ନୂଆଦିଲ୍ଲୀ,୧୨।୨: ଇଣ୍ଡିଆନ୍ ପ୍ରିମିୟର ଲିଗ୍(ଆଇପିଏଲ୍)ର ଆଗାମୀ ସଂସ୍କରଣ ପାଇଁ ଖୁବ୍ଶୀଘ୍ର ନିଲାମୀ ପ୍ରକ୍ରିୟା କରାଯିବ। ଏଥିପାଇଁ ୧୧୧୪ଜଣ ଖେଳାଳି ନାମାଙ୍କନ କରିଥିଲେ। ଏବେ ବିସିସିଆଇ ପକ୍ଷରୁ ନିର୍ଣ୍ଣାୟକ ଖେଳାଳି ତାଲିକା ଜାରି କରାଯାଇଛି। ସେଥିରୁ ଏସ୍. ଶ୍ରସନ୍ଥଙ୍କୁ ବାଦ୍ ଦିଆଯାଇଥିବା ଦେଖିବାକୁ ମିଳିଛି। ସ୍ପଟ୍ ଫିକ୍ସିଂ ଅଭିଯୋଗରୁ ମୁକ୍ତ ହେବା ପରେ କ୍ରିକେଟ୍କୁ ଫେରିଥିବା ଶ୍ରୀସନ୍ତ ଆଇପିଏଲ୍ ଖେଳିବାକୁ ଇଚ୍ଛା ପ୍ରକାଶ କରିଥିଲେ। ଏପରିକି ସେ ନିଜର ସର୍ବନିମ୍ନ ମୂଲ୍ୟ ୭୫ ଲକ୍ଷ ଟଙ୍କା ରଖିଥିଲେ। ହେଲେ ତାଙ୍କ ଆଶା ମଉଳିଛି। ଏନେଇ ପ୍ରତିକ୍ରିୟା ରଖି ଶ୍ରସନ୍ତ କହିଛନ୍ତି, ଆଇପିଏଲ୍ ୨୦୨୧ ନିଲାମୀ ପାଇଁ ଶର୍ଟଲିଷ୍ଟ ହୋଇ ନ ଥିଲେ ହେଁ ଆଶା ହରାଇନାହିଁ। ସେ ପରିଶ୍ରମ ଜାରି ରଖିବେ ବୋଲି କହିବା ସହ ପ୍ରଶଂସକମାନଙ୍କୁ ସମର୍ଥନ ପାଇଁ ଧନ୍ୟବାଦ ଜଣାଇଛନ୍ତି। ଏହାଛଡ଼ା ସେ କ୍ରିସ୍ ଗେଲ୍ଙ୍କ ଉଦାହରଣ ଦେଇ କହିଛନ୍ତି, ସେ ଏକଦା ଆଇପିଏଲ୍ ନିଲାମୀରେ ଅନ୍ସୋଲ୍ଡ ଥିଲେ। ଆର୍ସିବି ତାଙ୍କୁ ବିକଳ୍ପ ଭାବେ ସାମିଲ କରିଥିଲା। ହେଲେ ସେ ଟୁର୍ନାମେଣ୍ଟରେ ଚମକିଥିଲେ। ଏଣୁ ସେ ଏବର୍ଷ ନ ହେଲେ ବି ଆସନ୍ତା ବର୍ଷ ନିଶ୍ଚିତ ଆଇପିଏଲ୍ ଖେଳିବେ। ଏବେ ସେ ନିଜର ସମସ୍ତ ଧ୍ୟାନ ବିଜୟ ହଜାରେ ଟ୍ରଫିରେ ଲଗାଉଛନ୍ତି ବୋଲି ମଧ୍ୟ କହିଛନ୍ତି।