ଓ୍ବାଶିଂଟନ,୧୫ା୭: ରୁଷିଆଠାରୁ ୫ଟି ଏସ୍-୪୦୦ ଏୟାର ଡିଫେନ୍ସ ମିଶାଇଲ ସିଷ୍ଟମ କିଣିବା ପାଇଁ ଭାରତର ଚୁକ୍ତି ଆଗରେ ଥିବା ପ୍ରତିବନ୍ଧକ ଏକପ୍ରକାର ହଟିଛି। ଆମେରିକାର ପ୍ରତିନିଧି ସଭାରେ ଏ ନେଇ ଧ୍ୱନିମତରେ ଏକ ସଂଶୋଧନ ଗୃହୀତ ହୋଇଛି। ୨୦୧୮ ଅକ୍ଟୋବରରେ ଟ୍ରମ୍ପ୍ ପ୍ରଶାସନର ତାଗିଦ୍ ସତ୍ତ୍ୱେ ଭାରତ ଏହି ପ୍ରତିରକ୍ଷା କ୍ଷେପଣାସ୍ତ୍ର ବ୍ୟବସ୍ଥା କିଣିବା ପାଇଁ ମସ୍କୋ ସହ ଚୁକ୍ତିବଦ୍ଧ ହୋଇଥିଲା। ଏସ୍-୪୦୦ ହେଉଛି ଭୂପୃଷ୍ଠରୁ ଆକାଶରେ ଲକ୍ଷ୍ୟସ୍ଥଳ ଭେଦ କରିପାରୁଥିବା ସବୁଠୁ ଅତ୍ୟାଧୁନିକ ସିଷ୍ଟମ। କାଉଣ୍ଟରିଂ ଆମେରିକାସ୍ ଆଡଭର୍ସରିଜ୍ ଥ୍ରୁ ସାଙ୍କସନ୍ସ ଆକ୍ଟ (ସିଏଏଟିଏସ୍ଏ) ବଳରେ ଆମେରିକାର କୌଣସି ଶତ୍ରୁ ରାଷ୍ଟ୍ରଠାରୁ ପ୍ରତିରକ୍ଷା ସାମଗ୍ରୀ କିଣାକିଣି ଉପରେ ଭାରତ ଉପରେ କଟକଣା ଲାଗିଥିଲା। ଚାଇନାର ବଢ଼ି ଚାଲିଥିବା ପ୍ରଭାବକୁ ପ୍ରତିହତ କରିବା ପାଇଁ ଏହି କଟକଣା ହଟାଯାଉ ବୋଲି ଭାରତୀୟ ବଂଶୋଦ୍ଭବ କଂଗ୍ରେସମ୍ୟାନ୍ ରାଓ ଖାନ୍ନା ଉକ୍ତ ଆଇନରେ ସଂଶୋଧନ ପ୍ରସ୍ତାବ ଆଣିଥିଲେ।