରିକା ଭଳି ବ୍ରିଟେନ୍ ମଧ୍ୟ ପୁଟିନ୍ଙ୍କ ଦୁଇଝିଅ କାଟେରିନା ଟିଖୋନୋଭା ଏବଂ ମାରିଆ ଭୋରୋଣ୍ଟସୋଭାଙ୍କ ଉପରେ କଟକଣା ଜାରି କରିଛି। ତୁର୍କୀ, ବ୍ରିଟେନ୍ ଓ ଇଟାଲୀର ବହିର୍ବ୍ୟାପାର ମନ୍ତ୍ରୀମାନେ ଇସ୍ତାନବୁଲରେ ରୁଷିଆର ୟୁକ୍ରେନ୍ ଆକ୍ରମଣ ସମ୍ପର୍କରେ ଆଲୋଚନା କରିଛନ୍ତି। ଜାପାନ ୮ ରୁଷୀୟ କୂଟନୀତିଜ୍ଞଙ୍କୁ ବହିଷ୍କାର କରିଛି। ବ୍ରିଟେନ୍ ପ୍ରଧାନମନ୍ତ୍ରୀ ବୋରିସ୍ ଜନ୍ସନ ଜର୍ମାନୀ ଚାନ୍ସେଲର ଓଲାଫ୍ ସ୍କୋଲ୍ଜଙ୍କ ସହ ଆଲୋଚନା କରିଛନ୍ତି। ୟୁରୋପୀୟ କମିଶନ ମୁଖ୍ୟ ଉର୍ସୁଲା ଭୋନ୍ ଡେର ଲେୟେନ୍ ୟୁକ୍ରେନ୍ ରାଷ୍ଟ୍ରପତି ଜେଲେନ୍ସ୍କିଙ୍କ ସହ ଆଲୋଚନା ପାଇଁ କିଭ୍ ଗସ୍ତ କରିଛନ୍ତି।