ମସ୍କୋ, ୧୩।୨ : ରୁଷିଏ ଏବଂ ୟୁକ୍ରେନରେ ଯୁଦ୍ଧ ସଙ୍କଟ ଜାରି ରହିଛି। ଏହି ପରିସ୍ଥିତି ମଧ୍ୟରେ ରୁଷିଆ ଏହାର ମହାବିନାଶକ ଆଣବିକ ତୋପ ୨-ଏସ୍-୭ ପିଅନ୍କୁ ୟୁକ୍ରେନ୍ ସୀମାରେ ମୁତୟନ କରିଛି। ପିଅନ୍କୁ ୟୁକ୍ରେନର ଦ୍ୱିତୀୟ ବୃହତ୍ତମ ସହର ଖାର୍କିଭ ନିକଟରେ ଅବସ୍ଥିତ ଓ୍ବେ୍ସଲା ଲୋପାନରେ ମୁତୟନ କରିଛି । ୟୁକ୍ରେନ ସୀମାଠାରୁ ମାତ୍ର ୧୬ କିଲୋମିଟର ଦୂରରେ ଏହି ଅଞ୍ଚଳ ଅବସ୍ଥିତ। ଏହି ତୋପର ଲକ୍ଷ୍ୟଭେଦ କ୍ଷମତା ୩୭ କିଲୋମିଟର ରହିଛି।
ଗଣମାଧ୍ୟମ ସଂସ୍ଥା ଦ ସନ ରିପୋର୍ଟ ଅନୁଯାୟୀ, ରୁଷିଆ ପକ୍ଷରୁ ଏହି ତୋପ ମୁତୟନର ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଛି। ଏହି ତୋପ ଦୁନିଆରେ ତିଆରି ହୋଇଥିବା ସବୁଠୁ ବିନାଶକାରୀ ତୋପ ମଧ୍ୟରୁ ଗୋଟିଏ। ଏହି ତୋପ ୨୦୩ ମିଲିମିଟର ଆଣବିକ ବୋମାକୁ ବିସ୍ଫୋରଣ କରିବାକୁ ସକ୍ଷମ।
ରୁଷିଆର ଗୁପ୍ତଚର ମୁଖ୍ୟ ସର୍ଗେଇ ନାରୟଶକିନ ମଧ୍ୟ ଦାବି କରିଛନ୍ତି ଯେ ପାଶ୍ଚାତ୍ୟ ଦେଶମାନଙ୍କ ସାହାଯ୍ୟରେ ୟୁକ୍ରେନ ରୁଷିଆ ଉପରେ ଆକ୍ରମଣ କରିପାରିବ। ଏହା ଦ୍ୱାରା ମାନବିକତାର ଅସ୍ତିତ୍ୱ ବିପଦରେ ରହିଛି ବୋଲି ସେ ଚେତାବନୀ ଦେଇଛନ୍ତି।
ରୁଷିଆ ରାଷ୍ଟ୍ରପତି ବ୍ଲାଡିମୀର ପୁଟିନଙ୍କ ଅତି ନିକଟତର କୁହାଯାଉଥିବା ସର୍ଗେଇ ନାରୟଶକିନ ଦାବି କରିଛନ୍ତି, ୟୁକ୍ରେନ ସେନାର ସମସ୍ତ ଯୁଦ୍ଧ ୟୁନିଟ ଦୋନବାର ସୀମାରେ ଏକାଠି ହୋଇଛନ୍ତି। ବ୍ରିଟେନ ଏବଂ କାନାଡାରୁ ହଜାର ହଜାର ଟନ ସାମରିକ ଉପକରଣ ଏବଂ ବିସ୍ଫୋରକ ସାମଗ୍ରୀ ୟୁରୋପରେ ଆମେରିକାର ବେସ୍ରେ ମଧ୍ୟ ପହଞ୍ଚିଛି। ସେହିପରି ନାଟୋର ସ୍ବତନ୍ତ୍ର ବାହିନୀର ପରାମର୍ଶଦାତାଙ୍କ ସଂଖ୍ୟା ଯଥେଷ୍ଟ ବୃଦ୍ଧି ପାଇବାରେ ଲାଗିଥିବା ସର୍ଗେଇ କହିଛନ୍ତି।