ନୂଆଦିଲ୍ଲୀ,୧୬।୪: ରୁଷିଆ ଭାରତକୁ ଏସ୍-୪୦୦ ମିଶାଇଲ୍ ସିଷ୍ଟମ୍ ଦ୍ୱିତୀୟ ପର୍ଯ୍ୟାୟ ଯୋଗାଣ ଆରମ୍ଭ କରିଛି। ୟୁକ୍ରେନ୍ରେ ଯୁଦ୍ଧ ଚାଲିଥିବାବେଳେ ମସ୍କୋ ଉପରେ ନାଟୋ ପକ୍ଷରୁ କଟକଣା ସତ୍ତ୍ୱେ ଏହି କ୍ଷେପଣାସ୍ତ୍ର ଯୋଗାଣ ପ୍ରକ୍ରିୟା ଚାଲିଥିବା ନୂଆଦିଲ୍ଲୀ ସୂତ୍ରରୁ ଜଣାପଡ଼ିଛି। ଏଥିରେ ବ୍ୟବହୃତ ଉପକରଣଗୁଡ଼ିକ ବିମାନ ଓ ଜାହାଜରେ ଅଣାଯାଉଛି। ୨୦୨୧ ଡିସେମ୍ବରରେ ଏହି ମିଶାଇଲ୍ ସିଷ୍ଟମ୍ର ପ୍ରଥମ ୟୁନିଟ୍ ଯୋଗାଣ ସମ୍ପୂର୍ଣ୍ଣ ହୋଇ କାର୍ଯ୍ୟକ୍ଷମ ହୋଇଥିଲା। ପ୍ରତିରକ୍ଷା ବିଶ୍ଳେଷକ ମେଜର ଜେନେରାଲ ଏସ୍.ବି. ଅସ୍ଥାନା କହିଛନ୍ତି, ଆମେରିକା ଯାହା କହିଲେ ବି ଡିଲ୍ର ଡେଲିଭରି ପ୍ରକ୍ରିୟା ଚାଲିବ। ଭାରତର ଜାତୀୟ ଓ ସାମରିକ ସ୍ବାର୍ଥ ପାଇଁ କେଉଁ ଦେଶରୁ ପ୍ରତିରକ୍ଷା ସାମଗ୍ରୀ କିଣାଯିବ ତାହା ନିଷ୍ପତ୍ତି ନେବା ନୂଆଦିଲ୍ଲୀର ସାର୍ବଭୌମ ଅଧିକାର। ପ୍ରକାଶ ଯେ, ରୁଷିଆଠାରୁ ୫ଟି ଦୂରଗାମୀ ଡିଫେନ୍ସ ମିଶାଇଲ୍ ସିଷ୍ଟମ୍ ଏସ୍-୪୦୦ କିଣିବା ପାଇଁ ୨୦୧୮ ଅକ୍ଟୋବରରେ ଭାରତ ଚୁକ୍ତିବଦ୍ଧ ହୋଇଥିଲା। ଡିଲ୍ ଅନୁସାରେ ଏହାର ମୋଟ ମୂଲ୍ୟ ହେଉଛି ୩୫,୦୦୦ କୋଟି ଟଙ୍କା। ଏହି ସିଷ୍ଟମ୍ ଜରିଆରେ ୪ ପ୍ରକାର କ୍ଷେପଣାସ୍ତ୍ର ମୁତୟନ କରାଯାଇପାରିବ। ଶତ୍ରୁପକ୍ଷର ୬୦୦ କି.ମି. ପର୍ଯ୍ୟନ୍ତ ଲକ୍ଷ୍ୟଭେଦ କ୍ଷମତା ଏହାର ରହିଛି।